2 Sansiarnak 15 - Zanniat Bible

Asa In Tharthawh I

¹ Pathian ai rauhla tu Obed ai fapa Azariah vumah hleng ai,

² kumpibawi Asa hnenah kawi ai, “Kumpibawi Asa, Judah le Benjamin mite, i ngai tu ih! Bawipa lamah ning ṭang song ahcen Bawipa in ning ṭan ve i. Amah si le i sikhaw tawk thai in um tuh i; ikhalselai zangtak le i sikhaw ning zangtak tuh ve i.

³ Israel mite tu can raipui Pathian dik nai lo, zirhtu suangbawi nai lo le dan nai loin um tlang i.

⁴ Ikhalselai harsahnak a tawk fangin Bawipa, Israel ai Pathian hnenah let tlang leh i. Bawipa heh si tlang ai tawk leh de i.

⁵ Cialai can ah khuahacang ah kihkul lauhnak le rem lohnak a um manin akonah khai aisu khai suakvak ngam tlang lo i.

⁶ Pathian in amahte vumah harsahnak le vansanghnak hlengruai manin ram khat le ram khat, khua khat le khua khat rem dun tlang lo i.

⁷ Ikhalselai ning tu hat ngai le ralpha ngai in um tlang tu ilai ning naper man co tuh i si,” tiin ti i.

⁸ Asa in Obed ai fapa prophet Azariah thuphuanghnak a za fangin a tha tho ngai i. Judah le Benjamin ram le Epharaim tlang vum ram a langhnak khuapui hmuahhmuah songai a um milimte heh lon sah sio i. Cen Biakinn tualvan ai a umhnak Bawipa ai puleng khai remm i.

⁹ Epharaim ram, Manasseh ram le Simeon ram an mi tampui Asa hnenah kawi tlang ai a ram songah um tlang i; zaimantifangin a hnenah Bawipa um i ti hmu tlang i. Asa in ciami a kawitute heh kokhawm tlang i.

¹⁰ Asa kumpibawi a cang kum hlainga kum, hla thumhnak ah Jerusalem ah taikhawm tlang i.

¹¹ Ciami nia ahcen a ralte hnenin a suthnak thilri songin kawlpawte za sarih le tuute thawng sarih Bawipa hnenah hibawlhnak sel i.

¹² Amahte pupate ai Pathian Bawipa heh amahte thinlung le thazang veksen thawn bia tuhin amahte veksen in lungkhim in thukham bawn tlang i.

¹³ Aisu bang inkhai, mino ituseh, upa ituseh, nupang pasal ti loin, Bawipa a bia lotu heh rek tuar tuhin thukham tlang i.

¹⁴ Bawipa hming in ciami a thukhamhnak hlun tuhin cawm ngai in cukcam tlang ai thirhlung le tuucangki hmut in cawm ngai in au tlang dekdo i.

¹⁵ Amahte thinlung taktak in thukham bawn tlang manin Judah mite hmuahhmuah in ang tlang ngai i. Pathian a biahnak vumah lunghmuihnak nai tlang i. Pathian ai pomhnak miphun ah cang tlang ai khuahacang ah daphnak pe i.

¹⁶ Cen kumpibawi Asa ai pi Maacah in khuazingnu Asherah lim a bawn manin kumpibawinu ai nu a ihnak in lon i. Asa in milim heh tlu lio in vawng ai a tan sek hnuaah Kidrom phairawn ah mai in tai i.

¹⁷ Asa in Israel ram songai khuarum biahnak hmun hmuahhmuah heh bal sek lo napui ai a cak song hmuahhmuah ah Bawipa rinsan in nung i.

¹⁸ Pathian hnenah a pa Ahijah ai pehnak thilrite le amah pehnak sui le ngun in a bawnhnak bungbelte tu Bawipa ai Biakinn songah dah sio i.

¹⁹ Judah ram a ukhnak kum sawmthum le kumnga song a ram songah tawngdunhnak um lo i.