2 Sansiarnak 14 - Zanniat Bible

Asa In Sudan Mite Neh I

¹ Kumpibawi Abijah tu thi ai David khuapui, kumpibawi hlanmual ah phum tlang i. Cen a fapa Asa in a tumrul in kumpibawi cang i. Asa ai kuthnia ah Judah ram tu kum hra song daphnak ngah i.

² Asa in a dik le a pha bawn manin Pathian a lungawiruai i.

³ Ramdang mite ai pulengte le a khuavang biahnak hmunte heh bal sek i; lungbirhnak khai seu sek ai amahte khuazingnu Asherah limte khai bal sek i.

⁴ A pupate ai Pathian Bawipa ai daihhnak bawn tuhin le a zirhhnak le thupehnakte hlun tuhin Judah mite thupe i.

⁵ Judah ram khuapui hmuahhmuah ai umhnak khuavang biahnak hmun le rimhmui taihnak pulengte a siatbal sek manin a ukhnak ram songah daphnak um i.

⁶ Ciami can ah Judah ram khuapuite khiah ving in kulh ai Bawipa in daphnak a pe manin kum tampui song tawngdunhnak um lo i.

⁷ Judah mite hnenah, “Kin khuapuite cingkim heh ving in kulh tuh sio ising. Khua le ram hlirhnak inn sang puipui sa tuhai kham le kalh thil kotka bawn tuh ising. Pathian daihhnak kin bawn manin kin ram heh fel ngai in uk thil ising. Amah in khuahacang ah humhimhnak kin pe i,” tiin ti i. Ciamanin a tihnak bangin sa tlang ai khangso amam i.

⁸ Kumpibawi Asa in Judah mite songin lum le faipui awhtu ralkapte ting thum le Benjamin mite songin lum le conkiang naitu ting hnih le thawng sawmriat nai i. A veksen in ralpha ngaingai le raltawng zir cia ciang i.

⁹ Ethiopia mi, Zareh tihnak pa in ralkapte ting hra le siphuhlengte za thum thawn Judah ram tawng ai Mareshah tian nor i.

¹⁰ Asa tu Zerah tawng tuhin suak ai amahte hmun hnih in Mareshah hiang Zephathah phairawn ah ṭanghmun khuar kawm veve i.

¹¹ Ciafangin Asa in Bawipa Pathian hnenah sawngen ai, “Aw Bawipa, ralkap hat ngai ituseh, ralkap ṭawnṭai ituseh, na nuam fangin tu bai niu in bawm thil isi. Aw Bawipa kin Pathian, nangmah lek na rinsan ai na hming in ralkap hezah heh tawng tuhin suak tlang zo i ing; tunah kin bawm tu hram law. Bawipa, nang tu kin Pathian isi ai aisu inkhai nangmah neh tuh heh tum ngam tuh lo i,” tiin ti i.

¹² Cen Asa le Judah ralkapte in a tawng fangin Bawipa in Ethiopia ralkapte heh neh i. Ethiopia ralkapte tu tlan tlang ai,

¹³ Asa le a ralkapte in Gerar tian hnawh tlang i. Ethiopia ralkapte tu tam ze thi manin raltawng ben nawn lo i. Bawipa le a ralkapte in neh ai ralkapte in thilri tampui khai sut sek i.

¹⁴ Ciata dunghlun ai a um mite in Bawipa tu kih ze manin Judah ralkapte in Gera khua hiangai umhnak khuapuite khiah siatsuah tlang sek i. Khuapui tampui rok ai thilri tampui sut i.

¹⁵ Tuukhalte riahbuk hrekkhatte khai tawng ai tuu le kalaukte tampui sut i. Cia hnuaah Jerusalem ah tlung i.