2 Sansiarnak 25 - Zanniat Bible

Judah Kumpibawi Amaziah

¹ Amaziah tu kum kul hluannga a khim fangin kumpibawi cang ai Jerusalem an kum kul hluankua song uk i. A nu tu Jerusalem khuami Jehoaddin i.

² Amaziah in Bawipa mithmuh ah thil pha bawn ai Bawipa lungawiruai i; ikhalselai a thinlung veksen in pe lo i.

³ Judah ram kho ngai in a uk ben sawng fangin a pa a rek awngtu bawite rek thun ve i.

⁴ Ikhalselai anite ai fate tu rek lo i. “A fate ai sualhnak manin a nu le pate rek tuh lo i si; cen a nu le pate ai sualhnak manin a fate rek tuh lo i si. Mi pakhat tu amah ai sualhnak man ian in rek tuh i si,” tiin Moses Dan songai Bawipa ai thupeciahnak hlun i.

Edom Ram Tawng Tlang I

⁵ Cen Amaziah in Judah miphun le Benjamin songin pasal hmuahhmuah ralkap tuhin lang sio ai amahte hin ṭen in khan ai thawng khat hotu le zakhat hotu ralbawi dah betbo i. Pasal kum kul in a vum lam hmuahhmuah lang ai amahte veksen in ting thum khim tlang i. Raltawngtu tuhin raltawng thiam cia, faipui le lum hmang thiam pawl i.

⁶ Ciahlaiah Israel ram an ralkap ting khat zawng ai a zawng man ah ngun phurh zakhat pe i.

⁷ Ikhalselai prophet pakhat kumpibawi hnenah kawi ai, “Hemi Israel ralkapte tu na hnenah tel tlang maseh. Hemi sak lam ramai ralkap, hemi Epharaim mite hnenah Bawipa um lo i.

⁸ Anite tel lekhaw raltawng fangin kin hat deuh tuh i tiin ruat tuh i si; ikhalselai anite tel lekhaw ral in ning neh tuh i; zaimantifangin nehhnak le sunghnak tu Bawipa ai thu i,” tiin ti i.

⁹ Ciafangin kumpibawi Amaziah in, “Ciatih ilekhaw i pe cia ngun hmuahhmuah akontih in ti tuh ing?” tiin prophet heh zawt i. Prophet in, “Ciami tahin tam sawn Bawipa in na pe tuh i,” tiin ti i.

¹⁰ Ciamanin Amaziah in a zawnghnak ralkapte heh hlat ai amahte ramah tlungruai sio i. Israel ralkapte tu Judah mite vumah thin ur roh in tlung tlang i.

¹¹ Cen Amaziah in lauhnak zaikhai nai nawn loin a ralkapte heh Ci phairawn ah fehpui i. Ciata ah tawng dun dekdo ai Edom ralkap thawng hra rek tlang i.

¹² Ciahlaiah a nung in thawng hra pom lai i. A pom mite tu Sela khua ai khu vum phundir ah fehpui ai ciata in tul sio ai a hnia ai lungto lakah thi tlang i, parh sek i.

¹³ Cialai ah Amaziah raltawnghnak ah fehruai lo ai a khamhnak Israel ralkapte in Judah ram khuapui Samaria le Beth Horon karlak ai a umtute tawng ai minung thawng thum rek tlang ai hlawnthil tampui lang sah i.

¹⁴ Amaziah tu Edom ralkapte nehhnak in a tlung fangin Edom milimte phur ai a pathian ah bawn ai bia i; ciami milimte hmaiah rimhmui khai tai i.

¹⁵ Ciatihin a bawn manin Amaziah vumah Bawipa tu a thinraw ai prophet pakhat hlat i. Prophet in, “Na hathnak neh thil lo ai a minungte rin a o ben lomi ramdang ai khuavangte khiah zaimanin bia isi?” tiin kumpibawi Amaziah heh zawt i.

¹⁶ Ciafangin Amaziah in, “Zaifangin kumpibawi ruathnakpetu tuhin na bawn ing? pong nawn mah; ciahlahle na rek tuh ing!” ti i. Prophet tu pong nawn lo i; ikhalselai a com hlanah, “Hetihin thil bawn ai i thurelhnak khai na ngai lo manin nangmah siatsuah tuhin Pathian in ruatcat zo i, ti ling ing,” tiin ti ta i.

Judah Mite In Israel Mite Tawng I

¹⁷ Judah kumpibawi Amaziah in Israel ram ralcai nuam i. Ciamanin Israel kumpibawi Jehoash hnenah tawngzuamhnak thucah i. Jehoash tu Jehohaz Israel kumpibawi Jehu ai fapa i.

¹⁸ Ciafangin Jehoash in Amaziah tu hetihin thu khirh i: “Vaikhat ah Lebanon Tlang ah hlingbur pakhat in cedar thing hnenah thucah ai, ‘I fapa ai nupui tuhin na fapa i pe tu,’ ti i. Cen sahrang pakhat a hiangah kawi ai hlingbur heh parh sek in fon dek i.

¹⁹ Tunin Edom mite neh ing tiin na hngal ai puarthau ze isi; ikhalselai pha bik in na rel ing; dapthen in na inn ah um tu sawn. Nangmah le na minungte caah siatsuah tuhhnak thil heh zaimanin ti hrim ngen na nuam bel i?” ti i.

²⁰ Ikhalselai Amaziah in ciami thu heh ngai nuam cuang lo i. Edom mite ai milim a bia manin Amaziah tu sung tuhin Bawipa in a tumciahnak i.

²¹ Cen Israel kumpibawi Jehoash tu Judah kumpibawi Amaziah tawng tuhin feh i. Judah ram Beth Shemesh ah tawng dun i.

²² Judah ralkapte tu sung ai inn lamah tlan tlang sio i.

²³ Israel kumpibawi Jehoash in Amaziah heh pom ai Jerusalem ah fehpui i. Cen Jerusalem kulhhnak ving heh Epharaim kotka in Khua ning kotka tian, kaih zahnih song bal sek i.

²⁴ Hlawnthil a langhnak Biakinn sui le ngun, Obed Edom tefate ai kilhnak Biakinn thilrite le kumpibawi inn ai sumsaw hmuahhmuah Samaria ah fehpui sio i. Sal tuhin a pom mite khai fehpui i.

²⁵ Judah kumpibawi Amaziah tu Israel kumpibawi Jehoash tahin kum hlainga rai sawn nung i.

²⁶ Amaziah ai ukhnak a hampan in a tawp tian a dang bawnhnak tepawl tu Judah le Israel Kumpibawite Tluanthu Laibu songah a khimliang in ngan tlang i.

²⁷ Amaziah in Bawipa a zangtak ai panin Jerusalem ah Amaziah ralcaitu um ngiode i; ciamanin Lakhish khua ah tlan i; ikhalselai ciata ah a ralcaitute in hlun ai rek tlang i.

²⁸ A luang tu Jerusalem ah siphuh in phur ai David khuapui kumpibawi hlanmual ah phum tlang i.