2 Samuel 9 - Zanniat Bible

David Le Mephibosheth

¹ Nikhat ah David in, “Saul ai songkhat in a nungmi pakhat tal um aw im? Um lekhaw Jonathan manin anite vumah ninghiohnak hmuh i nuam i,” tiin ti i.

² Ciafangin Saul ai hnenum pakhat Ziba tihnak um ai ani heh David hnenah fehruai i. A feh fangin, David in, “Ziba isim?” tiin zawt i. Ziba in, “Na relhnak bang ing, Bawipa,” tiin ti i.

³ David kumpibawi in, “Pathian hnenah thu i rel zohnak bangin Saul songkhatte vumah ninghiohnak hmuh i nuam i: a nungmi pakhat tal um aw lai im? tiin zawt i. Ziba in, “Jonathan ai fapa pakhat um lai ai a ke ze i,” tiin ti i.

⁴ David in, “Akonah um i?” tiin zawt i. Ziba in, “Lodebar khua, Ammiel ai fapa Machir inn ah um i,” tiin rel i.

⁵ Ciafangin Jonathan ai fapa heh David in ko i.

⁶ Saul ai fasuan, Jonathan ai fapa Mephibosheth a hleng fangin kihzah upathnak in David ai hmaiah kun i. David in, “Mephibosheth,” tiin ko i. Ani in, “Bawipa, heta ah um ing,” tiin ti i.

⁷ Ciafangin David in, “Na thinlau mah. Na pa Jonathan ai i ithnak manin na vumah ninghiohnak nai ing. Na pu Saul ai lairam hmuahhmuah heh na pe leh tuh sek ai nang tu kaimah hnenah rong ai tuh ṭiode isi,” tiin ti i.

⁸ Ciafangin Mephibosheth tu a lu ut lehthio ai, Bawipa kai tu uico thi cia rin tluk lo ing. Zaimanin hetlukin ning i hio lawmlam isi?” ti i.

⁹ Cen kumpibawi David in Saul ai hnenum Ziba heh ko ai, “Saul le a songkhatte ai naihnak hmuahhmuah heh na bawipa Saul ai fasuan Mephibosheth hnenah pe tuh sio ing.

¹⁰ Nangmah le na fapate le na hnenumte in amahte loram heh vai tu ilai na bawipa Saul ai songkhatte aih tuhin rong khawm tlang tuh i si. Ikhalselai amah Mephibosheth tu kaimah hnenah rong ai tuh ṭiode i,” tiin ti i. (Ziba in fapate hlainga le hnenumte kul nai i).

¹¹ Ciatih bangin Ziba in, “Kumpibawi na thupehnak bangin bawn tuh sio ing,” tiin ti i. Mephibosheth tu kumpibawi ai fapa bangin David hnenah rong ai ṭiode i.

¹² Cen Mephibosheth in Mika tihnak fapa nai i. Ziba ai songkhatte tu a veksen in Mephibosheth ai hnenum ah cang tlang i.

¹³ Ciatihin a ke a zemi Mephibosheth tu Jerusalem ah um ai rong tu kumpibawi hnenah ai i.