2 Siangphahrang 25 - Zanniat Bible

Jerusalem Langhnak

¹ Babylon kumpibawi Nebuchadnezzar tu a kuthnia ai ummi Judah kumpibawi Zedekiah in tawng i. Ciamanin Nebuchadnezzar tu a ralkapte thawn kawi tlang ai Zedekiah ai Judah ram a uk kum kuahnak, hla hrahnak ai ni hra nia ah Jerusalem tawng i. Jerusalem khua kulh ai a pua cingkim in vingpui kan thilhnak tuhin laipua silh ai ciatihin ṭan hmun bawn tlang i.

² Ciatihin Zedekiah in ram a uk kum hlaikhathnak tian kulh tlang i.

³ Cen ciami kum, hla lihnak ni kua nia ah, khuasong mite tu aih tuh zaikhai a nai tlang lo fangin,

⁴ khuapui kulhhnak vingpui heh bal tlang ai Babylon ralkapte in kil tlang liang napui zan fangin Zedekiah le a ralkapte tu suak tlang sio i. Kumpibawi vuan ai lampui hlun in bangkhangte pahnih karlak kotka in suak tlang ai Jordan phairawn lamah tlan tlang i.

⁵ Ikhalselai Babylon ralkapte in kumpibawi Zedekiah heh dum tlang ai Jericho khua hiangai zawllai ah man tlang ai pom i; a ralkapte in zam sio i.

⁶ Zedekiah tu Babylon ralkapte in fehpui ai Riblah khua ai kumpibawi Nebuchadnezzar a um laitak ah a hnenah hlenpui i. Ciata ah Nebuchadnezzar in thukhan i.

⁷ Zedekiah mithmuh rori ah a fapate pahnih tu rek i; Zedekiah mit pahnih khiah phorh ai dar cikcin in a khit hnuaah Babylon khua ah fehpui i.

Bawipa Biakinn Siatsuahhnak

⁸ Kumpibawi Nebuchadnezzar in Babylon ram a uk kum hlaikuahnak, hla ngahnak ai ni sarih nia ah kumpibawi ralkapte hotu le kumpibawi ruathnakpetu Nebuzaradan tu Jerusalem khua songah lut i.

⁹ Bawipa Biakinn, kumpibawi inn le Jerusalem ai bawi upate deuhdeuh ai innte tai sek i.

¹⁰ Cen a ralkapte in khuapui vingpui bal tlang sio i.

¹¹ Cen Nebuchadnezzar in Jerusalem ai a tanghnak mizapui, zungthiamte le Babylon mite hnenai a ṭangtute Babylon ah kuat sio i.

¹² Judah ram songai a tanglai mite tu thilri zaikhai a nai lo mifarah ber pawl i ai ciamite tu cabit vuan le lo songah naperruai i.

¹³ Babylon ralkapte in Bawipa Biakinn songai a umhnak dar ai bawnhnak khuamte le khuam tunghnak pawl khiah ek ai seu sek i. Dar ai bawnhnak ti pamhnak maihum lianpui tu seu sek ai darte tu Babylon ah phur sio i.

¹⁴ Kawngvate, puleng ai vutkuang lawkhnak hlengte, maikhuat kilkhawlhnak ai hmanghnak thilrite, hibawlhnak ai selhnak sumhnam thisan donghnak maihumte le rimhmui taihnak hlengte le Biakinn songai hmanghnak dar ai bawnhnak thilri dangdang khai lang tlang sio i.

¹⁵ Ciahlaiah sui le ngun ai bawnhnak thilri hmuahhmuah, maihum cikniute le maivam koihhnak hlengte khai lang tlang i.

¹⁶ Bawipa Biakinn hrangah Solomon bawnhnak dar khuamte pahnih, khuam tunghnak tepawl le ti pamhnak maihum lianpui pawl tu a lian zeze manin cuai in teh thil tuh pawl ilo i.

¹⁷ Khuamte pahnih tu a tia dun i ai pi kul hluansarih sang le khuam pakhat ai lubol tu pi li le hrek sang i. Ciami khuam lubol cingkim tu dar in bawn ai tale thai zuk cuang in par liang i.

Judah Mite Babylon Hleng Tlang I

¹⁸ Cen ralkapte hotu ralbawipa Nebuzaradan in Suangbawi Sang Seraiah, a sangtu suangbawi Zephaniah le a dang Biakinn kiltute upa berber pawl pathum pom ai fehpui i.

¹⁹ Ciahlaiah khuapui songai ralkapte hotu ralbawipa, kumpibawi ruathnak petute panga, ralkap lamai laibu awhtu, ralkapte hotu bawipa bawmtu le a dangdang miupate sawmruk khai pom tlang i.

²⁰ Ciamite tu Babylon kumpibawi, Hamath ram Riblah khua ai a um laiah,

²¹ Nebuzaradan in fehpui ai kumpibawi ai thupehnak bangin ciata ah cawh ai rek berh i. Ciatihin Judah mite tu amahte ram an saltanghnak ramah fehpui ihang.

Judah Ram Uktu Gedaliah

²² Babylon kumpibawi Nebuchadnezzar in Ahikam ai fapa, Shaphan ai tupa, Gedaliah heh Babylon ramai thawngtoh lomi, Judah ramai a tangtute hotu ah Judah ram uktu bawi tuhin bawn i.

²³ Ciamite tu kumpibawi Nebuchadnezzar kuthnia ai a lut lomi Judah ralbawite le ralkapte in a ling fangin Gedaliah hnenah Mizpah khua ah kawi tlang i. Ciami ralbawite tu Nethaniah ai fapa Ishmael, Kareah ai fapa Jonathan, Netophah khuami Tanhumeth ai fapate Seraiah le Maacah mi Jezaniah i.

²⁴ Cen Gedaliah in amahte le a ralkapte hnenah, “Thutak ning rel ing: Babylon bawite zaikhai kih tuh um lo i. Judah ramah um tlang tu ilai Babylon kumpibawi na ruaih tu ih. Ciatihin zaizongza heh remcang tuh ngawn i,” tiin ti i.

²⁵ Ikhalselai ciami kum, hla sarih hla ah Nethaniah ai fapa, Elishama ai tupa, Judah kumpibawi ai songkhat, Ishmael tu ralkapte pahra thawn Mizpah ah feh ai Gedaliah heh rek lio i. Gedaliah hnenai a ummi Israel mite le Babylon mite khai rek berh i.

²⁶ Cen Israel mizapui tu milian ituseh mifarah ituseh, ralbawite thawn Babylon mite a lau manin suak tlang ai Egypt ramah tlan tlang i.

Jehoiachin Thawng Songin Suak I

²⁷ Evilmerodach in Babylon ram kumpibawi a cang kum rori ah Judah kumpibawi Jehoiachin heh a ninghio manin thawng in suah i. A suak nia tu Jehoiachin thawng a tohhnak kum sawmthum le kum sarihhnak, hla hlaihnih hla ai ni kul hluansarih nia ah i.

²⁸ Evilmerodach in Jehoiachin heh phatak ngai in sik ai amah thawn Babylon ramai thawng a tohhnak kumpibawi dangdang tahin upathnak pe cuang i.

²⁹ Jehoiachin tu a thawngtohnak hnikpon thlengruai ai a nun song hmuahhmuah ah Babylon kumpibawi thawn rong ai kawm de i.

³⁰ A nun song tu nisiar in a kulhnak lai tuhin paisa khai pe ṭiode i.