2 Sansiarnak 1 - Zanniat Bible

Solomon In Fimhnak Ngen I

¹ David ai fapa Solomon in Israel ram a ukhnak kho amam i; Bawipa a Pathian in a hmuifu pe ai mi thawmlian ah bawn i.

² Solomon in a ralbawi ralkap thawng khat hotu le zakhat hotute hmuahhmuah, innsang ai hotute, acuzah lam bawi upate le a khawmtu mizapui khiah,

³ Gibeon ai Pathian biahnak hmun feh tuhin thupe i. Pathian cengfa Moses in hampalak ramkhing ah a feh laitak ah a sa awnghnak Bawipa ai ponhlam umhnak Gibeon ah amahte veksen in feh tlang i.

⁴ Thutiam Kuang tu David in Kiriath Jearim in Jerusalem ah lang zo hang manin Jerusalem khua ai Ponhlam sahnak songah um i.

⁵ Hur ai fapa Uri, Uri ai fapa Bezalel ai bawn awnghnak dar ai bawnhnak puleng khai Gibeon ah Bawipa ai Ponhlam hmaiah um i. Ciata ah Solomon le mizapui tu Pathian bia tlang i.

⁶ Ponhlam hmai ai umhnak dar ai bawnhnak puleng vumah hibawlhnak sel in Solomon in Bawipa bia i; sumhnam thawng khat ro ai puleng vumah maitai hibawlhnak sel i.

⁷ Cia zan ah Pathian tu Solomon hnenah lar ai, “Ziang na pe tuh ing? Na daihhnak i ngen tu,” tiin ti i.

⁸ Ciafangin Solomon in, “I pa David hnenah ithnak lianpui nai awng ngio ai tunin amah tumrul in kumpibawi i cangruai isi.

⁹ Aw Bawipa Pathian, i pa David hnenai na thukhamhnak khimruai tu; zaimantifangin siar cawk lo minung vumah kumpibawi in i bawn zo isi.

¹⁰ Minung hezah i uk thil tuhin i kulhnak fimhnak le linghnak i pe tu hram law. Cia lo fangin na minung hezah heh akontih in uk thil tuh ing?” tiin ti i.

¹¹ Cen Pathian in Solomon hnenah, “A dikmi ril isi. Lianhnak le sumsaw, ihlahle hmingthanghnak maw, na ralte thihhnak maw, ihlahle nangmah ca nunsauhnak maw ngen loin i minungte uktu kumpibawi tuhin na bawn ai anite uk thil tuhin fimhnak le linghnak i ngen manin,

¹² na ngenhnak bangin fimhnak le linghnak na pe tuh ing. Ciahlaiah aisu bang kumpibawi inkhai a nai awng lo lianhnak, sumsaw le hmingthanghnak na pe tuh ing,” ti i.

Solomon Ai Huthawm Le lianhnak

¹³ Cen Solomon tu Pathian biahnak hmun, Ponhlam cianghlim umhnak Gibeon in Jerusalem ah let ai Israel ram khiah uk i.

¹⁴ Siphuh le siphuhleng tampui nai tum ai siphuhleng thawng khat le za li, le siphuh vumto ralkapte ca siphuh thawng hlaihnih nai i. A hrekkhat tu Jerusalem khua songah dah ai a hrekkhat tu khuapui dangdang ah dah i.

¹⁵ Israel ram a uk songah sui le ngun heh Jerusalem khua songah lungto zah in tam ai cedar thingkung tu thaikung zah in tam i.

¹⁶ Kumpibawi ca thilri laitu in Egypt le Kue in siphuhte lai ai,

¹⁷ siphuhleng khai Egypt in lai i. Siphuhleng pakhat tu ngun tangka zaruk in lai ai, siphuh lu khat heh ngun tangka za le sawmnga in lai i. Siphuh le siphuhleng a laihnak tepawl tu Hit le Syria kumpibawite hnen ahkhai zuarh de i.