2 Sansiarnak 30 - Zanniat Bible

Kansuak Puai Paiciahnak

^1-3 Hla khathnak hla ahcen a cianghlimmi suangbawi a khimniu in um lai lo ai mizapui khai a khimniu in Jerusalem hleng tlang thil lai lo manin a cancan ah Kansuak Puai bawn thil tlang lai lo i. Ciamanin kumpibawi Hezekiah le a kuthnia ai tlangsuakte le Jerusalem mite in hla hnihhnak hla ah bawn tlang tuhin lungkhim tlang i. Ciami puai ah kawi thil tuhin Israel mite le Judah mite hmuahhmuah heh kumpibawi in sawm i. Epharaim mi le Manasseh mite hnenah lai ngan ai Israel ai Pathian Bawipa ai hmingthanghnak hrangah Jerusalem ai Biakinn ah Kansuak Puai sim tlang tuhin a tumce in sawmhnak lai kuat i.

^4-5 Sak lam ah Dan in hlang lamah Beersheba tian, Israel mite hmuahhmuah sawm ai kum dang tahin Jerusalem ah mi tam deuh ngaingai in kawi tlang ai Dan bangin Kansuak Puai bawn tuhin tawlrel tlang manin kumpibawi le mizapuite tu aipuang ngai i.

⁶ Kumpibawi le a kuthnia ai tlangsuakte ai thupehnak bangin Judah ram le Israel ram songah mi hlat tlang ai sawmhnak lai khiah hetihin ngan i: “Israel mite u le naute, Assyria mite in kin ram heh neh napui ning tu ning luat i. Tun tu Abraham ai Pathian, Isaac ai Pathian le Jacob ai Pathian Bawipa hnenah let tlang tu ilai, amah khai ning hnenah let tuh ve i.

⁷ Bawipa a Pathian hmaiah rinsantlak loin a um tlang awngtu ning pupate le Israel mite bangin um nawn man ih. Ning linghnak bangin anite tu Bawipa in a roh ngai in cawh awng i.

⁸ Anite bangin ning lung ruh maseh; Bawipa ai thu tu hlun tlang tu sawn ih. Ning vumah Bawipa heh a thinraw tuh nawn loin Bawipa ning Pathian in kumzangza in a thianghlim tuhin a bawnhnak Jerusalem Biakinn ah kawi in Amah bia tu ih.

⁹ Bawipa hnenah let le i sikhaw ning unau songkhatte fehpui in thawng a tohtute inkhai amahte vumah ninghio ngaihharhnak naitu i ai Amah hnenah let le i sikhaw ning cosang tuh i,” tiin ti i.

¹⁰ Cen a thuphurtute tu Epharaim le Manasseh ram songai khua cangcang ah feh ai sak lam ber Zebulun ram tian hleng tlang i; ikhalselai mizapui in hnihsan tlang ai hnihsahnak menma in hmang tlang i.

¹¹ Asher phun, Manasseh phun le Zebulun phun songin mi hrekkhat tu Jerusalem khua ah a kawinuamtu um tlang i.

¹² Cen Judah mi lakah Pathian in naper ai kumpibawi le a kuthnia tlangsuakte thupehnak bangin Bawipa ai thu hlun tuhin mizapui tu tumhnak bangvek ṭen nai tlang i.

Kansuak Puai Bawn Tlang I

¹³ Hla hnihhnak hla ah, Col tello sang bawn tuhin minung tampui Jerusalem ah kawi tlang i.

¹⁴ Jerusalem khua songai hibawlhnak le rimhmui taihnak pulengte bal sek ai Kidron Horkuam ah lon tlang i.

¹⁵ Cen ciami hla ni hlaili nia ah Kansuak puai hrang hibawlhnak tuhin tuute ro tlang i. A cianghlimlomi suangbawi le Levi mite tu zakthi ze manin Bawipa hnenah cianghlimhnak bawn fawm in ciatihin Biakinn songah hibawlhnak sel tlang ve i.

¹⁶ Pathian ai cengpa Moses dan pehnak bangin Biakinn song ahcen umhnak co tlang ve i. Levi mite in hibawlhnak hrangah sumhnam thisan heh suangbawite hnenah pe tlang ai suangbawite in puleng vumah phiah i.

¹⁷ Mi tampui in cianghlimlo manin Kansuak Puai hrang tuute ro thil tlang lo i; Ciamanin amahte ca Levi mite in ro tlang ai Bawipa hnenah tuu heh sel i.

¹⁸ Ciahlaiah Epharaim phun, Manasseh phun, Issakhar phun le Zebulun phun songin a kawitu tampui tu ciangruaihnak a bawn lai lotute i ai Kansuak puai heh a dan loin bawn tlang i. Ciafangin kumpibawi Hezekiah in amahte tumrul in sawngen ai,

¹⁹ “Aw Bawipa, kin pupate ai Pathian, cianghlimmi ilo napui thinlung takniu in na biatute heh na ninghiohnak thawn ngaithiam tu hram law,” ti i.

²⁰ Bawipa in Hezekiah sawngenhnak tu ngai sah ai ciamite heh ngaithiam i; harsahnak zaikhai amahte vumah hleng lo i.

²¹ Jerusalem khua an a kawitute hmuahhmuah in Col tello Sang Puai heh lungawi aipuang ngai in ni sarih song bawn tlang i; ni khat hnua ni khat suangbawi le Levi mite in Bawipa tu amahte tha naih zah in thangphat tlang i.

²² Bawipa biakhnak ah mi konghoi dan a thiam ngaimi Levi mite tu kumpibawi Hezekiah in thangphat i. Ciatihin ni sarih song puai bawn tlang ai Bawipa hnenah rualrem hibawlhnak sel tlang ai amahte ai Pathian heh thangphat tlang i.

²³ Ciahnua amahte veksen in ni sarih song puai peh leh tuhin lungkhim tlang ai a dang ni sarih song lungawi aipuang in puai bawn tlang lehthio i.

²⁴ Kumpibawi Hezekiah in ciami puai ah mizapui aih tuhin kawlpawcangte thawng khat le tuute thawng sarih pe ai a kuthnia ai tlangsuakte in kawlpawcangte thawng khat le tuute thawng hra pe tlang ve i. Suangbawi tampui in amahte cianghlimhnak tuh bawn i.

²⁵ Ciatihin mi zongzong Judah mi, suangbawite, Levi mite, sak lamin a zutute le Israel le Judah ramsong ai a zomzet ai umtu ramdang mite khai amahte veksen in ang tlang ngai i.

²⁶ Jerusalem khuapui tu anghnak in dim i; Ciabang anghnak tu David ai fapa Solomon san hnuaah um awng lo i.

²⁷ Suangbawi le Levi mite in mizapui heh Bawipa ai hmuifu ngen sah i. Vancung a inn in amahte sawngenhnak heh Pathian in ngai ai cosang i.