2 Sansiarnak 31 - Zanniat Bible

Hezekiah In Dan Tharthawh I

¹ Amahte puai bawnhnak a ben tlang fangin Israel mite hmuahhmuah a veksen in Judah ramsong khuahacang ah feh tlang ai lungbir cianghlim pawl seu tlang i, khuazingnu Asherah ca tihnak thingbir cianghlim pawl vawng tlang ai puleng le amahte khuavang biahnak hmunte bal tlang sio i. Judah ram lek ah zolo in Epharaim ram, Benjamin ram le Manasseh ram ahkhai ciatih bangin bawn tlang ai cia hnuaah amahte inn ṭen ah tlung i.

² Kumpibawi Hezekiah in suangbawite le Levi mite pawlkom heh a thar in dinsuak leh ai ciatihin suangbawi le Levi mite in ṭuanvo nai tlang ṭen liang i. Amahte ṭuanvo tu maitai hibawlhnak, rualrem hibawlhnak le Biakinn song Pathian biahnak ah tel tuh le Biakinn song a khan cangah Pathian thangphat le Pathian hnenah anghnak thurel khai i.

³ Zing lam le zan lamai maitai hibawlhnak hrangah le Sabbath nia le Hla Thar Puai hrangah ituseh, Bawipa ai dan pehnak bangin bawn tuh a kulhnak puai dangdang hrangah ituseh, kumpibawi Hezekiah in a kawlpawrual le a tuurual songin sumhnam tampui pe i.

⁴ Ciahlaiah Bawipa ai dan bangin suangbawi le Levi mite in amahte tikcucan nai zah pethilhnak tuhin mizapui in amahte hibawl covo naihnak sel tuh ve in kumpibawi in Jerusalem khua mite hnenah thupe i.

⁵ Kumpibawi ai thupehnak a ling sawng fangin Israel mite in lehsawng kenghnak amahte naihnak lakah a pha ber pawl sangvut, cabitti, olive thau, khoitizu le amahte lo songin a suakhnak dangdang khai pe tlang i; cen amahte naihnak hmuahhmuah songin sawm ah pakhat khai pe tlang i.

⁶ Judah khuate ai a ummi zongzong in, Israel mite ituseh, Judah mi ituseh, amahte kawlpaw le tuute sawm ah pakhat pe tlang i; Ciahlaiah Bawipa hnenah a pe cia thilri cianghlim songin sawm ah pakhat pe tlang fawn i. Amahte pehnak tu hmunkhat ah pum tlang bial i.

⁷ Hla thumhnak hla in lehsawng pe pan tlang ai hla sarihhnak hla tian catloin pe tlang i.

⁸ Kumpibawi Hezekiah le a kuthnia tlangsuakte in ciatihin a pum bial tianin pehnak lehsawng a hmu fangin Bawipa thangphat tlang ai Israel mite caah hmuifu ngen sah i.

⁹ Ciami lehsawng thu heh kumpibawi in suangbawi le Levi mite hnenah a zawt fangin,

¹⁰ Zadok ai tesinfa Suangbawi Sang Azariah in, “Bawipa Biakinn ai lehsawng keng tlang ai panin aih din tuh tu a khim ngai in nai ai a hlaihnak khai hetlukin tam i. Bawipa in a minungte hmuifu a pe manin hetluk tam in nai tlang i,” tiin ti i.

¹¹ Ciafangin Bawipa ai Biakinn nak ai thil dahhnak khante sa tuhin kumpibawi in thupe i;

¹² a thupehnak bangin bawn tlang ai mizapui ai pehnak thawhhlawm, lehsawng le sawm ah pakhat tu ciata ah fel ngai in dah tlang i. Levi mi Konaniah tu a kiltu ah dah ai a unau Shimei tu a sangtu ah dah i.

¹³ Amahte kuthnia ah napertu tuhin Levi mite pahra dah ai Jehiel, Azaziah, Nahath, Asahel, Jerimoth, Jozabad, Eliel, Ismachiah, Mahath, Benaiah i. Hemi a dahhnak tepawl tu kumpibawi Hezekiah le suangbawi Sang Azariah thupehnak bangin dahhnak i.

¹⁴ Biakinn nisuah lam kotka kiltu Levi mi Immah ai fapa Kore tu Bawipa hnenai amahte koihhnak lehsawng a dongtu le zemtu i.

¹⁵ Suangbawi umhnak khua dang ah ciami ṭuanvo heh Levi mi amah bawmtute in bawn tlang i; a bawmtute tu Eden, Miniamin, Jeshua, Shemaiah le Amariah le Shekaniah i. A ṭuanvo naihnak sik in amahte unau Levi mite hnenah a tam a tlawm sik in a bang ṭen in zem tlang i.

¹⁶ Ciami hin khiami hin, tiin zem dun tlang lo i. Biakinn ai ṭuanvo nai pasal kum sawmthum le a vum lam hmuahhmuah amahte bawndan hlun in zem tlang ṭen i.

¹⁷ Suangbawite tu amahte hin ṭen in ṭuanvo nai tlang i; Levi mi pasal kum kul le a vum lam tepawl tu a burbur in na ruaih nai i.

¹⁸ Amahte ṭuanvo songlawi heh zaikom can ahkhai a bawntu tuh imanin a nupui, faniute, fanu le fapate thawn siarcih sio i.

¹⁹ Aaron ai tesinfa khua songai a um mite suangbawite, ihlahle khua hiangai sumhnam lailenghnak ram songai a ummi suangbawite lakah ṭuanvo naitu pasalte um ai anite in suangbawi songkhat hmuahhmuah amahte covo ṭen zem tlang i.

²⁰ Judah ram song hmuahhmuah ah Kumpibawi Hezekiah in Bawipa a Pathian ai anghnak thil dik bawn i.

²¹ Biakinn hrang naperhnak ah ituseh, Dan thu hlunhnak ah ituseh, Thinlung takniu in Bawipa hnenah a pe dun manin hlawhtling i.