2 Siangphahrang 23 - Zanniat Bible

Josiah In Baal Khuavang Siatsuah Sio I

¹ Kumpibawi Josiah in Judah ram le Jerusalem khua ai hotute ko ai,

² anite thawn Bawipa Biakinn ah feh tlang i. Suangbawi le prophette, Jerusalem khuasong mi veksen, milian ituseh mifarah ituseh hlun tlang sio i. Amahte veksen hmaiah Biakinn songai a hmuhnak thukhamhnak laibu heh cawm ngai in siar sio i.

³ Kumpibawi ding hmun tuhin a bawnhnak khuam hiangah Josiah tu ding ai ciami laibu songai a umhnak bangin Bawipa thu ngai tuhin, a thinlung le a nunhnak veksen in a dan le a thupehnakte hlun tuhin le thukham songai a umhnak bangin bawn tuh sio in Bawipa hnenah thukhamhnak bawn i. Mizapui inkhai Bawipa pehnak thukham hlun tlang tuhin thukham tlang ve i.

⁴ Cen Josiah in Baal khuavang biahnak ai hmanghnak thilri hmuahhmuah, khuazingnu Asherah biahnak le arsite biahnak ai hmanghnak thilri hmuahhmuah heh Bawipa Biakinn in suah tuh sio in Suangbawi Sang Hilkiah le a bawmtu suangbawite le Biakinn dawngkham ai ṭuanvo naitute hnenah thupe i. A thupehnak bangin suah tlang sio ai ciami thilrite tu kumpibawi in Jerusalem khuapui pualam, Kidron Horkuam hiangah tih sio ai a vutkuangte tu Bethel ah kuat i.

⁵ A hlanai Judah kumpibawite ai ruaihnak suangbawite, Jerusalem hiang le Judah ram songai khuavang puleng vumai hibawlhnak seltu suangbawite le Baal khuavang, ni, hlapui, arsi le van ai a umhnak hmuahhmuah hnenai hibawlhnak seltu suangbawite hmuahhmuah heh hnawt sek i.

⁶ Bawipa biakinn ah khuazingnu Asherah ca birhnak khuam cianghlim heh phai ai Jerusalem khuapua, Kidron Horkuam ah tai ai cip ngai in a rial hnuaah mizapui phumhnak hlanmual ah vorh sek i.

⁷ Bawipa biakinn thawn peh dun in sahnak hlotlaute ai umhnak inn heh bal sek i. (Ciata ah tu nupangte in khuazingnu Asherah biahnak tuhin pon tak tlang i).

⁸ Judah ram song khuapuite in suangbawite tu Jerusalem ah khawm tlang sio ai amahte hibawlhnak puleng tu ramsong khuahacang ah, Geba in Beersheba tian, ningrimtiar sio i. Khuapui luthnak kotka kekeh lamai a umhnak, khuapui uktu bawi Joshua ai sahnak kotka hiangai me khuasia caah tiin sahnak, pulengte khai bal sek i.

⁹ Ciami suangbawite tu Bawipa ai Biakinn songah naruaihtu cang thil lo i; ikhalselai amahte rualpui suangbawite ca pehnak col tello sang cenin ai thil ve i.

¹⁰ Cen Josiah in Molech khuavang hnenai amahte fanu fapa maitai hibawlhnak in a pe thil lohnak tuhin Hinnom Horkuam ai a khuavang biahnak hmun Topheth tu ningrimtiar sek i.

¹¹ Judah kumpibawite ai a bawn awnghnak, ni biahnak le upathnak ah a tihnak siphuhte tu siatsuah sek ai siphuhlengte khai tai sek i. (Hemi siphuh le siphuhlengte tu Bawipa Biakinn hmun song kotka hiang, Nathan Melech tihnak bawi upa inn in a nong niu ah a dahhnak i).

¹² Judah kumpibawite in kumpibawi inn phu vumai a tianghnak pulengte le Bawipa Biakinn ai khante pahnih songai kumpibawi Manasseh in puleng a dawlhnak tu kumpibawi Josiah in bal sek i; pulengte khiah nawi sio in seu ai Kidron horkuam ah lon sek i.

¹³ Olive tlang an hlang lam, Jerusalem an nisuah lamai kumpibawi Solomon in ningdulkul khuavangte, Sidon khuazingnu Astartes, Moab khuavang Khemosh le Ammon khuavang Milkom ca ai a dawlhnak pulengte heh ningrimtiar sio i.

¹⁴ Ciami khuavangte caah lungbirhnakte tu seu sek ai khuazingnu Asherah ca khuam birhnak pawl vawng sio ai a bir hmun awng heh minung ruh in khuk sio i.

¹⁵ Nebat ai fapa, Israel mite sualhnak songah a hoitu, kumpibawi Jeroboam in Bethel ah khuavang bia hmun a sahnak tu Josiah in bal sek i. Puleng khai a bal hnuaah lung birhnak pawl seu sek ai a vut tian rial dek i. Asherah biahnak ai a khuam cianghlim khai tai sek i.

¹⁶ Cen Josiah in a hiang dungso a sik fangin tlang vumah mithi hlante hmu i. A songai ruhte heh phorhruai ai puleng vumah tai i. Ciatihin puleng tu ningrimtiar ai, hlanlaipui ai puai can ah ciami puleng hiangai kumpibawi Jeroboam a ding awng laitak ah prophet rel awnghnak heh khimruai i. Kumpibawi Josiah in a hiang sik lala fangin ciami thu a reltu prophet ai hlan heh hmu i.

¹⁷ “Aisu hlan i?” tiin zawt i. Bethel khua mite in, “Judah in kawi ai hemi puleng vumai na bawnhnak thilte heh cang leh tuh i, tiin a reltu prophet hlan i,” tiin ti tlang i.

¹⁸ Ciafangin Josiah in, “Hemi hlan tu aisu inkhai dai mah ih; hetih niu in um tuseh. A ruhte khai phorh tuh lo i si,” tiin thupe i. Ciamanin a ruhte tu phorh lo i. Samaria ai a kawitu prophette ruh khai phorh lo i.

¹⁹ Ciahlaiah Israel kumpibawite ai bawnhnak, Bawipa ai thin rawruaitu pulengte heh Israel ramah tampui um i. Ciami lawki pulengte tu Israel khuapui cangah um ai Josiah in bal sek i. Bethel khua puleng vumah bawnhnak bangin hemi pulengte vum ahkhai bawn i.

²⁰ Ciami lawki puleng ai naruaihtu suangbawite tu a naruaihhnak puleng vumah rek berh i. Cen puleng hmuahhmuah vumah minung ruh mai in tai i. Cia hnuaah Jerusalem ah let i.

Josiah In Kansuak Puai Bawn I

²¹ Kumpibawi Josiah in Thukham laibu songai a umhnak bangin Bawipa amahte Pathian upathnak ah Kansuak Puai bawn tuhin mizapui hnenah thupe i.

²² Thukhantute in Israel ram pumpuhluk a uk pan fangin Israel kumpibawite in ituseh, Judah kumpibawite in ituseh, kumpibawi aisu bang inkhai tunai Kansuak Puai a bawn bangin bawn tlang awng lo i.

²³ Hnuavai fangin Josiah in kumpibawi a cang kum hlairiathnak ah Kansuak Puai heh Jerusalem ah bawnsuak tlang i.

Josiah Ai Thil Remmhnak Dangte

²⁴ Suangbawi Sang Hilkiah in Bawipa Biakinn songah a hmuhnak laibu songin a umhnak dante tu hlunsuak tuh rori in Jerusalem khua le Judah ram songai a ummi mipolte le kutrin sikthiamte heh kumpibawi Josiah in hnawt sek i; innsang milimte, khuavang limte le khuavang biahnak thilri hmuahhmuah khai bal sek i.

²⁵ Kumpibawi Josiah bangin Bawipa tu a thinlung veksen, a fimhnak veksen le a thazang veksen in ruaih ai Moses dan a hlun siotu kumpibawi um awng kel lo i; amah ai hnuaah khai amah bangtu um lai lo i.

²⁶ Ikhalselai Bawipa thinrawhnak tu kumpibawi Manasseh ai thil bawnhnak manin Judah mite vumah mai bangin sa ai tun inkhai dap lai lo i.

²⁷ Bawipa in, “Israel vumai thil i bawnhnak bangin Judah vum ahkhai bawn tuh ing: I mithmuh lo hmun ramah Judah mite heh hnawt tuh sio ing; i rilciahnak Jerusalem khuapui le kaimah i bia ṭiohnak tuh i tihnak biakinn heh hnawl tuh ing,” tiin ti i.

Kumpibawi Josiah thihnak

²⁸ Kumpibawi Josiah ai bawnhnak dangdang tu Judah Kumpibawite Ai Tluanthu Laibu songah ngan tlang i.

²⁹ Josiah tu Judah kumpibawi a cang laiah Egypt kumpibawi Neko in a ralkapte ho ai Assyria Kumpimangbawi bawm tuhin Euphrates Runpui lamah feh i. Ciami heh kumpibawi Josiah in kham tum i; Megiddo ah Egypt kumpibawi thawn tawng dun ai Josiah heh rek i.

³⁰ A kuthnia ai tlangsuakte in siphuhleng in Jerusalem ah phur tlang ai kumpibawi hlanmual ah phum tlang i. Cen Judah mite in Josiah ai fapa Joahaz tu a pa tumrul in ril tlang ai thau pawh ai kumpibawi ah cang i.

Judah Kumpibawi Joahaz

³¹ Joahaz tu kum kul hluanthum a khim fangin Judah kumpibawi cang ai Jerusalem an hlathum song uk i. A nu tu Libnah khuami Jeremiah ai fanu Hamutal i.

³² Joahaz in hlanlai a pupate ai ziaza hlun manin Bawipa hmaiah sual i.

³³ Egypt kumpibawi Neko in pom ai Hamath ram, Riblah khua ah thawng toh i; cen Judah mite in Egypt kumpibawi hnenah ngun tangka fai cuai thawng hnih le sui cuai kul siahkhon pe tlang i.

³⁴ Kumpibawi Neko in Josiah ai fapa Eliakim heh Josiah tumrul in Judah kumpibawi ah bawn ai a hming Jehoiakim tiin thleng i. Joahaz tu kumpibawi Neko in Egypt ramah fehpui ai ciata ah thi i.

Judah Kumpibawi Jehoiakim

³⁵ Cen kumpibawi Jehoiakim in Egypt kumpibawi ai siah ngenhnak pekhim tuhin mizapui hnenah a lian le a farah sik in, ngunkhuai lang i.

³⁶ Jehoiakim kum kul hluannga a khim fangin Judah kumpibawi cang ai Jerusalem an kum hlaikhat song uk i. A nu tu Rumah khuami Pedaiah ai fanu Zebibah i.

³⁷ Jehoiakim in a pupate ziaza a hlun manin Bawipa hmaiah sual i.