2 Sansiarnak 24 - Zanniat Bible

Judah Kumpibawi Joash

¹ Joash tu kum sarih a khim fangin Judah kumpibawi cang ai Jerusalem an kum sawmli song uk i. A nu tu Beersheba khuami Zibiah i.

² Suangbawi Jehoiada a nunsong ah Joash in Bawipa mithmuh ah thilpha bawn ai Bawipa lungawiruai i.

³ Kumpibawi Joash caah Jehoiada in nupui tuhin pahnih ril sah ai fanu le fapa tampui cawi sah i.

⁴ Can comniu song kumpibawi a cang hnuaah Joash in Bawipa ai Biakinn remm tum i.

⁵ Suangbawite le Levi mite tu Judah ram song khuahacang ah hlat ai kum siar Biakinn remmhnak hrangah a kulhnak paisa khuai tuhin thupe i. Rang ngai ai bawn tuhin thupe napui Levi mite in rang ngai in bawn tlang lo i.

⁶ Ciamanin amahte hotu Jehoiadah heh ko ai, Bawipa umhnak Ponhlam sikhnak ah mizapui in ngunkhuai pe tlang tuseh, tiin Bawipa cengfa Moses ai thu a hluphnak heh zaimanin Judah le Jerusalem mite hnenin Levi mite khonruai lo i si?” tiin zawt i.

⁷ Misual nu Athaliah le a hluntute in Bawipa ai Biakinn tu tampui siatsuah tlang ai a cianghlim thilrite tampui khai Baal khuavang biahnak tuhin hmang tlang i.

⁸ Ciafangin kumpibawi ai ruaihnak bangin Levi mite in paisa dahkhawmhnak tuh thingkuang pakhat bawn ai Biakinn kotka ah dah tlang i.

⁹ Pathian ai cengfa Moses in hmasaber ngunkhuai heh hampalak ah a khuai awng bangin Bawipa hnenah ngunkhuai pe tuhin Jerusalem le Judah ram song hmuahhmuah ah thuthan tlang i.

¹⁰ Ciami thuthanhnak za fangin mizapui le hotute tu ang ngai ai amahte ngunkhuai pe tlang dekdo ai thingkuang amahte bawnhnak dim i.

¹¹ Nisiar in ṭuanvo naitu kumpibawi kuthnia ai bawi pakhat hnenah ciami kuang heh Levi mite in phur tlang de i. Thingkuang dim zo i ti a hmu tlang fangin paisa tu kumpibawi ai laingantu le Suangbawi Sang ai palai in lang ai thingkuang heh a dahhnak kelah dah leh de i. Ciatihin paisa tampui khawl tlang i.

¹² Ciafangin kumpibawi Joash le suangbawi Jehoiadah in Biakinn remm naper hotute hnenah paisa heh pe ai anite in Biakinn remmtu ah lungsolhtu, zungthiam le thir ertute lang tlang i.

¹³ Napertu hmuahhmuah in kol ngai in per tlang ai Biakinn tu a sa sawng bangin pha bik le kho ngai in remm ben tlang leh i.

¹⁴ A remm ben fangin a hlaihnak sui le ngun tu kumpibawi le suangbawi Jehoiada hnenah khirh tlang leh ai anite in Biakinn hrangah a kulhnak belkhengte bawnhnak tuhin hmang i. Jehoiada a nunsong tu Biakinn ah catloin hibawlhnak bawn i.

¹⁵ Jehoiadah tu tarkun tian nung ai kum za le sawmthum a khim fangin thi i.

¹⁶ Israel mizapui ca, Pathian ca le Bawipa ai Biakinn hrangah thil pha bawntu imanin Jehoiada tu David khuapui, Jerusalem khuahlun kumpibawi hlanmual ah phum i.

Jehoiada Khuakhanhnak Phiat Tlang I

¹⁷ Jehoiadah a thi hnuaah Judah hotute in kumpibawi Joash heh forh tlang ai anite ai thu hlun in nung i.

¹⁸ Ciamanin mizapui in Bawipa ai Biakinn ah a pupate ai Pathian bia tlang nawn loin milim le Asherah khuazingnu bia tlang i. Ciatihin a sual tlang manin Judah le Jerusalem vumah Bawipa ai thinrawhnak hleng i.

¹⁹ Bawipa in a hnenah let tuhin anite hnenah prophette hlat napui anite thungai nuam tlang lo i.

²⁰ Cen Pathian ai rauhla tu suangbawi Jehoiada ai fapa Zechariah hnenah hleng ai mizapui in a hmuthilhnak hmunah ding kongin anite hnenah, “Bawipa in, ‘Zaimanin i thukham hlun tlang lo ai ning vumah siatsuahhnak hlengruai i si?” tiin thu ning zawt i. Bawipa ning zam tlang manin ning zam ve i,” tiin au i.

²¹ Ciafangin kumpibawi Joash le mizapui in engsan ai Zechariah heh Biakinn tual ah kumpibawi thupehnak in lungto in a thi tian sep tlang i.

²² Zechariah ai pa Jehoiada in ninghio ai a kilkhawlhnak awng heh kumpibawi Joash in hih nawn lo manin Zechariah rek i. Ciatihin Zechariah a haihawh bo dawn fangin, “Ning thil bawnhnak heh Bawipa in hmu tu hram selai ning vumah phu ning zul tuseh,” tiin au i.

Joash Ukhnak Bo I

²³ Ciami kum khuakhal can hleng ai Syria ralkapte in Judah ram le Jerusalem khua tawng tlang i. Judah mi hotute hmuahhmuah rek tlang ai thilri le paisa tampui a lang hnuaah Damascus khua ah phur tlang i.

²⁴ Syria ralkapte tu tlawmniu napui Judah mite in a pupate Pathian Bawipa zam tlang zo manin Bawipa in a tampui Judah ralkapte heh nehruai i. Kumpibawi Joash in Bawipa ai cawhhnak tawk ngaingai i.

²⁵ Ral a tawnghnak ah a roh ngai in maliam ai, a ralte a let hnuaah, a kuthnia ai tlangsuakte pahnih in engsan kawm ai suangbawi Jehoiada a rekhnak phuzul in a khuahluan vumah rek i. David khuapui ah phum tlang ai ciatihin kumpibawi hlanmual ah phum am hlim lo i.

²⁶ Joash a engsantute heh Ammon nupang Shimeah ai fapa Zabad le Moab nupang Shimrith ai fapa Jehozabad i.

²⁷ Kumpibawi Tluanthu Laibu Relfianghnak songah a fapate ai tluanthu, amah ca prophette thuphuanghnak le Biakinn a remmhnakte heh ngan tlang sio i. Cia hnuaah a fapa Amaziah in a tumrul in kumpibawi cang i.