2 Sansiarnak 13 - Zanniat Bible

Abijah Le Jeroboam Tawng dun I

¹ Kumpibawi Jeroboam in Israel ram a uk kum hlairiat kum ah Abijah tu Judah kumpibawi ah cang ai,

² Jerusalem an kum thum song uk i. A nu tu Gibeah khuami Uriel ai fanu Mikaiah i. Abijah le Jeroboam tu ral dun ai tawng dun i.

³ Abijah in mihat ralpha ralkapte ting li khawm ai Jeroboam in mihat ralpha ralkapte ting riat thawn tawng i.

⁴ Epharaim tlang vum ramah tawk dun i. Ciafangin kumpibawi Abijah tu Zemaraim Tlang ah kai ai Jeroboam le Israel mite khiah, “Aw Jeroboam le Israel mite, i ngai tu ih!

⁵ Bawipa, Israel ai Pathian in David hnenah amah le a tesinfate tu Israel mite hmuahhmuah vumah kumpibawi cang tuh ngiohnak in thupe ai bal leh thil lo thukham bawn zo i, ti khiah ling tlang lo i sim?

⁶ Ciatih puipa in Nebat ai fapa Jeroboam in Pathian ai rilhnak kumpibawi Solomon tawngcai in raltho i.

⁷ Cia hnuaah zailam ahkhai santlai lo mihuatsuakte kokhawm ai Solomon ai fapa Rehoboam heh a bawn awng lohnak tianin bawnruai tlang i. Mino i ai ram uk awng bangmi ilo manin amahte thu el ben lo i.

⁸ Tunah Bawipa in David ai tesinfate a pehnak thunaihnak heh engsan tlang i si. Ralkap tampui nai ai Jeroboam ai bawnhnak sui kawlpawlim heh ning khuavang tuhin bawn ai keng tlang i si.

⁹ Bawipa ai suangbawi, Aaron ai tesinfate le Levi mite khai hnawt sek i si. Anite tumrul in a dang miphunte ai bawnhnak bangin ning suangbawite dah tlang i si. Kawlpawcang lu khat ihlahle tuute lu sarih a koih bentu hmuahhmuah heh ning khuavangte ai suangbawi tuhin cangruai hluahhlo i si.

¹⁰ “Ikhalselai kin incen Bawipa kin Pathian zangtak loin Amah na ruaih lai i ing. Aaron ai tesinfa suangbawite in suangbawi na ruaih tlang ai Levi mite in bawm tlang i.

¹¹ Zingsiar le zansiar Bawipa hnenah rimhmui tai tlang ai sumhnamte tampui maitai hibawlhnak tuhin sel tlang i. Cabuai vumah a cianghlimmi sangreu sel ai zan lam cang fangin sui maivarhnak khuam vumah mai var tlang i. Bawipa ai thupeciahnak bangin kin incen bawn tlang lai i ing; ikhalselai ning incen Bawipa heh hnawl tlang zo i si.

¹² Tun ahhen Bawipa tu kin hotuber i ai a suangbawite tu thirhlung thawn ningmah tawng tuhin kin kotu tuhin ralring cialep ihang. Israel mite, ning pupate ai Pathian heh tawngcai mah ih! Neh tuh cuang lo i si!” tiin auh dekdo i.

¹³ Cialak ah Jeroboam in a ralkapte hrekkhat heh Judah ralkapte a hnua lamin a thupruk in bawh tuhin hlat i. Cen a hrekkhatte in a hmai lamin tawng tuhin tum i.

¹⁴ Judah ralkapte in khuatang ai a sik fangin kin kulh sio zo i, ti khiah hmu i. Ciafangin Bawipa hnenah bawmhnak ngen in au tlang ai suangbawite in amahte thirhlung tum tlang i.

¹⁵ Judah ralkapte tu cawm ngai in au tlang ai Abijah ho in Israel ralkapte tawng tlang dekdo i; Pathian in Jeroboam le Israel ralkapte heh neh i.

¹⁶ Israel ralkapte tu tlan tlang ai Pathian in Judah mite hnenah nehhnak pe i.

¹⁷ Abijah le a ralkapte in Israel ralkapte neh sek ai Israel ralkapte lakai a pha ber pawl ting nga rek tlang i.

¹⁸ Ciatihin Judah mite in a pupate ai Pathian Bawipa a rinsan manin Israel mite vumah nehtu ah cang tlang i.

¹⁹ Abijah in Jeroboam le a ralkapte heh dum ai a khuapuite hrekkhat: Bethel, Jeshanah le Epharon le he khuapuite hiangai khuatenaute khai sut i.

²⁰ Abijah kumpibawi a i songah Jeroboam tu khangso leh thil nawn lo i. Hnuataber ah Bawipa in Jeroboam heh cawh ai thi i.

²¹ Ikhalselai Abijah tu khangso amam i. Nupui hlaili nai ai fapa kul hluanhnih le fenu hlairuk nai i.

²² Abijah ai tluanthu dang, a thurelhnak le a thil bawnhnak tepawl tu Prophet Iddo Tluanthu Laibu songah ngan tlang i.