2 Sansiarnak 29 - Zanniat Bible

Judah Kumpibawi Hezekiah

¹ Hezekiah tu kum kul hluannga a khim fangin kumpibawi cang ai Jerusalem an kum kul hluankua song uk i. A nu tu Zechariah ai fanu Abijah i.

² A sentu kumpibawi David bangin Bawipa ai anghnak bawn i.

Biakinn Cianghlimruaihnak

³ Hezekiah kumpibawi a cang kum hla khathnak ah Biakinn kotkate heh Hezekiah in hong leh ai remm leh sio i.

⁴ Cen Biakinn ai nisuah lam tual ah suangbawite le Levi mite kokhawm ai,

⁵ “Ning Levi mite, ning pupate ai Pathian Bawipa ai Biakinn heh ning cianghlimruai tuhin ningmah cianghlim dun hmasa tu ih. Cia hnuaah Biakinn a ningrimtiartu thil hmuahhmuah lon tu sio ih.

⁶ Kin pupate tu Bawipa kin Pathian hmaiah thil sual bawn awng ai a lungsiaruai i. Bawipa tu hnawl tlang awng ai a umhnak hmun zam tlang i.

⁷ Biakinn dawngkhamte kham ai a varhnak maikhuat hmitruai i. Israel Pathian ai Biakinn songah rimhmui tai nawn lo i, hibawlhnakte khai sel nawn lo i.

⁸ Ciamanin Bawipa tu Judah le Jerusalem vumah a thinraw ze ai amahte vumai thil a bawnhnak in mi zongzong tihikruai i. Ciami thu heh ling sio hlen i si.

⁹ Kin pate tu raltawnghnak ah thi awng ai kin nupui le kin fate sal cang tuhin fehpui awng i.

¹⁰ “Hetih imanin Bawipa Israel ai Pathian tu kin vumah a thinraw tuh nawn loin amah thawn thukham bawn tuhin ruatcat zo ing.

¹¹ Ciamanin i fate, ngulsul menma mah ih. A hnenah rimhmui taitu tuhin le mizapui in Pathian a bia fangin hotu tuhin Bawipa in ningmah heh ning ril zo i,” tiin ti i.

^12-14 A hnia lamai Levi mite tu hetihin i: Kohath hin in Amasai ai fapa Mahath le Azariah ai fapa Joel, Merari hin in Abdi ai fapa Kish le Jehallelel ai fapa Azariah, Gershon hin in Zimnah ai fapa Joah le Joah ai fapa Eden, Elizaphan hin in Shimri le Jeuel, Asaph hin in Zechariah le Mattaniah, Heman hin in Jehuel le Shimei, Jeduthun hin in Shemaiah le Uzziel,

¹⁵ Hemite in amahte unau Levi mite tu kokhawm tlang ai amahte veksen in cianghlimdunhnak bawn tlang i. Cen kumpibawi ai thupeciahnak bangin Biakinn khiah Bawipa ai dan pehnak bangin cianghlimruai tlang i.

¹⁶ Suangbawite tu Biakinn songah lut tlang ai cianghlimruai tlang i; a cianghlimlo hmuahhmuah Biakinn tual ah suah tlang ai ciata in Levi mite in Kidron phairawn ah fehpui tlang i.

¹⁷ Naper khiah hla khathnak hla, ni khat nia in pan ai niriat nia ah ben tlang i; Biakinn songai luthnak khan khai cianghlimruai sio i. Cen a dang niriat song, ni hlairuk nia tian per tlang lala ai Biakinn tu Pathian biakinn hrangah bawn khimliang ihang.

Pathian Hnenah Biakinn Ap Tlang Leh I

¹⁸ Cen kumpibawi Hezekiah hnenah Levi mite in thuthan ai, “Biakinn tu hibawlhnakte taihnak puleng le belkhengte, sang cianghlim selhnak cabuai le a belkhengte thawn cianghlimruai tlang zo i ing.

¹⁹ Kumpibawi Ahaz in Bawipa ai hmaiah thilsual a bawn laiah a langhnak thilrite khai lang leh zo ai ciangruai zo sio i ing, Bawipa ai puleng hmaiah a veksen dah zo i ing” tiin ti tlang i.

²⁰ Ciafangin rang ngai in kumpibawi Hezekiah in khua upate kokhawm ai hmunkhat niu in Bawipa ai Biakinn ah feh tlang i.

²¹ Kumpibawi innsang le Judah mizapui sualngaithiamhnak le Bawipa ai Biakinn cianghlimruai hibawlhnak hrangah kawlpawcangte lu sarih, tuucangte lu sarih, tuufa niute lu sarih le mete lu sarih keng tlang i. Cen kumpibawi in Aaron ai tesinfa suangbawite heh puleng vumah ciami sumhnamte hibawlhnak sel tuhin ruai i.

²² Suangbawite in a hmasaber ah kawlpawcangte ro tlang i; cen tuucangte, cia hnuaah tuufa niute ro tlang ai ciami thisan heh puleng ah a sangsang in phiah tlang i.

²³ A hnuataber ah mecangte heh lang ai kumpibawi le Pathian biatute mizapui in ciami mecangte vumah amahte kut suan tlang i.

²⁴ Cen suangbawite in ro tlang ai, kumpibawi in Israel mite hmuahhmuah caah maitai hibawlhnak le sualngaithiam hibawlhnak bawt i tuh i, tiin thu a pe bangin ciami thisan heh mizapui sualngaithiam hibawlhnak hrangah puleng vumah burh i.

²⁵ Bawipa in kumpibawi David ca prophet kumpibawi ai prophet Gad le prophet Nathan hmangin David hnenah a pe awnghnak dante khiah kumpibawi Hezekiah in hlun ai Levi mite khai Biakinn songah dartumcel, congcing le tingrisette thawn dah tlang i.

²⁶ Levi mite tu kumpibawi David ai a hmang awnghnak awmawi thilrite awh in ding tlang ai suangbawite tu thirhlung awh in ding tlang i.

²⁷ Cen Hezekiah in maitai hibawlhnak sel tuhin thupe i; ciatihin hibawlhnak a sel tlang sawng fangin mizapui in Pathian thangphat la sa tlang ai awmawi tumtute in thirhlung le a dang tumhnak thilrite tum tlang dekdo i.

²⁸ Biakinn ai pumkhawmtute hmuahhmuah in hmunkhat ah Pathian bia tlang ai hibawlhnak a ziam sek hlanlo la sa le awmawi tum com tlang lo i.

²⁹ Cen kumpibawi le mizapui tu khukhlep in Pathian bia tlang i.

³⁰ Kumpibawi Hezekiah le Judah mi hotute in David le prophet Asaph ai nganhnak thangphathnak late sa tuhin Levi mite ruai i. A ruaihnak bangin lungawi aipuang in sa tlang ai khukhlep in Pathian bia tlang i.

³¹ Cen Hezekiah in mizapui hnenah, “Tun tu ning cianghlim zo ai Bawipa hnenah anghnak hmuh tuhin hibawlhnak heh amah hnenah sel tu ih,” tiin ti i. A tihnak bangin bawn tlang ai mi hrekkhat in maitai hibawlhnak tuhin lungtho ngai in sumhnamte pe tlang i.

³² A koihhnakte tu kawlpawcangte lu sawmsarih, tuucangte lu zakhat le tuu faniute lu zahnih i ai Bawipa hnenah maitai hibawlhnak tuhin sel tlang i.

³³ Ciahlaiah mizapui aih tuhin kawlpawcangte lu zaruk le tuute lu thawng thum khim i.

³⁴ Sumhnam hezah rotu tuhin suangbawi semkhim in a um tlang lo manin ciami naper a bo hlanlo Levi mite in bawm tlang i. Ciami can ahcen suangbawi tam deuh cianghlimruai zo i. Cianghlimhnak thu ahcen suangbawite tahin Levi mite thu kho deuh i.

³⁵ Maitai hibawhnak a sel hlaiah mizapui aihnak hibawlhnak sumhnam thaute mai ah tai tuhin le maitai hibawlhnak thawn selcihhnak cabitti burh tuh khai suangbawite ṭuanvo i. Ciatihin Biakinn ah Pathian biahnak heh a thar in pan tlang leh i.

³⁶ Pathian bawmhnak thawmin ciami naperte a rang ngai in ben tlang manin kumpibawi Hezekiah le mizapui tu ang tlang ngai i.