2 Sansiarnak 20 - Zanniat Bible

Judah Mite In Edom Mite Tawng I

¹ Can tawkfang a rai hnuaah Moab ralkapte in, amahte ṭantu Meunim mite thawn Judah ram tawng tlang i.

² Kumpibawi Jehoshaphat hnenah thuphurtu zualkote hleng tlang ai, “Edom ram an ralkapte tampui kawi tlang ai Tipui Thi ralkhat lamin ning tawng tum i. Hazazon Tamar khua khai lang zo i,” tiin rel tlang i. (Hazazon Tamar tu Engedi ti inkhai ko i).

³ Jehoshaphat tu a thinlau in sawngen ai Bawipa ai hoihnak ngen i. Cen a ramsong hmuahhmuah rong ul tlang tuhin thupe i.

⁴ Judah ram khua cangcang in Jerusalem ah Bawipa ai hoihnak ngen tuhin kawi tlang i.

⁵ Jerusalem khuasong mite thawn Biakinn tualvan thar ah taikhawm tlang i. Kumpibawi Jehoshaphat tu amahte hmaiah ding ai,

⁶ cawm roh in sawngen i: “Aw Bawipa, kin pu le kin pa ai Pathian, na umhnak van in laivum minung hmuahhmuah nangmah in uk sio isi. Hathnak hmual le huham hmuahhmuah nangmah ai imanin na engsanthaitu aisu khai um lo i.

⁷ Nang tu kin Pathian isi. Na minung Israel mite he ram a hleng fangin heta ai a ummi miphunte tu nangmah in hnawt ai na rualpa Abraham ai tesinfate hnenah he ram heh kumzangza in anite in nai tuhin pe zo isi.

⁸ Hemi ram songah um tlang ai nangmah upathnak ah Biakinn sa tlang i.

⁹ Harsa vansanghnak a phunphun: raltawng siatsuahhnak, ursia le rian amahte hnenah a tlung fangin hemi Biakinn hmaiah ding in na bia tlang i, amahte in na ngenhnak hmun tuhin bawnhnak i. Na hnenah saw a ngen tlang fangin ngai sah ai o de isi.

¹⁰ “Aw Bawipa, tunin, Ammon mi, Moab mi le Edom mite in kin tawng i. Kin pupate Egypt ram an a suak tlang fangin hemi ramte heh a fon tuh rin siang tlang awng lo i; ciamanin kin pupate in anite ram heh hel ai siatsuah tlang lo i.

¹¹ Ciacingin tunah kin lehrul tumdan heh kin sik sah in na pe cia ram an a hnawt kin tum tlang i.

¹² Aw Pathian, kin Pathian, nangmah in cawh tu law. Kin tawngtu ralkap hezah hmaiah tu mer tlang thil hrimhrim lo i ing. Zaikhai kin bawn thilhnak um nawn lo i; nangmah bawn tuhhnak lek na iang tlang i ing,” tiin ti i.

¹³ Judah mi zongzong amahte nupui le fate thawn Biakinn tualvan ah ding tlang i.

¹⁴ Bawipa ai rauhla tu mizapui lakah a ummi Levi mi pa pakhat hnenah hleng i. Ani tu Jahaziel i ai Zechariah ai fapa i. Zechariah tu Benaiah ai fapa i; Benaiah tu Jaiel ai fapa i; Jaiel tu Mattaniah ai fapa i; Mattaniah tu Levi miphun Asaph hin i.

¹⁵ Cen Jahaziel in, “Aw kumpibawi le Judah mite le Jerusalem khua mite, Bawipa in, ‘Ning ralte tam ngai manin lau mah ih, ning thin khai nau maseh. Raltawnghnak thu tu ning thu ilo i, Pathian lairelhnak i.

¹⁶ Thangha ah tawng tu ih. Ziz tlang kawn in kawi tlang tuhai Jeruel hiang phairawn a tawphnak, hampalak a panhnak ah tawk tlang tuh i si.

¹⁷ Ningmah in tawng kul tuh lo i si. ṭanghmun khuar tu ilai pai cia in um tu ih; cen Bawipa in nehhnak ning pe khiah hmu tlang tuh i si. Judah le Jerusalem mite, lau hrimhrim mah ih; ning thin khai nau maseh. Raltawng tuhin feh tu ilai Bawipa kaimah ning hnenah um tuh ing,’ ti i,” tiin rel i.

¹⁸ Ciafangin Jehoshaphat tu a hmai laipua tong tianin kun i, mizapui khai kun ai Bawipa bia tlang i.

¹⁹ Levi phun Kohath le Korah hinte tu ding tlang ai cawm ngai in Israel ai Pathian heh thangphat tlang i.

²⁰ A thangha zingniu in tho ai Tekoa hiang hampalak ah feh tlang i. A suak tlang sawng fangin Jehoshaphat in anite hnenah, “Judah le Jerusalem mite, Bawipa ning Pathian heh rinsan tu ilai kho ngai in ding thil tuh i si. Amah ai prophette thurelhnak sang tu ilai hlawh ning tling tuh i,” tiin cah i.

²¹ Mizapui thu a sawm hnuaah lasatute hrekkhat tu puai can ai a sildehnak korfualpui sil in ralkapte hmaiah feh tlang ai: Bawipa tu thangphat tu ih, a ithnak tu kumzangza in kho i,” tiin la sa kong tuhin thupe i.

²² Lasatute in Bawipa thangphathnak la a sa tlang sawng fangin Bawipa in Judah ram a tawngtu ralte heh a roh ngai in thinlauruai i.

²³ Ciafangin Ammon mi le Moab mite ṭang tlang ai Edom ralkapte khiah tawng dekdo ai Edom ralkapte heh rek berh i. Cia hnuaah amahte le amahte a roh ngai in tawng dun tlang dekdo lehthio i.

²⁴ Judah ralkapte tu tlangbol a hleng fangin sik ai ralte tu laipua ah leu linglung in hmu tlang i. Pakhat khai luat loin thi berh i.

²⁵ Jehoshaphat le a ralkapte tu ralte ai thilri lang tuhin feh tlang i. Kawlpaw, rong le thilri mankhung a phunphun hmu tlang i. Ciami thilrite tu ni thum song thiar napui thiar ben tlang lo i.

²⁶ Ni lihnak ah Berakah phairawn ah khawm tlang ai Pathian thangphat tlang i. Ciami phairawn heh tunnia tianin Berakah tiin ko tata i.

²⁷ Bawipa in amahte ralte a nehruai hnuaah Jehoshaphat le a ralkapte tu Jerusalem ah ral neh anghnak thawn tlung tlang leh i.

²⁸ Jerusalem a hleng fangin congcing le titilu le thirhlung tum kongin Biakinn ah feh tlang i.

²⁹ Bawipa in Israel ai ralte neh sah sio i ti a zatu ram hmuahhmuah heh a thinlau tlang sio i.

³⁰ Bawipa in a ram song khuahacang a humhim manin Jehoshaphat in dap niu in uk i.

Jehoshaphat Ram Uk Tawphnak

³¹ Jehoshaphat tu kum sawmthum le kum nga a khim fangin Judah kumpibawi cang ai Jerusalem an kum khul hluannga song uk i. A nu tu Shilhi ai fanu Azubah i.

³² A pa Asa bangin Bawipa ai hmaiah thil pha bawn i;

³³ ikhalselai khuavang a biahnak hmunte tu bal lo i. Mizapui in a pupate ai Pathian heh amahte thinlung hmuahhmuah in bia tlang lo i.

³⁴ Jehoshaphat a bawnhnak dangdang tu, a panin a tawp tian, Israel Kumpibawi Tluanthu Laibu songah a telhnak Hanani Ai Fapa Jehu Tluanthu Laibu tihnak songah ngan i.

³⁵ Vaikhat ah Judah kumpibawi Jehoshaphat in thil sual tampui a bawntu Israel kumpibawi Ahaziah thawn ṭangkawmhnak laikhen bawn kawm i.

³⁶ Eziongeber tihnak lawng cawlumhnak Tarshish lam fehtu tuh tangphawlawngte bawn dekdo i.

³⁷ Ikhalselai Mareshah khuami Dodavahu ai fapa Eliezer in Jehoshaphat khiah, “Ahaziah thawn ning ṭang tlang manin na bawnhnak tepawl Bawipa in siatsuah tuh sek i,” tiin ralringhnak pe i. A relhnak bangin a tangphawlawngte tu hnawm sio ai Tarshish ah feh lo i.