2 Sansiarnak 32 - Zanniat Bible

Assyria Mite In Jerusalem Lang Tumhnak

¹ Hezekiah in Bawipa rinsan in ruaih ai hebang thilte a bawn hnuaah, Assyria Kumpimangbawi Sennacherib in Judah ram tawng i; ving ai kulhhnak khua tampui kulh ai a ralkapte heh khua kulhhnak lungdawlte siatsuah tuh sek in thupe i.

² Senacherib in Jerusalem khuapui khai tawng tum i, ti khiah Hezekiah in a hmu fangin,

^3-4 Assyria ralkapte Jerusalem a hleng ita inkhai ti ding tuh nai tlang maseh, tiin kumpibawi Hezekiah le a kuthnia ai tlangsuakte in khuapui pua ai a umhnak a tihnarte khiah phit tum sio i. Bawite ho in khuasong mi tampui suak tlang ai tihnar ti hmuahhmuah pit tlang sio i; ciamanin ti zaikhai luang lo ihang.

⁵ Cen kumpibawi in raltawng a ṭanghmun khiah pha amam in bawn i; khuapui kulhhnak ving remm i; a vumah ralvilhnak inndonsang sa i; khuapui kulhhnak pualam ving khai tiang i. Jerusalem khua hlun nisuah lamai umhnak raltawng ṭanghnak hrangah a sahnakte khai remm i. Faipui le lum tampui bawn i.

⁶ Jerusalem khuasong mi pasal hmuahhmuah heh ralbawite horuai i; khuapui kotka hiang muallai ah a veksen pumkhawmruai ai a hnenah forhhnak thu rel i.

⁷ “Hat ngai le ralpha ngai in um tu ih; ning thin khai nau maseh. Assyria Kumpimangbawi ituseh, a hohnak ralkapte ituseh, lau mah ih. Amahte lamai ṭangtu tahin kin lamai ṭangtu hat sawn i.

⁸ Anite naihnak tu minung hathnak lek i; ikhalselai kin incen kin bawmtu le kin caah tawngtu tuhin Bawipa kin Pathian nai tlang ising,” tiin ti i. Ciami thu a za tlang fangin mizapui tu tha tho ngai i.

⁹ Cia hnuaah Senacherib le a ralbawite tu Lakhish ai um laitak ah Jerusalem khua ai a ummi kumpibawi Hezekiah le Judah mite hnenah Sennacherib in mi hlat ai hetihin thucah i:

¹⁰ “Assyria Kumpimangbawi kaimah Sennacherib ai thucahhnak heh ruat tu ih: Judah mite, ziang ning rinsan manin ral ai kulhhnak Jerusalem khua songah um i si?

¹¹ ‘Assyria Kumpimangbawi kut song hleng tuh loin Bawipa kin Pathian in kin humhim tuh i,’ tiin Hezekiah in ning rel i; ikhalselai ning zawl i; rong lo le ti loin ning thi tlang tuh i.

¹² Bawipa Pathian biahnak hmunte le pulengte a baltu sek heh amah Hezekiah i ai Judah le Jerusalem tu puleng pakhat lek ah Pathian bia tuhin le rimhmui tai tuhin ning ruaitu heh amah thotho i.

¹³ Mi phundang le ramdangte vumah kin pupate in ituseh, kaimah in ituseh, kin thil bawnhnak tepawl ling sio zo lo i sim? Aisu ai pathiante tal in amahte minungte Assyria Kumpimangbawi kaimah kut song hleng tuh loin humhim ben awng aw im?

¹⁴ Zaifang talah hemi kin siatsuahhnak miphunte ai pathiante in amahte ram heh kin kut in osuak awng aw im? ‘Kin Pathian in kin hup tuh i,’ tiin ning bul in akontih in sang thil i si?

¹⁵ Hezekiah zawlhnak le hoisualhnak cang duh mah ih, a sang khai sang tlang mah ih. Zaibang miphun ai pathiante inkhai amahte miphun heh Assyria Kumpimangbawi kut in hup ben awng kel lo i. Ningmah ai pathian amam tu ning hup ben tuh lo i!” ti i.

¹⁶ Sennacherib hlathnak palaite in Bawipa Pathian le a cengfa Hezekiah a zohsuamhnak heh hemi tahin roh deuh in a ponghnak um lai i.

¹⁷ Ciahlaiah Assyria Kumpimangbawi in Israel ai Pathian zohsuam nautathnak ah lai hetihin ngan i: “Miphun dangdang ai khuavangte in a minungte heh i hathnak kut songin o ben tlang awng lo i; Hezekiah ai Pathian inkhai a minungte tu i kut songin o ben tuh cuang lo i,” ti i.

¹⁸ Jerusalem khuapui kulhhnak vingpui vumah a ummi Jerusalem mite hring nuam in le hnaihnok nuam in ciami palaite in Hebrew in cawm ngai in au tlang dekdo i.

¹⁹ Minung kut ai bawnfawmhnak miphundang ai khuavangte ai thula a rel tlang bangin Jerusalem ai Pathian thula khai rel tlang ve i.

²⁰ Ciafangin kumpibawi Hezekiah le Amoz ai fapa prophet Isaiah in sawngen ai bawmhnak ngen in Pathian hnenah au i.

²¹ Bawipa in vancungmi pakhat hlat ai ciami vancungmi in ralpha ngai Assyria ralkapte le ralbawite heh amahte riahbuk ah rek berh i. Ciamanin Assyria Kumpimangbawi tu zakthi le mithmai sia in a ramah tlung i. Cen a khuavang biahnak inn a lut fangin a fapate hrekkhat in vang in dawt ai thi i.

²² Ciatihin Bawipa in kumpibawi Hezekiah le Jerusalem khua mite tu Assyria Kumpimangbawi Sennacherib le a ral dangte kut in hup i. Bawipa in a ram khuahacang ah daphnak umruai i.

²³ Jerusalem khua ah mi tampui kawi tlang ai Bawipa hnenah hibawlhnak le Hezekiah caah lehsawng tampui koih tlang i; ciami ai panin Hezekiah tu miphundang hmuahhmuah in upat ngai ihang.

Hezekiah Urhnak Le Hngalhnak

²⁴ Ciami can ah Hezekiah tu thidawn in ur i. Bawipa hnenah sawngen ai Bawipa in a sawngenhnak sang sah ai cak leh tuh i tiin hnikhnaihhnak pe i.

²⁵ Ikhalselai Hezekiah tu hngal ze ai Bawipa in a vumah thil pha a bawnhnak hrangah anghnak zaikhai larruai lo i; ciamanin Judah le Jerusalem mite vumah Bawipa a thinraw i.

²⁶ Ikhalselai Hezekiah le Jerusalem mite tu lungnem leh manin Hezekiah nunsong ah Bawipa ai cawhhnak zaikhai tawk lo i.

Hezekiah Lianhnak Le Songlawihnak

²⁷ Hezekiah tu milian ngai i ai mi zongzong in upathnak pe tlang i. A sui le a ngun, lungmankhung le rimhmui, lum le a dang thilri mankhung pawl dahhnak tuhin inn tampui sa bial i.

²⁸ Ciahlaiah a naihnak rong le cabitti le olive thau dahhnak tuhin innte sa i; a kawlpaw dahhnak tuhin kawlpaw inn sa ai a tuu dahhnak tuhin tuu khawk sa i.

²⁹ Ciahlaiah Pathian in kawlpaw le tuu tampui pe ai sumsaw dangdang khai tampui pe manin khua tampui sa i.

³⁰ Gihon tihnar luanghnak kham ai laihnia in Jerusalem kulhhnak ving ai songlam tian ti luang thai in a bawntu khai amah kumpibawi Hezekiah i. A thil bawnhnak hmuahhmuah ah Hezekiah tu hlawhtlinghnak nai i.

³¹ A thinlung le a ziaza ling nuam in Pathian in Hezekiah heh a nuamnuam in tlanglengruai i; cialak ahkhai a ram songah mangbangkul thil a canghnakte zong tuhin Babylon kumpibawi in a palaite hlat awng i.

Hezekiah Ukhnak Bo I

³² Kumpibawi Hezekiah in a bawnhnak dangdang le Bawipa hnenah rinsanhnak thawn a perhnak dangte tu Amoz Ai Fapa Prophet Isaiah Thular Hmuhnak Laibu le Judah le Israel Kumpibawite Tluanthu Laibu songah ngan i.

³³ Hezekiah tu thi ai kumpibawi hlanmual vumta lamah phum tlang i. A thi fangin Judah mi le Jerusalem khuami hmuahhmuah in upathnak pe tlang i. A fapa Manasseh in a tumrul in kumpibawi tuhin sawng i.