2 Siangphahrang 2 - Zanniat Bible

Elijah Vancung Ah Hon I

¹ Bawipa in Elijah tu simpai in vancung ah a lang can hleng i. Elijah le Elisha tu Gilgal in suak kawm ai,

² a vak kawm laitak ah Elijah in Elisha hnenah, “Nang tu heta ah um tu. Kai tu Bawipa in Bethel ah feh i ruai i,” ti i. Ikhalselai Elisha in, “Bawipa ai hming sal in le nangmah ai nunhnak thawn thu na kham ing: letsan tuh hrimhrim lo ing,” ti i. Ciamanin amahte pahnih in Bethel ah feh kawm i.

³ Ciata ai a umtu prophette tu Elisha hnenah kawi tlang ai, “Bawipa in na bawipa heh tunnia ah na hnenin lang tuh ing, ti khiah ling aw sim?” tiin zawt tlang i. Elisha in, “I, ling ing. Ikhalselai ciami thu tu rel tlang hlah sing,” tiin ti i.

⁴ Cen Elijah in Elisha hnenah, “Nang heta ah um tu. Kai tu Bawipa in Jericho ah feh tuhin i ruai i,” ti i. Ikhalselai Elisha in, “Bawipa ai hming sal in le na nunhnak thawn thu na kham ing: Na hlum tuh hrimhrim lo ing,” ti i. Ciamanin Jericho ah feh kawm i.

⁵ Ciata ai a umtu prophette tu Elisha hnenah kawi tlang ai, “Bawipa in na bawipa heh tunnia ah na hnenin lang tuh i ti khiah ling aw sim?” tiin zawt tlang i. Elisha in, ‘I, ling ing. Ikhalselai ciami thu tu rel tlang hlah sing,” tiin ti i.

⁶ Cen Elijah in Elisha hnenah, “Nang heta ah um rih tu. Kai tu Bawipa in Jordan Runpui ah feh tuhin i ruai i,” ti i. Ikhalselai Elisha in, Bawipa ai hming sal in le na nunhnak thawn thu na kham ing: Na hlum tuh hrimhrim lo ing,” ti i. Ciamanin amahte pahnih in feh kawm ai,

⁷ prophette sawmnga in Jordan Runpui tian hlun tlang i. Elijah le Elisha tu Jordan Run kamah ding kawm ai prophette sawmnga tu a hla thahpui ah ding tlang i.

⁸ Cen Elijah in a korfualpui hawk ai a zual hnuaah ciami in Runti heh vit i; vaikhat pah in ti tu khan ai Elijah le Elisha tu lai hul vuman khat lam ralah feh kawm i.

⁹ Ciata ah Elijah in Elisha hnenah, “Kai tu na hnenin i lang tuh ihang. Ciatihin i lang hlanah ziang bawn sah tuh na daih pa?” tiin zawt i. “Nangmah sawngtu tuh imanin na huham let hnih in i pe tu,” tiin ti i.

¹⁰ Ciafangin Elijah in, “Na ngenhnak tu na pe tuhin a har ze i. Ikhalselai na hnenin kaimah i lang laitak i hmu lesikhaw na ngenhnak tu ngah tuh isi,” tiin ti i.

¹¹ Thu rel kongin feh kawm ai mangrinlo in amahte karlak ah mai siphuhte ai dukhnak mai siphuhleng hleng ai Elijah heh simpai in van ah zuangpui i.

¹² Ciami heh Elisha in a hmu fangin, “I pa, I pa! Siphuhleng le siphuh vumto ralkapte bangin Israel hupthaitu!” tiin au i. Cia hnuaah Elijah heh hmu nawn lo i. A lungsia in Elisha tu a hnikpon hmun hnih in zik i.

¹³ A hawkhnak Elijah ai korfualpui tu Elisha in a khul hnuaah let ai Jordan Run kamah ding i.

¹⁴ Elijah ai korfualpui in ti khiah vit ai, “A konteng ah Bawipa, Elijah ai Pathian tu um ini?” tiin ti i. Ti a vit fangin khan ai Elisha tu khat lam ralah tan suak i.

¹⁵ Jericho ai a umtu prophette sawmnga in amah khiah a hmu tlang fangin, “Elijah ai huham tu Elisha vumah um i,” tiin ti tlang i. Hmuak ai a hmaiah ut tlang ai,

¹⁶ “Mi thahat ciang minungte sawmnga heta ah um tlang i ing. Feh tuhai na bawipa si tlang tuh i ing. Bawipa ai rauhla in cawi ai mual vumah maw, hmun khatkhat ah hlum lio i tuh i,” tiin ti tlang i. Ciafangin Elisha in, “I lo i, feh mah ih,” tiin ti i.

¹⁷ Ikhalselai a ngen hlaihlawr manin fehruai i. Minungte sawmnga tu feh tlang ai a suk le a so ramcang ah ni thum song si tlang i. Ikhalselai Elijah heh hmu tlang lo i.

¹⁸ Elisha in Jericho khua an iang hlen ai a hnenah let tlang fangin, “Feh mah ih ning ti tho lo ing maw? tiin ti i.

Elisha Ai Khuaruahhar Bawnhnak

¹⁹ Jericho khuasong mi hrekkhatte tu Elisha hnenah kawi tlang ai, “Bawipa, na linghnak bangin hemi khua le ram heh a pha bik i. Ikhalselai ti phalo manin fazulh ciamco de i,” ti tlang i.

²⁰ Ciafangin Elisha in, “Hleng thar songah ci dah tu ilai i hnenah koih tu ih,” ti i. A tihnak bangin koih tlang ai,

²¹ amahte tihnar ah feh ai ci a phulh hnuaah, “Bawipa in, ‘Hemi ti khiah ciangfairuai zo ai thihhnak le fazulhhnak suakruai tuh nawn lo ing,’ ti i,” tiin rel i.

²² Ciami ai panin Elisha ai relhnak bangin ti khiah ti ciangfai ah cang i.

²³ Elisha tu Jericho in suak ai Bethel lamah a feh laitak ah khua pakhat songin pasal naupang suak tlang ai hnihsarelhnak ah hmang ai, “Feh tu lukolh pa, feh tu,” tiin sap tlang i.

²⁴ Elisha tu hnua lam her ai mit en kongin Bawipa ai hming in cam i. Cen hampalak in vom nupuite pahnih suak kawm ai naupang pasalte sawmli le pahnih tu hlai sek i.

²⁵ Ciata in Elisha tu Karmel Mual ah feh ai cia hnuaah Samaria ah let i.