2 Samuel 8 - Zanniat Bible

David Ai Ralkapbur Ralnehhnak

¹ David in Filistin mite heh neh ai Filistin mite ai ukhnak ramte khai sut sio i.

² Cen Moab mite khai neh ai a pom mite tu laipua ah bokruai ai ri in a teh hnuaah minung ṭhen thum in ṭhen hnih tu rek ai ṭhen khat tu zuah i. Ciatihin Moab mite tu David ai kuthnia ah um le ngunkhuai pe tlang de i.

³ Cen a vumta Euphrates Runpui hiangai ramte neh nuam in a feh fangin Zobah ram kumpibawi, Rehab ai fapa Hadadezer heh David in tawng ai neh i.

⁴ David in Hadadezer ai siphuh vumto ralkapte thawng khat za sarih le ke ralkap thawng kul pom ai lengduktu siphuhte tu a kaiza tha sat sek i. Siphuhleng zakhat duk khop lek zuah i.

⁵ Cen Damascus khua ai Syria ralkapte tu Hadadezer bawm tuhin kawi tlang ai ralkapte thawng kul hluanhnih heh David in rek berh i.

⁶ Syria ram songah ralkap dah ai a kuthnia minung ah cang ai ngunkhuai pe tlang i. A fehhnak cangcang ah Bawipa in David tu ralnehtu cangruai i.

⁷ Hadadezer kumpibawi ai ralbawite in awhhnak sui lumte tu David in lang ai Jerusalem ah fehpui i.

⁸ Hadadezer ai ukhnak Betah le Berothai khuapuite in dar tampui khai lang i.

⁹ Hadadezer ai ralkapte hmuahhmuah David in neh sio i, ti khiah Hamath khua kumpibawi Toi in a za fangin,

¹⁰ a fapa Joram heh David hmuak tuhin le angpui tuhin David hnenah hlat i. David ai nehhnak Hadadezer tu kumpibawi Toi in vel tampui tawng awng zo i. Ciamanin Joram in sui le ngun le dar ai bawnhnak khokhengte heh David lehsawng pe tuhin koih i.

¹¹ David in khokhengte tu Pathian biahnak ah hmang tuhin pe i. Cen Edom ram, Moab ram, Ammon ram, Filistin ram le Amalech ramte a nehhnak in a langhnak sui le ngun le,

¹² Zobah kumpibawi Hadadezer hnenin a langhnak thilri songlawi hrekkhat khai Pathian hnenah pe i.

¹³ David tu Ci phairawn ai Edom mi thawng hlairiat a rekhnak in a let fangin hmingthang amam i.

¹⁴ Edom ram songai hmun tampui ah ralkapte dah ai Edom mite tu a kuthnia minung ah cang i. Khuahacang ah Bawipa in David tu nehtu cangruai i.

¹⁵ David in Israel ram pumpuhluk uk ai a minungte tu rem niu le dikcang ngai in uk i.

¹⁶ Zeruiah ai fapa Joab tu a ralkapte hotu i. Ahilud ai fapa Jehoshaphat tu laibu awhtu i.

¹⁷ Ahitub ai fapa Zadok le Abithar ai fapa Ahimelech tu suangbawite i. Seraiah tu zung cazi i.

¹⁸ David kumpibawi kiltu Kereth mi le Peleth mite a hotu tu Jehoiada ai fapa Benaiah i. David ai fapate tu suangbawite i.