2 Samuel 7 - Zanniat Bible

David Hnenah Nathan Thucahhnak

¹ David kumpibawi tu ral nai loin ramuktu ai kumpibawi inn ah dap niu in a um ngah fangin,

² Prophet Nathan hnenah, “Sik tu, kai i umhnak tu cedar thing ai sahnak inn i ai, Pathian Thutiam Kuang sawn hlam songah dah i,” tiin ti i.

³ Ciafangin Nathan in, “Bawn na nuamhnak bawn tu. Bawipa na hnenah um i,” ti i.

⁴ Ikhalselai cia zan ah Bawipa in Nathan hnenah,

⁵ “David i sal pa hnenah feh ta tulai, i umhnak tuhin biakinn satu tuh heh nangmah ilo isi.

⁶ Israel mite Egypt ram an i suahpui ai panin tunnia tian biakinn songah um awng lo ing. I feh hmuncang ah ponhlam songah um de ing.

⁷ Israel mite thawn i fehhnak hmuahhmuah ah Israel hotu tuhin ṭuanvo i pehnak mi konghoitute hnenah, zaimanin kaimah caah cedar thing in biakinn sa tlang lo i si, tiin ti awng lo ing.

⁸ Ciamanin David heh rel tulai Kaimah Cungnungber Bawipa ai i ponghnak tu hetihin i: i minung Israel mite konghoitu tuhin nangmah heh hampalak ai tuu na khalh hmun in na ko ing.

⁹ Kai tu na fehhnak hmuahhmuah ah tel ai na ralte neh sio ing. Cen laipua vumai mithupui ber bangin mihmingthang in na bawn tuh ing.

^10-11 I minung Israel caah hmun ril tuhai ciata ah aisu inkhai hnaihnok nawn loin um tlang tuh i. Hemi ram a hleng ai panin anite tu mihngalte in tawng ṭiode i. Ikhalselai ciatihin tu i tuh nawn lo i. Na ralte hnenin na hup tuhai tesinfa tampui na pe tuh ing, tiin thu na kham ing.

¹² Na nunhnak bo ai na pu le na pate hnenah na phum fangin khai na fapa pakhat heh kumpibawi ah bawn tuhai a ukhnak ram tu hatruai tuh ing.

¹³ Kaimah caah biakinn sa tuhai a tesinfate ai ram ukhnak tu a kumzangza in kho tuh i.

¹⁴ Kai tu a pa i tuhai ani tu i fapa i tuh i. Sualhnak a bawn fangin khai a pa in a fapa tu nun a zirh de bangin ani tu nun zirh tuh ing. Minung in nunzirhhnak ah fungkek a hmang de bangin hmang tuh ing.

¹⁵ Ikhalselai a hnenin i ithnak tu lang leh tuh lo ing. Nangmah kumpibawi na ihnak tuhin Saul hnenin i ithnak i lang leh bangin lang leh tuh lo ing.

¹⁶ Tesinfa nai tuh betbo ai na ukhnak tu a kumzangza in khoruai tuh ing. Na kumpibawi ukhnak tu bo thil tuh lo i,’ tiin rel tu,” tiin ti i.

¹⁷ Pathian in a hnenai a phuanghnak hmuahhmuah heh Nathan in David hnenah rel sio i.

David Ai Anghnak Sawngen

¹⁸ Ciafangin kumpibawi David tu Bawipa umhnak Ponhlam ah feh ai a to kongin sawngen i: “Maw Bawipa Pathian, kai tu zaikhai ilo ing! Kaimah ca thil na bawnhnak hmuahhmuah co tuhin i tlak hrimhrim lo i. I innsangte khai tlak lo i.

¹⁹ Bawipa Pathian, hetah ai a tam deuh khai bawn tuhlai isi. Hmai lam can ai i tesinfate caah thukhamhnak bawn zo isi. Cia thu tu, maw Bawipa, i hnenah fiangruai zo isi.

²⁰ Maw Pathian, i ngen tuhhnak zaikhai um nawn lo ihang. Na sal pa kai heh i ling sio isi.

²¹ Hemi thil hmuahhmuah heh na bawnhnak le na tumhnak i. Hetluk ai a ngaihsunurkul thil heh nangmah in i lingruai zo isi.

²² Aw Bawipa Pathian, zaitluk ngaihsunurkul isi? Nangmah bang aisu khai um lo i; kinmah rori in kin ling sio bangin na bangtu Pathian aisu khai um lo i.

²³ Nangmah ai minung cang tuhin na o zomi Israel mite bang laivum ah aisu khai um lo i. Nangmah in na hming tu thangruai ai na minungte caah thil maksak le ngaihsunurkul tampui bawn isi. A dang miphunte le a khuavangte tu na minungte lampui tluangruai tuhin hnawt sek isi. Israel mite tu nangmah ai tuhin Egypt ram an na luatruai zohnakte i.

²⁴ Na miphun Israel mite tu kumzangza in na minung ah bawn ai Bawipa nangmah heh amahte Pathian cang zo isi.

²⁵ “Ciamanin Bawipa Pathian, kaimah le i innsang ca na thukhamhnak hmuahhmuah heh a kumzangza in khimruai tu hram lai, bawn tuh ing na tihnak tu bawn tu sio law.

²⁶ Na hming tu a kumzangza in thang tuhai mi in, ‘Cungnungber Bawipa tu Israel uktu Pathian i,’ tiin ti tuh i. Cen i tesinfate tu catloin kumpibawi cangruai tu hram law.

²⁷ Cungnungber Bawipa, Israel ai Pathian, i tesinfate tu kumpibawi i tuh ngio in na larruai zo manin na hnenah ralpha ngai in saw i ngen ngamhnak i.

²⁸ “Aw Bawipa Pathian, nang tu Pathian isi ai, na thukhamhnak tu khimruai ṭiode isi. I hnenah hetluk pha thukhamhnak bawn zo isi.

²⁹ Ciamanin Bawipa, na mithmai pha cotu i tuh ṭio in i tesinfate tu nangmah in tunin hmuifu pe tu hram law. Bawipa Pathian, nangmah in he thukhamhnak tu bawn zo ai i tefate ai vumah na hmuifu heh a kumzangza in um tu hram selaw,” tiin ti i.