2 Siangphahrang 4 - Zanniat Bible

Elisha In Farah Hmaitong Bawm I

¹ Prophet burpui songin prophet pakhat ai nupui heh Elisha hnenah feh ai, “Bawipa, na sal pa i pasal in i thih san i. Na linghnak bangin ani tu Pathian a daih ngaimi i. Ikhalselai tunin batba a naihnak pa kawi ai i fapate pahnih tu batba hrangah sal ah pom tum i,” tiin ti i.

² Ciafangin Elisha in, “Ziang na bawt tuh ing? Inn ah ziang nai isi? tiin zawt i. Ani in, “Olive siti lang khat siar lo zaikhai nai lo ing,” tiin rel i.

³ Elisha in “Feh tulai na ompuite hnenin palang lawng tampui in zawng tu.

⁴ Ciaben fangin nangmah le na fapate pahnih tu inn songah lut in dawngkham kham tu ilai palang lawng songah ning siti palang ai siti heh thun tlang tu betbo ih. A dim sio fangin ning palangte tu a dang ah dah tu cingcing ih,” ti i.

⁵ Ciamanin hmaitong nu tu a fapate thawn inn songah lut tlang ai dawngkham a kham hnuaah, a fapate ai koihhnak palang songah a naiciahnak siti heh thun betbo i.

⁶ Palang lawng hmuahhmuah dim sio in a thun hnuaah, “Palang lawng um aw lai im? tiin zawt i. A fapa pakhat in, “Palang lawng a dang um nawn lo ihang,” tiin ti i. Ciafangin siti a thunhnak siti khai kang lio i.

⁷ Prophet Elisha hnenah feh leh ai, Elisha in, “Na siti zuar tulai na bat hmuahhmuah rul tu sio. Ciahlaiah nangmah le na fapate nunhnak tuhin paisa hlai um tuhlai thotho i,” ti i.

Elisha Le Shunem Khua Milian Nu

⁸ Nikhat ah Elisha tu Shunem khua ah feh i. Cia khua ah nupang milian pakhat um ai Elisha tu rong ai tuhin sawm ai,

⁹ ciami ai panin Shunem khua a hleng cang fangin ciami inn ah Elisha tu rong ai ṭiode i. Cen pasal hnenah, “Kin inn ai a kawi ṭiotu pa heh mi thianghlim i tuhin um ing.

¹⁰ Kin inn phu vumah khan pakhat bawt ngasing khaw ciami khan ah khuahluan pakhat, cabuai pakhat, tohkham pakhat le maikhuat pakhat dah sah tuhai a kin tlawng cang fangin ciata ah cam tu de seh,” tiin ti i.

¹¹ Nikhat tu Shunem khua ah Elisha tlawng ai a khan songah cawlum i.

¹² Cen a hnenum pa Gehazi heh, “Inntu nu ko ta tu,” tiin ruai i. Inn tu nu a kawi fangin,

¹³ Elisha in Gehazi hnenah, “Hemi tlukin a kin tuamhlawm manin le kin ca a rimsuhnak manin ziang amah caah bawt thil tuh ing, zawt ta tu. Kumpibawi maw, ralkap hotu ralbawi maw tawk sah in ziang thu tal rel sah tuhin na daih awm?” tiin ti i. Inn tu nu in, “A kulhnak zaikhai nai lo ing. I miphunpui lakah heh samhnak zaikhai nai tlang lo i ing,” ti i.

¹⁴ Cen Elisha in, “Ciatih ilekhaw amah ca ziang bawn sah tuh ing?” tiin Gehazi zawt i. Gehazi in, “A samhnak pakhat nai i; fapa nai lo i. A pasal le tar zo i,” tiin ti i.

¹⁵ “Heta ah kawi tuseh,” tiin Elisha in ti i. Inntu nu tu kawi ai dawngkham ah ding i.

¹⁶ Cen Elisha in, “Hmai kum tun camcu ah na kang songah fapaniu cawi tuh isi,” ti i. Ciafangin ani in, “Ai, bawipa, nang Pathian ai minung heh isin; thudon i rel malaw!” ti i.

¹⁷ Ikhalselai Elisha ai a tihnak bangin ciami hnua kum khat ah fapa nai ngaingai i.

¹⁸ A uham deuh fangin vaikhat tu fang at tuhin, fang attu dangte thawn a pa tu lo ah feh ve i. A fapaniu khai a pa hnenah feh ve i.

¹⁹ Cen mangrinlo in, “I pa lu i ur i, lu i ur i,” tiin au dekdo i. Ciafangin a pa in, “A nu hnenah put tu,” tiin a hnenum pakhat ruai i.

²⁰ Hnenum pa in a nu hnenah put teu ai a nu in a kawng vumah sun tian cawi ai thi i.

²¹ Ciafangin a nu in Elisha ai khan ah a luang koih ai khuahluan vumah dah ai dawngkham a kham hnuaah hlum i.

²² Cen a pasal ko ai, “Hnenum pakhat laak pakhat thawn hlat tu. Prophet Elisha hnenah feh tuhai a rang ngai in let tuh ing,” ti i.

²³ A pasal in, “Zaimanin tunnia ngelcel ah feh na nuam i? Sabbath nia ilo i, Hla Thar Puai khai ilo i,” tiin ti i. Ani in, “Poi lo i, pha tuh ngawn i,” ti i.

²⁴ Laak kung dan ben fangin hnenum pa heh, “Laak heh a rang ngai in nor tulai kaimah in na rel lai hlanlo fungruai mah,” tiin ti i.

²⁵ Ciatihin suak ai Elisha umhnak Karmel mual ah feh i. Shunem khua ai nupang nu kawi heh Elisha in a hla thahpui in hmu ai a hnenum Gehazi hnenah, “Sik tu Shunem khua ai nupang nu a kawi khiah!

²⁶ A rang ngai in a hnenah dawp tulai, amah le a pasal le a fapa niu cak tlang nimaw, zawt ta tu,” tiin ti i. Gehazi hnenah, “Thawmvang pha i,” tiin ti i.

²⁷ Ikhalselai Elisha hnen a hleng fangin a hmaiah ut ai a ke heh kuah i. Gehazi in tul tum teu napui Elisha in, “Tul malaw. A vansang i ti hmu lo isim? Bawipa in a vansanghnak thu le i rel fawn lo i,” tiin ti i.

²⁸ Ciafangin nupang nu in, “Bawipa, fapa na ngen awng ing im? Thudonrel malaw na ti ilo ing im?” tiin ti i.

²⁹ Elisha in Gehazi hnenah, “Rang tu! I faikiang lang tulai a dawp in dawp tu. Lampui ah aisu khai pon mah. Mi in na pon inkhai pon mah. A inn ah feh tulai a fapa vumah i faikiang lim tu,” ti i.

³⁰ Cen nupang nu in, “Bawipa ai nunhnak le nangmah ai nunhnak sal in thu na kham ing: Na zam tuh lo ing,” tiin Elisha heh ti i. Ciamanin a pahnih in feh kawm i.

³¹ Gehazi tu hmaiah feh ai, amahte a fapaniu vumah Elisha ai faikiang khiah lim i. Ikhalselai zaibang thawthang khai um lo i; mer khai mer lo i. Ciamanin let ai Elisha hnenah, “Nau tu nung thil cuang lo i,” ti i.

³² Elisha hleng fangin amah lek a khan songah lut ai khuahluan vumah naupang pa luang hmu i.

³³ Dawngkham kham ai Bawipa hnenah sawngen i.

³⁴ Cen naupang pa vumah bok ai a ka le a ka, a mit le a mit, a kut le a kut dah in net i. Ciafangin naupang pa luang tu tlawmniu lum deuh i.

³⁵ Cen Elisha tu tho ai a khan songah khat lam le khat lamah vak hnelhno i; cia hnuaah naupang pa ai luang net lala i. Ciatihin a bawn hnuaah naupang pa tu vel sarih tian haihthin ai a mit thak i.

³⁶ Cen Gehazi ko ai, “A nu ko ta tu,” ti i. A nu tu kawi ai Elisha in, “Na fapa lang tu,” tiin ti i.

³⁷ Ciafangin a nu tu Elisha ai keham ah bok ai a hmai laipua tong in upathnak pe i. Cen a fapaniu heh cawi ai fehpui i.

A Dang Ngaihsunurkul Pahnih

³⁸ Vaikhat tu a ram pumpuhluk ah rian tlung ai ciafangin Elisha tu Gilgal ah tlung i. Elisha in prophette thu a zirh thliahthlo laitak ah a hnenum pa hnenah, “Tapkha ah bel lianpui toh tulai hemi prophette ca meh suang tu,” ti i.

³⁹ Hnenum pakhat tu faurial si tuhin hampalak ah feh i. Hampalak ah uumri hmu ai uum thai loih ai a phur ben zah in a pon in fun i. Inn ah tlung ai ziang pah ling loin hampalak uum khiah at ai meh bel songah hlak i.

⁴⁰ Ai tuhin meh suak tlang fangin, “Ai aw, thihsi i na e!” tiin au tlang dekdo ai ai ngam tlang nawn lo i.

⁴¹ Ciafangin Elisha in, “Sangvut tlawmniu i pe tu ih,” ti i. Ciami khiah bel songah hlak ai, “Amahte ai tuhin meh suak tuhang ih,” tiin ti i. A suak leh fangin ai thil in cang leh i.

⁴² Cen vaikhat tu Baal Shalishah in mi pakhat kawi ai cia kum ai a khawm hmasaberhnak barley sangvut ai bawnhnak sangzawl kul le fangthar langhnak a vui in Elisha caah phurh i. Elisha in, “Hemi rong heh prophette pe tu, ai tlang tuseh,” tiin a hnenum pa ruai i.

⁴³ Ikhalselai a hnenum pa in, “Minung zakhat caah hemi tu zaikhai titlak lo i,” ti i. Elisha in, “Amahte ai tuhin pe tu, zaimantifangin Bawipa in, ‘Ai tlang tuhai a val khai um tuhlai i,’ ti i,” tiin rel i.

⁴⁴ Ciamanin prophette pe ai amahte veksen in a ai tlang hnuaah, Bawipa ai tihnak bangin, a val um ngaingai i.