2 Siangphahrang 20 - Zanniat Bible

Kumpibawi Hezekiah Urhnak

¹ Cialai ah kumpibawi Hezekiah tu a roh ngai in ur i. Amoz ai fapa prophet Isaiah in fan ai a hnenah: “Bawipa in, ‘Ro na cah nuamhnak khai cah tuhang; zaimantifangin na nung tuh lo i; na thi tuh i,’ ti i,” tiin rel i.

² Ciafangin Hezekiah tu bangkhang lamah her ai sawngen i,

³ “Aw Bawipa, nangmah ai rinsantlak le thinlung i naihnak a veksen thawn na ruaih ai na hmaiah a pha lek bawn ing, ti ling sio isi,” ti ai a roh ngai in kap i.

⁴ Isaiah tu suak ai feh i; ikhalselai kumpibawi inn ai khan laiteng a kan hlanah Bawipa in,

⁵ “Bawipa ai minungte uktu Hezekiah hnenah let tulai a hnenah, ‘Bawipa kaimah, na pu David ai Pathian in na sawngenhnak heh na ngai sah ai na mithli khai hmu zo ing. Na cakruai leh tuhai ni thum songah biakinn ah feh ben tuh isi.

⁶ Tun hnua kum hlainga na nung tuhlai i. Nangmah le he khuapui tu Assyria Kumpimangbawi kut in ning hup tuh ing. Hemi khuapui tu i hmingthanghnak ah le i sal pa David hnenai i thukhamhnak manin hup tuh ing,’ ti ta tu,” tiin ti i.

⁷ Cen Isaiah in kumpibawi hnenumte hnenah, “A uihlut ma ah thaihmin ai bawnhnak si mat tu ilai cak tuh i,” ti i.

⁸ Kumpibawi Hezekiah in, “Bawipa in i cakruai tuhai ni thum songah Biakinn hleng ben tuh isi, ti ai hmuhhnak heh ziang ini? tiin zawt i.

⁹ Ciafangin Isaiah in, “Bawipa in a thukhamhnak khimruai tuh i, ti hmuhhnak ah hnikhnaihhnak na pe tuh i. Nihlim heh hmai lamah kal hra thawnruai na nuam maw, ihlahle hnua lamah kal hra letruai na nuam sawn pa? tiin zawt i.

¹⁰ Hezekiah in, “Nihlim hmaiah kal hra thawn heh bai deuh tuh i; khel lamah letruai tu,” ti i.

¹¹ Ciafangin Isaiah in, Bawipa hnenah sawngen ai, Bawipa in nihlim heh kumpibawi Ahaz ai bawnhnak kaipum a tolh zianzo laiah khel lamah kal hra letruai i.

Babylon In Palaite Kawi Tlang I

¹² Ciami can ah Baladan ai fapa, Babylon kumpibawi Merodach Baladan in kumpibawi Hezekiah ur i, ti ling ai lai le lehsawng kuat i.

¹³ Ciafangin Hezekiah in Babylon an a kawitu palaite heh phatak ngai in sik ai a lianhnak hmuahhmuah, a sui le a ngun, a rimhmuite le a ralkapte ai ralthuamte tianin hmuh sio i. A thilri le a thilthuamte dahhnak khan ah ituseh, a ram songai umhnak thilri dangdang ituseh, a hmuh lohnak zaikhai um lo i.

¹⁴ Cen prophet Isaiah tu kumpibawi Hezekiah hnenah kawi ai, “Hemi minungte tu a konteng in kawi tlang i? Na hnenah ziang rel tlang i?” tiin zawt i. Ciafangin Hezekiah in, “Anite tu ram hlapui, Babylon ram an kawi tlang i,” ti i.

¹⁵ Isaiah in, “Kumpibawi inn songah ziang sik tlang i?” tiin ti i. Hezekiah in, “Zaizongza sik tlang sio i. Thilri dahhnak songai i hmuh lohnak zaikhai um lo i,” tiin sawn i.

¹⁶ Ciafangin Isaiah in kumpibawi hnenah, “Bawipa in,

¹⁷ ‘Na pupate ai tun nia tian khawlhnak thilrite heh Babylon a hleng sek can hleng tuh i. Zaikhai tang tuh lo i.

¹⁸ Nangmah ai song suak na tefa hrekkhatte khai fehpui tuhai Babylon kumpibawi inn ah til ret in ruaihtu cang tlang tuh i,” tiin rel i.

¹⁹ Ciatihin a tihnak tu kumpibawi Hezekiah in, “I nun song ahcen daphnak le huphimhnak um tuh i,” tiin a ruat manin Isaiah hnenah, “Bawipa ai ponkam na thanhnak heh pha i,” ti i.

²⁰ Kumpibawi Hezekiah ai thil bawnhnak dangdang, ral pha bik ai naperhnak, khuapui caah ti khawlhnak lianpui bawn ai lai hnia in tikong a bawnhnak tepawl khai Judah Kumpibawite Ai Tluanthu Laibu songah ngan tlang i.

²¹ Hezekiah tu thi ai a fapa Manasseh in a tumrul in kumpibawi cang i.