2 Sansiarnak 26 - Zanniat Bible

Judah Kumpibawi Uzziah

¹ Judah mite in Amahziah ai fapa, kum hlairuk khim, Uzziah heh a pa tumrul in kumpibawi cang tuhin ril tlang i.

² A pa Amaziah thi hnuaah Uzziah in Elath khua lang ai remm leh i.

³ Uzziah tu kum hlairuk a khim fangin kumpibawi cang ai Jerusalem an kum sawmnga le kum hnih song uk i. A nu tu Jerusalem khuami Jekoliah i.

⁴ A pa ai nuncan ziaza hlun in Bawipa hmaiah thil pha bawn ai Bawipa lungawiruai i.

⁵ Uzziah tu Zechariah in Bawipa upat tuhin zirh ai Zechariah a cak song Bawipa fel ngai in ruaih i. Ciamanin Bawipa in hmuifu burh i

⁶ Ciamanin Uzziah in Filistin ram tawng i. Gath, Jamnia le Ashdod khua kulhhnak vingte bal sek ai Ashdod hiang le Filistin ram hmun dangdang ah ving ai kulhhnak khua tampui sa tuhin ruai i.

⁷ Pathian bawmhnak in Filistin mi, Gurbaal ai um Arab mi le Meun mite neh i.

⁸ Ammon mite in Uzziah hnenah siah pe tlang de i. Uzziah tu hat amam ai Egypt ram tianin hmingthang i.

⁹ Uzziah in Jerusalem kulhhnak vingpui heh kho amam in sa ai khua ning kotka, phairawn kotka le vingpui a ning cangah ralvilhnak tuhin sardonsang bawn liang i.

¹⁰ Hampalak nelrawn ahkhai ving ai kulhhnak ralvilhnak sardonsang sa i. Sumhnam tampui a nai manin nitlak lam tlangram ah le zawllai ahkhai namkum tampui co i. Lovai lam daihtu imanin tlang vum ram le ram phahnak hmuncang ah cabit vuan le lo bawn tuhin mizapui forh dekdo i.

¹¹ Raltawng zir cialep ralkap tampui nai i. Ralkap mipum laibu tu kumpibawi kuthnia ai ralbawi pakhat Hananiah ho in kumpibawi laingantute pahnih Jaiel le Maasaiah in awh kawm i.

¹² Ralkapte hotu tuhin ralbawi thawng hnih le zaruk um tlang i.

¹³ Anite kuthnia ah ralkap ting thum le thawng sarih le za nga tu kumpibawi ral tawngtu tuhin ralring ṭio in um tlang i.

¹⁴ Uzziah in ralkapte tu lum, faipui, thir lukhuk, thir angki, li le conkiangte lunghersep hrang tuhin lungto tianin pe i.

¹⁵ Jerusalem khua ralvilhnak inndonsang le vingpui ning in conkiang le lunghersep saitu le lungto lian puipui sai bentute ai hmang tuhin ralthuam bawn thiamtute in thilthuam a phunphun bawn tlang i. Uzziah hming tu khuahacang ah thang i; Pathian bawmhnak a rohpui in ngah manin hat ngai i.

A Hngal Manin Tuar I

¹⁶ Ikhalselai kumpibawi Uzziah tu a hat ngai fangin hngal ai ciami heh a duktloktu ah cang i. Bawipa a Pathian a engsan manin Biakinn songah feh in rimhmui taihnak puleng ah rimhmui tai i.

¹⁷ Suangbawi Azariah le mihat ngai le ralpha ngai suangbawite sawmriat in,

¹⁸ kham tuhin kumpibawi heh hlun tlang i. Suangbawite in, “Uzziah, nang in Pathian hnenah rimhmui taithilhnak nai lo isi. Aaron ai tesinfate suangbawite lek hemi naruaihtu tuhin cianghlimruaihnak i. Hemi hmun thianghlim in tlan tu. Bawipa Pathian heh a thin na tokruai manin hmuifu na pe tuh nawn lo i,” tiin ti tlang i.

¹⁹ Uzziah tu Biakinn song rimhmui puleng hiangah ding ai rimhmui taihnak hleng heh awh meng i. Suangbawite vumah thinraw ai ciasawng fangin a cal in phar pan taito i.

²⁰ Azariah le suangbawi dangte in ningcir in kumpibawi ai cal heh catloin sik tlang ai cia hnuaah Biakinn songin tlan tuhin hnawt tlang i. Cen Pathian in a cawh manin amah khai rang ngai in sumpua ah suak nuam i.

²¹ A nunsong hmuahhmuah phar manin kumpibawi Uzziah tu mi cianghlimlo ah cang i. Biakinn songah lut thil nawn lo ai a inn song lek ah um meng i; a naper hmuahhmuah heh sawng tlang ai a fapa Jotham in ram uk i.

²² Kumpibawi Uzziah in ram a uk song a dang bawnhnak tepawl tu Amoz ai fapa Isaiah in laibu songah ngan sio i.

²³ Uzziah tu thi ai kumpibawi hlanmual ah phum tlang i; ikhalselai a urhnak manin kumpibawite phumdehnak hlanmual ah phum tlang lo i. A fapa Jotham in a tumrul in kumpibawi cang i.