2 Siangphahrang 11 - Zanniat Bible

Judah Kumpibawinu Athaliah

¹ Kumpibawi Ahaziah ai nu Athaziah in a fapa rekhnak thu a ling fangin a fapa Athaliah ai innsangte heh, kumpibawi cang mawh ngai ti lau manin rek berh i.

² Ahaziah ai fapa Joash lek luat i. Ani khai rek tuhhnak inapui a ni Jehosheba in hup ngah i. (Jehosheba tu kumpibawi Jehoram ai fanu i ai Ahaziah ai farnu khatta i). Jehosheba in Joash heh amah lentu nu thawn Biakinn songai ithmun khan pakhat songah thup ai ciata ah kilkhawl i; ciatihin Athaliah in hmu lo ai luat i.

³ Jehosheba in Joash tu kum ruk song Biakinn songah thup ai phantak ngai in sik i; ciami song heh Athaliah in kumpibawinu cang ai rampui uk i.

⁴ Ikhalselai kum sarihhnak ah suangbawi Jehoiada in kumpibawinu kiltu le kumpibawi innkiltu bawite tu Biakinn ah ko ai cukcam in thu khamruai ai a tumhnak heh anite hnenah rel i. Kumpibawi Ahaziah ai fapa Joash tu anite hmaiah koih ai,

⁵ hetihin thupe i. “Sabbath nia ai mi ning kil fangin ningmah lakai seu thum seu khat in kumpibawi inn kil tuh i si.

⁶ A dang seu khat tu Sur kotka kil tu ilai a dang seu khat in kotka kiltu hnua lamin kil tuh i si.

⁷ Sabbath nia ai mi kil lotu bur hnihte khai a hlaice in Biakinn ah ṭuanvo nai tuhai kumpibawi kil tlang tuh i si.

⁸ Kumpibawi Joash tu ning ralvang phok cia in kil tu ilai a fehhnak hmuncang ah hlun tu ih. Ning nongtu hmuahhmuah heh rek tuh i si,” ti i.

⁹ Suangbawi Jehoiada ai thuhluphnak tu bawite in ngai tlang ai amahte kuthnia ai minungte, Sabbath nia ai mikiltute ituseh, mi kil lotute ituseh, a hnenah kawiruai sio i.

¹⁰ Jehoiada in bawite hnen ahhen David ai hmanghnak, Biakinn songai a dahhnak faipui le lumte pe i.

¹¹ Cen mikiltu ralkapte tu Biakinn cingkim ah dah ai amahte ralvang awh fekfek in kumpibawi kil tlang i.

¹² Ciafangin Jehoiada in Joash heh suah ai kumpibawi lukhuk a khuk hnuaah thukhamhnak laihnahzual, kumpibawi thunaihnak laipui thawn pe i. Cen thau pawh ai kumpibawi ah bawn i. Mizapui in papabeng tlang ai, “Kumpibawi a nun khua sau tu hram seh! tiin au tlang i.

¹³ Kumpibawinu Athaliah in mizapui le mikiltute auhnak thawmvang a za fangin mizapui taikhawmhnak Biakinn ah rang ngai in feh i.

¹⁴ Kumpibawi thar heh, a dan bangin, Biakinn song luthnak khuam hiangah dingruai ai ralbawite le thirhlung hmuttute in kil tlang liang i. Mizapui tu ang ngai in au tlang i; thirhlung tum ai a um tlang khiah Athaliah in hmu i. A lungsia in Athaliah tu a hnikpon zik ai, “Tawngcaihnak! Tawngcaihnak! tiin au i.

¹⁵ Jehoiada in Biakinn songah Athaliah a rek nuam lo manin ralbawite hnenah, “Pom tu ilai ralkapte in a kil kongin sumpua ah duk tu ih; amah a hup tumtu hmuahhmuah rek tusek ih,” tiin thupe i.

¹⁶ Pom tlang ai kumpibawi inn ah fehpui ai Siphuh kotka tihnak ah rek tlang i.

Jehoiada Ai Thlenghnak

¹⁷ Jehoiada in Bawipa ai miphun a cangthilhnak tuhin kumpibawi le mizapui heh Bawipa thawn thukhamhnak bawnruai i; kumpibawi le mizapui khai amahte karlak ah thukhamhnak bawnruai i.

¹⁸ Mizapui tu Baal biakinn ah feh tlang ai bal tlang sio i; biakinn songai a umhnak puleng le milimte tu a khoi tian sep tlang sio i. Baal suangbawi Mattan khai puleng hmai rori ah rek tlang i. Jehoiada in Biakinn ah mikiltu dah ai,

¹⁹ amah le ralbawite, kumpibawi kiltu le kumpibawi innkiltu Biakinn in kumpibawi inn ah fehpui ai mizapui in hlun tlang i. Joash tu mikiltu kotka tihnak in lut ai kumpibawi tohkham vumah to i.

²⁰ Mi zongzong ai thinlung tu anghnak in dim i; kumpibawi inn songah ralvang thawn Athaliah a rek hnuaah amahte khuapui heh dap ihang.

²¹ Kum sarih a khim fangin Joash tu Judah kumpibawi ah cang i.