2 Sansiarnak 17 - Zanniat Bible

Jehoshaphat Kumpibawi Cang I

¹ Asa thi fangin a fapa Jehoshaphat a tumrul in Judah kumpibawi cang ai Israel tawng tuhin a dinhmun khoruai amam i.

² A ralkapte tu Judah khuapui tampui ah le hampalak ah le Asa in Epharaim ram a langhnak khuapui song ahkhai dah betbo i.

³ A pa dawn lai ai nun zia hlun in Baal khuavang bia lo manin Bawipa in Jehoshaphat heh hmuifu pe i.

⁴ Jehoshaphat in a pa ai biahnak Pathian na ruaih tuhin a thupehnak bangin hlun ai Israel a dang kumpibawite bangin thil sual bawn lo i.

⁵ Bawipa in ani tu Judah ram fel ngai in ukruai ai mi zongzong in a vumah ang ngai in lehsawng pe diamdo manin milian ngai le upat kihzah ngaimi ah cang i.

⁶ Bawipa ai na ruaih uar ngai ai Judah ram songai khuavang biahnak hmunte le Asherah limte khai bal sek i.

⁷ Judah kumpibawi a cang kum thumhnak ah a hnia lamai tlangsuakte: Benhail, Obadiah, Zechariah, Nethanel, Mikaiah tu Judah ram khuate songin mi zirh tuhin hlat i.

⁸ A vumai tlangsuakte tu Levi mite pakua: Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, Tobadonijah le suangbawite pahnih Elishama le Jehoram in hlun tlang i.

⁹ Bawipa ai dan laibu keng tlang ai Judah ram khua hmuahhmuah ah feh tlang ai mizapui zirh betbo i.

Jehoshaphat Lianhnak

¹⁰ Bawipa ai huham manin Judah ram hiangai a umhnak ram hmuahhmuah in Jehoshaphat tawng tuhin ngam tlang lo i.

¹¹ Filistin mite hrekkhat in Jehoshaphat tu lehsawng tampui pe tlang ai ngunkhuai in ngun tampui khai pe tlang i. Arab mite inkhai tuute thawng sarih le za sarih le mete thawng sarih le za sarih pe tlang i.

¹² Ciatihin Jehoshaphat tu khangso deuhdeuh ai hat amam fawn i. Judah ram songah rong le thilri khawlhnak khuate bawn ai ving in kulh i.

¹³ Ciami a dinhnak khuate ah thilri tampui dah i. Jerusalem khua ah ralbawi le ralkap a pha ber pawl,

¹⁴ a hin a hin in dah i. Judah hin songin Adnah tu ralkap hotu bawi i ai a kuthnia ah ralkapte ting thum um i.

¹⁵ Pahnihhnak tu Jehohanan i ai a kuthnia ah ralkap ting hnih le thawng sawmriat um i.

¹⁶ Pathumhnak tu Zichri ai fapa Amasiah i ai ralkapte ting hnih nai i. Amasiah tu pumpe in Pathian ai naruaihtu i.

¹⁷ Benjamin hin songin ralkap hotu bawi heh ralkap hmingthang ngai Eliada i ai lum le conkiang awhtu ralkapte ting hnih hotu i.

¹⁸ Eliada sangtu bawi heh Jehozabad i ai ralthuam khimliang thawn ralkapte ting khat le thawng sawmriat nai i.

¹⁹ Hemi ralkapte tu Judah ram khuapuite ai a dahhnak ralkapte hlaiah Jerusalem ai kumpibawi naruaihtute i.