2 Sansiarnak 8 - Zanniat Bible

Solomon Ai Hlehsuahhnak

¹ Solomon in Biakinn le a kumpibawi inn sa ai kum kul rai i.

² Kumpibawi Hiram ai pehnak khuapuite khai tungding leh ai ciami khuapui songah Israel mite umruai i.

³ Hamath le Zobah ram khai lang ai,

⁴ nelrawn ai umhnak Jadmor khuapui khai vingpui in kulh sio i. Hamath ramai khuapuite khai saleh sio ai rong dahhnak tuhin bawn i.

⁵ Solomon ai salehhnak khuapuite tu: Beth Horon Sakta le Beth Horon Hlangta, a pahnih in vingpui in kulhhnak i ai a kotkate tu kham ai a kalh thil pawl i.

⁶ Baalath khuapui, rong dahhnak khuapui hmuahhmuah le a siphuh le a siphuhlengte dahhnak khuapuite i. Jerusalem khua le Lebanon le a ukhnak ram songah inn sa tuhin a tumhnak hmuahhmuah heh a daih bangin sa ben sio i.

^7-8 Israel mite in Canaan ram a lang awng fangin amahte rek lomi Canaan mite ai tesinfate tu a napertu i. Khengkhebel ai naper a perruai mite tu Hit mi, Amor mi Perizz mi, Hiv mi le Jebus mite i ai anite ai tesinfate tu tunnia tianin sal cang tlang i.

⁹ Israel mite khiah sal bangin naper a perruai mi aisu khai um lo i. Anite tu ralkapte, a kuthnia tlangsuakte, siphuhleng ralkap le siphuhleng ralkap hotute i.

¹⁰ Inn sa napertute siktu tuhin kumpibawi Solomon kuthnia ah hotu bawite zahnih le sawmnga um i.

¹¹ Solomon in nupui, Egypt kumpibawi ai fanu tu David khuapui tihnak Jerusalem khua hlun in amah ca sahnak inn ah thawnruai i. Solomon in, “I nupui tu Israel kumpibawi David ai inn ah um tuhhnak ilo i, zaimantifangin Thutiam Kuang a hlenghnak cangcang khiah a thianghlim i,” tiin ti i.

¹² Cen Solomon in Biakinn hmai ai a tianghnak puleng ah Bawipa hnenah hibawlhnak sel i.

¹³ Moses dan songai a um bangin puai nia cang fangin maitai hibawlhnak sel ṭiode i. Ciami puaite tu Sabbath nia, Hla Thar Puai kum cang fangin bawnhnak Col tello Sang Puai, Rongthar Puai le Ponhlam Puai i.

¹⁴ A pa David in hlun tuhhnak dante a bawn awng zo bangin suangbawite le lasahnak thawn suangbawite a bawmtu Levi mite tu nisiar in a naper tuhhnak heh ruat sah cia i. Ciabang thotho in Pathian ai minung David ai thupehnak bangin Biakinn kiltute khai kotka a naperhnak hmun ṭen ah nisiar amahte bawn tuhhnak bawn sah cia sio i.

¹⁵ David in thilri dahhnak innte thula ah suangbawi le Levi mite a cah awnghnak bangin zaizongza heh bawn sio i.

¹⁶ Solomon ai tumtekhnak hmuahhmuah khim sio i. Bawipa Biakinn sa a hampan nia in a ben tian, a naperhnak hmuahhmuah a semkhim lohnak zaikhai um lo i.

¹⁷ Cen Solomon tu Edom ram, Agaba Runpui kamai khuapuite pahnih Eziongeber le Elath ah feh i.

¹⁸ Kumpibawi Hiram in tangphawlawngte kuat ai, tangphawlawngte uktu bawite le a mawngtu ṭio minungte thawn kuat awng i. Solomon kuthnia ai tlangsuakte thawn Ophir ramah feh tlang ai Solomon ca tuhin sui pawng thawng thum phurh i.