2 Sansiarnak 11 - Zanniat Bible

Shemaiah Thuphuanghnak

¹ Kumpibawi Rehoboam tu Jerusalem khua a hleng fangin Benjamin le Judah hin songin ralkap pha ber pawl ting khat le thawng sawmriat khawm i. Sak lam Israel hinte heh tawng ai amah ai ukhnak cangruai tum i.

² Ikhalselai Bawipa in,

³ “Kumpibawi Rehoboam le Judah le Benjamin hinte rel tuhin prophet Shemaiah ruai ai Shemaiah in,

⁴ “Bawipa ai ponkam tu hetihin i: ‘Ning unau Israel mite heh tawng mah ih. Ning veksen in ning inn ah tlung tusek ih. Hetihin thil a canghnak heh kaimah ai cangruaihnak i,’ ti i.” tiin ti i. Bawipa ai thupehnak khiah hlun tlang ai Jeroboam heh tawng loin ṭul leh i.

Rehoboam In Khuapui Kulh I

⁵ Rehoboam tu Jerusalem khuapui songah um i; cen Judah le Benjamin ram songai umhnak khuapui:

⁶ Bethlehem, Etam, Tekoa,

⁷ Bethzur, Soco, Adullam,

⁸ Gath, Mareshah, Ziph,

⁹ Adoraim, Lakhish, Azekah,

¹⁰ Zorah, Aijalon le Hebron khuate heh ving in kulhruai diamdo i.

¹¹ Hemi khuapuite khiah kho ngai in kulhruai ai khua cangah hotu bawi dah i. Cen a khua cangah rong, olive thau, cabitti,

¹² Lum le faipuite dah ai ciatihin Judah ram le Benjamin ram heh fel ngai in uk i.

Suangbawi Le Levi Mite Kawi Tlang I

¹³ Israel ram khuahacang in suangbawite le Levi mite tu hlang lamai Judah ramah kawi tlang diamdo i.

¹⁴ Israel kumpibawi Jeroboam le a fapate in suangbawite tu Bawipa ai na ruaih nuam lo manin Levi mite in amahte umhnak le lairamte heh zam tlang ai Judah ram le Jerusalem khua ah vai tlang i.

¹⁵ Jeroboam in khuavang biahnak le kawlpawcang lim a bawnhnak ah amah ai daihhnak suangbawite dah ai ciamite in khuavang biahnak le milim biahnak hmunah suangbawi tuhin ruaih tlang i.

¹⁶ Israel hin dangdang songin Bawipa, Israel ai Pathian bia a nuamtute taktak in Levi mite thawn Jerusalem ah, amahte pupate ai Pathian Bawipa hnenah hibawlhnak sel nuam in feh tlang i.

¹⁷ Anite in Judah ram heh khoruai amam ai kumthum song tu Solomon ai fapa Rehoboam pha bik in bawm tlang ai kumpibawi David le kumpibawi Solomon san ai a nung awng bangin nung tlang i.

Rehoboam Ai Innsang

¹⁸ Rehoboam in Mahalath hoi i. Mahalath ai pa tu David ai fapa Jerimoth i ai a nu tu Eliab ai fanu le Jesse ai tunu Abihail i.

¹⁹ Fapate pathum nai ai Jeush, Shemariah le Zaham i.

²⁰ Cia hnuaah Absalom ai fanu Maacah hoi ai fapate pali: Abijah, Attai, Ziza le Shelomith nai i.

²¹ Rehoboam in amahte veksen in nupuite hlairiat le nuzawlte sawmruk nai ai fapate kul hluan riat le fanute sawmruk nai i. A nupui le a nuzawlte hmuahhmuah lakah Maacah daih ber i.

²² A fapate hmuahhmuah lakah Maacah ai naihnak Abijah a daih ber manin amah roltu tuhin ril i.

²³ Rehoboam in a fapate tu ṭuanvo fel ngai in zem sio ai Judah le Benjamin ramsong ving kulhhnak khuapuite ah dah i; amahte aih le din khai a duhzah in pe ai nupuite tampui hoi sah i.