2 Siangphahrang 10 - Zanniat Bible

Ahab Tefate Rek Tlang I

¹ Kumpibawi Ahab ai tefate tu Samaria khuapui songah sawmsarih um tlang i. Jehu in lai pakhat ngan ai khuapui uktute, ramsong upate le Ahab ai tefa kilkhawltu upate hnenah kuat i. Ciami a lai songah,

² “Kumpibawi tefa kilkhawltu upate amahte caah ṭuanvo naitu i si. Ving kulhhnak khuapuite, fai le vangte, siphuh le siphuhlengte nai bial i si. Hemi lai ning ngah sawng fangin,

³ kumpibawi ai tefate lakah a tlak ber tihnak ril tu ilai kumpibawi cangruai tu ih; cen amah lam ṭang in raltawng tuh i si,” tiin ti i.

⁴ Ciafangin Samaria uktute tu thinlau tlang ngai i. Kumpibawi Joram le kumpibawi Ahaziah inkhai a neh kawm lomi Jehu tu kin in akontih in tawng ben tuh i ing?” tiin ti tlang i.

⁵ Ciamanin kumpibawi inn uktu bawi, khuapui uktu, ram song upate le kumpibawi tefa kilkhawltu upate in Jehu hnenah thucah ai, “Kin tu na sal i ing ai na relhnak hmuahhmuah bawn tlang tuh sio i ing. Ikhalselai aisu khai, ‘Nang in kumpibawi cang tu’ tiin ti tuh lo i ing. A pha na tihnak tu bawn tu,” ti tlang i.

⁶ Cen Jehu in lai pakhat ngan lala ai, “Kaimah lamah a ṭangtu i si ai i thupehnak hlun tuh ile i sikhaw, kumpibawi Ahab ai tefate lu heh i umhnak Jezreel khua ahhen thangha ah tun camcu fangin koih tu ih,” tiin ti i. Kumpibawi Ahab ai tefate sawmsarih tu Samaria khuapui songai umtu upa hotute in kilkhawl ai sik tlang i.

⁷ Cen Jehu kuathnak lai a ngah fangin khua songai upate in Ahab ai tefate sawmsarih rek berh ai amahte lu heh bawm songah dah ai Jezreel khua Jehu hnenah kuat tlang i.

⁸ Ahab ai tefate lu hleng i ti khiah Jehu hnenah a rel tlang fangin ani in ciami lute heh khuapui kotka hmun hnih ah pum bial ai a thangha tian ciata ah dah tuhin thupe i.

⁹ A thangha fangin Jehu tu khuapui kotka ah feh ai ciata ai a ummi mizapui hnenah, “Kumpibawi Joram a tawngtu le a rektu heh kaimah ing; ciami thu ah ning mawhhnak zaikhai um lo i. Ikhalselai hemite tu aisu in rek i?

¹⁰ Hemi tu Ahab ai tefate vumah Bawipa ai ponkam khim i, ti hmuhhnak i. Bawipa amah in prophet Elijah hnenah thu a khamhnak heh bawn zo i,” tiin ti i.

¹¹ Ciatihin Jezreel khua songai a ummi Ahab ai songkhatte, a kuthnia ai tlangsuakte, a rualpui pha pawl le a suangbawite tu amahte veksen in Jehu in rek berh i; pakhat khai tang loin rek berh i.

Ahaziah Songkhatte Rek Tlang I

¹² Jehu tu Jezreel in suak ai Samaria khua ah feh i. Lam lakah, “Tuukhalte Cam hmun,” tihnak hmun a hleng fangin,

¹³ Judah kumpibawi Ahaziah ai songkhatte thawn tawk dun i. “Aisute i si?” tiin zawt i. Anite in, “Ahaziah ai songkhatte i ing! Jezreel ah kumpibawinu Jezebel ai fapate le kumpibawi songkhatte tawk tuhin le upathnak pe tuhin feh tum i ing,” tiin ti tlang i.

¹⁴ Ciafangin Jehu in, “A nung in pom tlang tu sio ih,” tiin a ralkapte heh thupe i. Pom tlang sio ai ciata ai khur pakhat hiangah Jehu in amahte veksen in rek berh i; minung sawmli le pahnih i ai pakhat khai tang loin rek berh i.

A Tangmi Ahab Songkhatte Rek I

¹⁵ Jehu tu feh lala ai lam lakah Rechab ai fapa Jonadab in hmuak i. Jehu in hnuksat ai a hnenah, “Kaimah in na ṭan bangin na thinlung tak in i ṭan aw sim?” ti i. “Na ṭan ing,” tiin ani in ti i. Ciafangin Jehu in, “Ciatih ilekhaw na kut i san tu,” ti i. A kut san ai Jehu in siphuhleng vumah duk i.

¹⁶ Cen Jehu in, “Kaimah hnenah kawi tulai Bawipa caah zaitlukin zuam ing, ti khiah nangmah hlanlam in hmu leh tuh isi,” ti i. Ciatihin Samaria khuapui ah feh i.

¹⁷ A hleng tlang fangin Ahab ai songkhatte tu Jehu in rek berh i; pakhat khai zuah lo i. Bawipa in Elijah hnenah a relhnak heh khim sio i.

Baal Biatute Rek I

¹⁸ Jehu in Samaria mite tu hmunkhat ah ko khawm ai anite hnenah, “Kumpibawi Ahab in Baal khuavang ai na ruaih heh tlawmniu lek awng i. Kai incen a roh ngai in ruaih tuh ing.

¹⁹ Baal prophette, amah biatute le suangbawite, amahte veksen in kokhawm tu sio ih. Kawi thil tuh lo ing, a titu aisu khai um maseh; zaimantifangin Baal khuavang hnenah hibawlhnak lianpui bawn tuhai a tel lotu ciah rekhnak tuar tuh i,” ti i. (Baal biatute rek nuam sio in hetihin a zawlhnak i).

²⁰ Cen Jehu in, “Baal upathnak ah le amah biahnak ah cawlum nia bawn tu ih,” tiin thupe i. A tihnak bangin bawn tlang ai,

²¹ Jehu in, Israel ram song pumpuhluk ah thuthan sio i. Baal biatute hmuahhmuah heh kawi tlang sio i; a kawi lomi aisu khai um lo i. A veksen in Baal biakinn songah lut tlang ai kefot hmun khai lawng loin dim sio i.

²² Cen Jehu in korfual kiltu suangbawi hnenah, “Korfualte suah tu,” tiin thupe i. Ani in suah ai Baal a biatute hnenah pe i.

²³ Cia hnuaah Jehu le Rechab ai fapa Jonadab tu biakinn songah lut kawm ai Jehu in anite hnenah, “Ralring tu ih; he biakinn songah Bawipa a biatu aisu khai tel thil tuh lo i si; Baal a biatu lek tel tuhhnak i,” ti i.

²⁴ Cen Jehu le Jonadab heh hibawlhnak le maitai hibawlhnak sel tuhin lut kawm i. Biakinn pualam ah ralkapte sawmriat dah zo ai anite hnenah, “Hemite heh rek tuh sek i si; hemite pakhatkhat a luatruaitu heh amah ai nunhnak in kuan tuh i,” tiin thu hlup zo i.

²⁵ Jehu in hibawlhnak a sel ben sawng fangin, biakinn kiltu ralkap le bawite hnenah tu, “Lut tlang tu ilai rek tusek ih; aisu khai luat maseh,” tiin ti i. Anite tu ralvang phok cia in lut tlang ai amahte veksen in rek berh ai a thi mite luang tu biakinn pualam ah duk tlang i. Cia hnuaah biakinn songta khan ah lut tlang ai,

²⁶ ciata ai Baal milimte heh lang ai mai in tai sek i.

²⁷ Ciatihin Baal biakinn le Baal khanlungte khai siatsuah sek ai buruk in hmang ai tunnia tianin hmang lai i.

²⁸ Ciatihin Jehu in Israel ram songai Baal biahnak heh bal sek i.

²⁹ Ikhalselai Israel a hoisualtu kumpibawi Jeroboam ai sualhnak tu bawn ve thotho i; Bethel le Dan ah kawlpawcang lim bia tlang ai ciami sualhnak heh nungruai ngio i.

³⁰ Cen Bawipa in Jehu hnenah, “Ahab ai tesinfate vumah bawn tuhin i daihsahhnak heh bawn sio isi. Ciamanin na tesinfate khiah san lihnak tian Israel kumpibawi cang tuh i, tiin thu ning kham ing,” tiin ti i.

³¹ Ikhalselai Jehu in Bawipa, Israel mite ai Pathian dan heh a thinlung veksen in hlun lo i; Israel a hoisualtu Jeroboam lampui heh zam thil lo i.

³² Ciami can ah Bawipa in Israel ram tu fipruai betbo ihang. Syria kumpibawi Hazael in Israel ram,

³³ Jordan ai nisuah lam hmuahhmuah, Arnon Runpui kamai umhnak Aroer khuapui hlang lamah lang sio i. Hemi a langhnak songah Gad hin, Reuben hin le Manasseh hinte umhnak Gilead le Bashan ramte tel sio i.

Jehu Thihnak

³⁴ Jehu ai bawnhnak, ral pha ai a perhnak dangdangte tu Israel Kumpibawite Ai Tluanthu Laibu songah ngan sio i.

³⁵ Jehu tu thi ai Samaria ah phum tlang i. A fapa Jehoahaz in a tumrul in kumpibawi cang i.

³⁶ Jehu in Israel ram heh Samaria in kum kulhluan riat song uk i.