2 Sansiarnak 36 - Zanniat Bible

Judah Kumpibawi Joahaz

¹ Judah mite in Josiah ai fapa Joahaz tu kumpibawi tuhin ril tlang ai Jerusalem khua ah thaupawh tlang i.

² Joahaz tu Judah kumpibawi a cang fangin kum kul hluanthum i ai Jerusalem an hla thum song uk i.

³ Egypt kumpibawi Neko in pom ai thawngtoh i; cen Judah mi in Neko heh ngun pawng za sarih le sawmnga, le sui pawng sawmsarih le pawng nga siahkhon tuhin pe i.

⁴ Neko in Joahaz unau Eliakim heh Judah kumpibawi tuhin bawn ai a hming Jehoiakim tiin thleng i. Joahaz tu Neko in Egypt ramah fehpui i.

Judah Kumpibawi Jehoiakim

⁵ Jehoiakim tu Judah kumpibawi a cang fangin kum kul hluannga khim ai Jerusalem an kum hlaikhat song uk i. Bawipa Pathian hmaiah thil sual bawn i.

⁶ Babylon Kumpibawi Nebuchadnezzar in Judah ram sim ai Jehoiakim heh pom ai thir cikcin in khit ai Babylon ah fehpui i.

⁷ Nebuchadnezzar in Bawipa ai Biakinn thilri mankhung pawl hrekkhatte lang ai Babylon a kumpibawi inn ah dah i.

⁸ Jehoiakim ai bawnhnak hmuahhmuah, ningdulkul thil a bawnhnak heh a sualhnakte tianin, Israel Le Judah Kumpibawite Tluanthu Laibu songah ngan i. A fapa Jehoiachin in a tumrul in kumpibawi cang i.

Judah Kumpibawi Jehoiachin

⁹ Jehoiachin tu kum hlairiat a khim fangin Judah kumpibawi cang ai Jerusalem an hla thum le ni hra song uk i. Ani khai Bawipa ai hmaiah sual i.

¹⁰ Khuasik bo ai khua a khal fangin kumpibawi Nebuchadnezzar in pom ai Babylon ah fehpui i. Bawipa ai Biakinn thilri mankhung pawl khai phur sek i. Cen Nebuchadnezzar in Jehoiachin ai unau Zedekiah heh Judah le Jerusalem kumpibawi tuhin bawn i.

Judah Kumpibawi Zedekiah

¹¹ Zedekiah tu Judah kumpibawi a cang fangin kum kul hluankhat i ai Jerusalem an kum hlaikhat song uk i.

¹² Bawipa ai hmaiah sualhnak bawn i; Bawipa ai thu a phuangtu prophet Jeremiah ai thurelhnak ngai nuam lo i.

Jerusalem Khuapui Langhnak

¹³ Zedekiah tu kumpibawi Nebuchadnezzar tawng tuhin raltho i. Ciafangin Nebuchadnezzar a kuthnia ah um tuhin Pathian hming sal in thukhamruai i. Zedekiah in Bawipa Israel ai Pathian hnenah sualsir in Pathian hnenah let tuhin tum hrimhrim lo i.

¹⁴ Ciahlaiah Judah mi hotute, suangbawi le mizapui khai a hiangai umtu miphunte ai sualhnak keniah hlun tlang ai sual tlang i. Ciatihin Bawipa amah rori in a thianghlimruaihnak Biakinn heh ningrimtiar i.

¹⁵ Bawipa, amahte pupate ai Pathian in a minungte le a Biakinn heh a zuah nuam manin amahte hnenah ralringhnak pe tuhin catloin prophette hlat i.

¹⁶ Ikhalselai Pathian ai hlathnak a nalangte le prophette heh zohsuam i; hnihsan menma ai zaikhai siar tlang lo i. A tawphnak ah amahte vumah Bawipa a thinrawhnak tu a luar ze hang ai amahte luathnak tuh lampui um nawn lo i.

¹⁷ Bawipa in Babylon kumpibawi hlat ai Judah minote heh Biakinn songah khai rek i; aisu bang vum ahkhai ninghiohnak nai lo i; mino ituseh, upa ituseh, nupang pasal tilo in, a urmi le a cakmi khai amahte veksen in a kut songah Bawipa in pe sio i.

¹⁸ Babylon Kumpibawi in Bawipa ai Biakinn sim ai thilri le sumsaw, kumpibawi le a kuthnia ai tlangsuakte thilri mankhung hmuahhmuah lang ai Babylon ah phur sek i.

¹⁹ Jerusalem khuapui le Bawipa ai Biakinn, kumpibawi innpui le a songai thilrite khai mai in tai sek i.

²⁰ Ralvang ai rek ngah lomi, a tanglaitute heh Babylon ah fehpui sek ai ciata ah, Persia ukhnak a hleng hlanlo, Babylon Kumpibawi le a tefate ai sal ah cang tlang i.

²¹ Ciatihin prophet Jeremiah hmang in Bawipa ai a relsong cia, “Amahte in a ul tlang lohnak Sabbath cawlumhnak khimruai tuhin amahte ram kum sawmsarih song dapkhing in um tuh i,” a tihnak thu a khimhnak i.

Cyrus In Judah Mite Letruai I

²² Persia Kumpimangbawi Cyrus in kumpimangbawi a cang kum khathnak ah Bawipa ai ruaihnak bangin lai ngan ai a uk song khuahacang ah siar tuhin kuat i. Hemi tu prophet Jeremiah hmangin Bawipa ai thurelhnak a khim tuhin i. A thusuahhnak tu hetihin ngan i:

²³ “Hemi tu Persia Kumpimangbawi Cyrus thusuahhnak i. Bawipa van ai Pathian in laivum pumpuhluk uktu tuhin i bawn ai Judah ram Jerusalem khua ah amah caah Biakinn sa tuhin thu i pe i. Ciamanin ningmah Pathian minung hmuahhmuah ciata ah feh tlang tu sio ih; Bawipa ning Pathian tu ning hnenah um tu hram seh,” tiin ngan i.