2 Siangphahrang 15 - Zanniat Bible

Judah Kumpibawi Uzziah

¹ Israel kumpibawi Jeroboam pahnihhnak in Israel ram a ukhnak kum kul hluansarih kum ah, Judah kumpibawi, Amaziah ai fapa Uzziah tu,

² kum hlairuk a khim fangin Judah kumpibawi cang i. Jerusalem khua an Judah ram heh kum sawmnga le kum hnih song uk i. A nu tu Jerusalem khuami Jecoliah i.

³ Uzziah tu a pa bangin Bawipa ai daihdan in bawn i.

⁴ Ikhalselai lawki mite ai amahte khuavang biahnak tepawl siatsuah lo manin mi tampui in ciata ah hibawl ai rimhmui taihnak sel tlang i.

⁵ Bawipa in Uzziah vumah phar ur hlengruai ai a nun song phar ur nai tata i. A naperhnak hmuahhmuah midang in sawng ai amah ai inn ah a tumce in um i; a fapa Jotham in ram pumpuhluk uk i.

⁶ Uzziah ai a dang naperhnak tepawl tu Judah Kumpibawite ai Tluanthu Laibu songah ngan tlang i.

⁷ Uzziah tu thi ai Jerusalem David khuapui, kumpibawi hlanmual ah phum tlang i.

Israel Kumpibawi Zechariah

⁸ Kumpibawi Uzziah in Judah ram a ukhnak kum sawm thum le kum riathnak ah Jeroboam pahnihhnak ai fapa Zechariah tu Israel kumpibawi cang ai Israel ram heh Samaria khua an hla ruk song uk i.

⁹ Nebat ai fapa, Israel a hoisualtu, kumpibawi Jeroboam sualhnak a hlun ve manin a hlanai kumpibawite bang thotho in Bawipa vumah sualhnak bawn i.

¹⁰ Jabesh ai fapa Shallum in kumpibawi Zechariah heh tawngcai ai Ibleam ah rek ai a tumrul in kumpibawi cang i.

¹¹ Zechariah ai a dangdang naperhnak tepawl tu Israel Kumpibawite Ai Tluanthu Laibu songah ngan tlang i.

¹² Ciatihin Bawipa in kumpibawi Jehu hnenah thu kham ai, “Na tesinfate lakin san lihnak tian kumpibawi tuh i,” tihnak khim leh i.

Israel Kumpibawi Shallum

¹³ Kumpibawi Uzziah in Judah ram a ukhnak kum sawmthum le kum kua kum ah Jabesh ai fapa Shallum tu Israel kumpibawi ah cang ai Samaria khua an hlakhat song uk i.

¹⁴ Gadi ai fapa Menahem tu Tirzah in Samaria ah feh ai kumpibawi Shallum tumrul in kumpibawi ah cang i.

¹⁵ Shallum ai a dang bawnhnak tepawl, mi a tawngcaihnak thute thawn, Israel Kumpibawite Ai Tluanthu Laibu songah ngan tlang i.

¹⁶ Menahem tu Tirzah in Samaria lamai a feh laitak ah, Tappuah khuapui an a kotka hon nuam lo manin cia khua heh bal sek i; khuasong mite rek berh ai a hiangai khuatenaute khai siatsuah sek i. Naupai nupang hmuahhmuah tianin amahte ril puah sah sio i.

¹⁷ Kumpibawi Uzziah in Judah ram a ukhnak kum sawmthum le kum kua kum ah Gadi ai fapa Menahem tu Israel kumpibawi cang ai Samaria khua an kum hra song uk i.

¹⁸ Nebat ai fapa, a thi tianin Israel a hoisualtu, kumpibawi Jeroboam ai sualhnak heh Menahem in hlun ve ai Bawipa vumah sualhnak bawn i.

¹⁹ Cen Assyria Kumpimangbawi Tiglath Pileser in Israel ram tawng ai Assyria Kumpimangbawi kuthnia ah Israel kumpibawi a cang thil thotho tuhin Tiglathpileser hnenah ngun tangka a phurh in phurh thawng khat pe i.

²⁰ Israel ram songin mi nainung deuhdeuh pawl hnenin mi pakhat ah ngun tangka sawmnga ṭen siahkhuai i. Ciatihin Tiglathpileser tu a ramah let i.

Israel Kumpibawi Menahem

²¹ Menahem ai a dangdang naperhnak tepawl tu Israel Kumpibawite Ai Tluanthu Laibu songah ngan tlang i.

²² Menahem tu thi ai phum tlang i. Cen a fapa Pekahiah in a tumrul ah kumpibawi tuhin sawng i.

Israel Kumpibawi Pekahiah

²³ Kumpibawi Uzziah in ram a ukhnak kum sawmnga kum ah Menahem ai fapa Pekahiah tu Israel kumpibawi cang ai Samaria khua an kum hnih song uk i.

²⁴ Nebat ai fapa, Israel a hoisualtu, kumpibawi Jeroboam ai sualhnak a hlun manin Bawipa vumah sualhnak bawn i.

²⁵ Pekahiah ralkap songai ralbawi pakhat Remaliah ai fapa Pekah in, Gilead minungte sawmnga thawn Pekahiah tawngcai tlang ai Samaria khua, kumpibawi inn songtaber khan ah Argob le Araih thawn rek tlang ai a tumrul in kumpibawi cang i.

²⁶ Pekahiah ai a dangdang naperhnak tepawl tu Israel Kumpibawite ai Tluanthu Laibu songah ngan tlang i.

Israel kumpibawi Pekah

²⁷ Kumpibawi Uzziah in Judah ram a ukhnak kum sawmnga le kum hnihhnak ah Remaliah ai fapa Pekah tu Israel kumpibawi cang ai Samaria khua an Israel ram kum kul song uk i.

²⁸ Israel a hoisualtu, Nebat ai fapa kumpibawi Jeroboam ai sualhnak a hlun ve manin Bawipa ai mithmuh ah sualhnak bawn i.

²⁹ Pekah in Israel a kumpibawi laiah Assyria kumpimangbawi Tiglathpileser in Ijon, Abel Beth Maacah, Jonoah, Kadesh le Hazor khuapuite lang i. Gilead ram, Galilee ram le Naphtali ramte khai lang sio ai cia rammi tampui Assyria ah sal tuhin feh pui i.

³⁰ Uzziah ai fapa Jotham in Judah kumpibawi a canghnak kum kulhnak ah Elah ai fapa Hoshea in kumpibawi Pekah heh tawngcai ai rek i; cen a tumrul in kumpibawi cang i.

³¹ Pekah ai bawnhnak dangdang tu Israel Kumpibawite Ai Tluanthu Laibu songah ngan tlang i.

Judah Kumpibawi Jotham

³² Remaliah ai fapa Pekah in Israel ram a uk kum hnihhnak kum ah Uzziah ai fapa Jotham tu Judah kumpibawi cang i.

³³ Kum kul hluannga a khim fangin kumpibawi cang ai Jerusalem an kum hlairuk song uk i. A nu tu Zadok ai fanu Jerusha i.

³⁴ Jotham in a pa Uzziah ai hnua hlun in Bawipa ai daihdan bawn i.

³⁵ Ikhalselai lawki mite ai khuavang biahnak tepawl siatsuah lo ai mi tampui in ciata ah hibawl tlang ai rimhmui tai tlang ṭiode i. Bawipa Biakinn sak lam kotka a bawntu heh amah Jotham i.

³⁶ Jotham ai bawnhnak dangdang tu Judah Kumpibawite ai Tluanthu Laibu songah ngan tlang i.

³⁷ Jotham in Judah a kumpibawi laiah Bawipa in Syria kumpibawi Rezin le Israel kumpibawi Pekah heh Judah tawng tuhin hlat i.

³⁸ Jotham tu thi ai Jerusalem khua, David khuapui kumpibawi hlanmual ah phum tlang i. Cen a fapa Ahaz in a tumrul in kumpibawi cang i.