2 Sansiarnak 34 - Zanniat Bible

Judah Kumpibawi Josiah

¹ Josiah tu Judah kumpibawi a cang fangin a kum kum riat i ai Jerusalem an kum sawmthum le kum khat song uk i.

² Bawipa ai hmaiah thilpha bawn ai Bawipa lungawiruai i. A pupa David kumpibawi hnua hlun ai Pathian ai thupehnak hmuahhmuah fel ngai in hlun i.

Josiah In Hi Le Rai Biahnak Lon I

³ Josiah tu kumpibawi a cang a kum riathnak, mino lai ai panin a pupa David ai Pathian bia hampan awng i. Kum li hnuaah khuavang bia hmunte, Asherah khuazingnu ai limte le a dang milimte heh bal sek i.

⁴ A thupehnak bangin a minungte in Baal biahnak hrang pulengte heh bal sek i; a hiangai rimhmui taihnak pulengte sep sek ai Asherah khuazingnu ai limte le a dang milimte heh a vut in rial sek hnuaah a vut heh hibawlhnak a sel awngtute ai hlanmual ah phulh dekdo i.

⁵ Khuavang suangbawite ai ruhte tu amahte khuasia biahnak puleng vumah tai ai ciatihin Judah le Jerusalem tu Josiah in cianghlimruai leh i.

⁶ Manasseh ram, Epharaim ram le Simeon ramsong hmuncang le khua cangcang ah, sak lamah Naphtali tianin ciabang thotho in bawn i.

⁷ Sak lam ramsong khuahacang ah pulengte bal leh i, Asherah limte vawng sek i, milimte a vut in rial sio ai rimhmui taihnak pulengte seu sek i. Cia hnuaah Jerusalem ah let i.

Dan Laibu Hmu Tlang I

⁸ Kumpibawi Josiah in Judah ram a ukhnak kum hlairiathnak kum, a ramsong le Bawipa ai Biakinn song khuavang biahnak a cianghlimruai hnuaah, Josiah tu Bawipa Pathian ai Biakinn remm tuhin mite pathum: Azaliah ai fapa Shaphan, Jerusalem uktu bawi Maasaiah le Joahaz ai fapa Joah ṭuanvo pe i.

⁹ Levi mi Biakinn kiltute in Epharaim mi, Manasseh mi, Sak lam ram mite, Judah mi, Benjamin mi le Jerusalem khuasong mite hnenin Biakinn ah paisa amahte kenghnak Suangbawi Sang Hilkiah hnenah fehpui i.

¹⁰ Ciami paisa tu Biakinn remmhnak lamai naper hotute hnenah pe ai,

¹¹ inn satu le zungthiamte hnenah hlawh man pe tlang ai ciahlaiah lungto laihnak le Judah kumpibawite ngulsul manin a hnawmhnak innte remmhnak hrangah thingte laihnak tuhin hmang i.

¹² Ciami napertute tu mifel ngai le rinsantlak pawl i. Amahte hotute tu mite pali: Levi mi Merari hin Jahath le Obadiah, Levi mi Kohath hin Zechariah le Meshullam i. Levi mite tu a veksen in la sa thiam ciang i.

¹³ A dang Levi mite in thilri phurtute ho tlang ai napertu dangdang siktute khai i; a dang Levi mite tu laingantu, cazi le dawngkham kiltute i.

¹⁴ Thilri dahhnak khan in paisa a suah laiah Hilkiah in Moses hnenah Pathian pehnak dan, Bawipa ai dan laibu khul ngah i.

¹⁵ Ciafangin Hilkiah in, “Hemi Biakinn songah Dan laibu khul ing,” tiin Shaphan hnenah rel i. Hilkiah in ciami laibu heh Shaphan hnenah pe ai,

¹⁶ Shaphan inkhai kumpibawi hnenah koih i. Shaphan in kumpibawi hnenah, “Na thupehnak bangin zaizongza bawn zo sio i ing.

¹⁷ Biakinn songai dahhnak paisa khai suah tlang ai napertute le amahte hotute hnenah pe i ing,” ti i.

¹⁸ “Cen heta ah Hilkiah ai i pehnak laibu um i,” tiin ti i. Cen kumpibawi hnenah cawm ngai in siar i.

¹⁹ Ciami heh kumpibawi in a za fangin a lungsia in a hnikpon zik i.

²⁰ Cen Suangbawi Sang Hilkiah, Shaphan ai fapa Ahikam, Mikaiah ai fapa Abdon, laingantu Shaphan le kumpibawi kiltu Asaiah ko ai anite hnenah hetihin thupe i,

²¹ “Feh tlang tu ilai kaimah le Israel le Judah ram songai a tanglaimi minungte caah Bawipa zawt tu ih. Hemi laibu ai zirhhnak heh fel ngai in ling tek tu ih. Hemi laibu ai bawn tuh a tihnak kin pupate in bawn awng lo ai Pathian ai thu ngai tlang lo manin kin vumah Pathian a thinraw i,” tiin ti i.

²² Kumpibawi thupehnak bangin Hilkiah le a rualpuite tu Jerusalem khuathar ai a ummi nupang prophet Huldah tihnak tawk tuhin feh tlang i. Hasrah ai tupa, Tikvah ai fapa Shallum heh Huldah ai pasal i ai Biakinn hnikponte kilkhawltu i. Cen anite ai tawkhnak thula heh Huldah hnenah rel i.

²³ Ciafangin Huldah in, “Kumpibawi hnenah let tlang tu ilai,

²⁴ Bawipa in, ‘Kumpibawi hnenai na siarhnak laibu songai nganhnak thusia cukcamhnak bangin Jerusalem le mizapui heh cawh tuh ing.

²⁵ Kaimah i hnawl tlang ai a dang khuavangte hnenah hibawlhnak pe tlang i; hetihin a bawnhnak manin amahte vumah thin i raw i. Jerusalem vumah i thinrawhnak tu dap tuh lo i.

²⁶ Kumpibawi amah caah Bawipa, Israel ai Pathian Kaimah in hetihin rel ing: Hemi laibu songai nganhnak thu na ngai ai,

²⁷ Jerusalem le a minungte i cawh tuhhnak thu na za fangin na hnikpon zik in kap hnelhno in sir lehsal ai na thinlung nem leh manin na sawngenhnak ngai sah zo ing.

²⁸ Jerusalem i cawhhnak tu hmu man tuh lo isi. Dapniu in na can boruai tuh ing,’ ti i ti tu ih,” tiin rel i. Ciami thu thawn Hilkiah le a rualpuite tu kumpibawi Josiah hnenah let tlang i.

Bawipa Ai Thu Hlun Tuhin Thukham I

²⁹ Ciafangin kumpibawi Josiah in Judah le Jerusalem hotute ko tlang ai,

³⁰ hmunkhat ah suangbawite, Levi mite le Jerusalem khuasong mite thawn mifarah milian ti loin Biakinn ah amahte veksen in feh tlang i. Biakinn songai amahte hmuhnak thukham laibu heh a veksen in cawm ngai in amahte hmaiah kumpibawi in siar i.

³¹ Cen Josiah tu a kumpibawi khuam hiangah ding ai ciami laibu songai a umhnak bangin, thukhamhnak songai thutiamhnakte bawnsuak tuhin ituseh, Bawipa thukham heh a thinlung le a thazang veksen in hlun tuhin le Bawipa ai thu ngai tuhin Bawipa hnenah thukhamhnak bawn i.

³² Ciami thutiam hlun tuhin Jerusalem ah a ummi zongzong le Benjamin mite thutiamhnak bawnruai i. Ciatihin Jerusalem mite in amahte pupate ai Pathian hnenah a thukham thutiamhnak hmuahhmuah heh hlun tlang i.

³³ Cen kumpibawi Josiah in Israel ram songai a umhnak ningdulkul milimte tu siatsuah sek i. A nun songah mizapui in a pupate ai Pathian Bawipa hlunhnak khiah pialsan nawn lo i.