2 Samuel 5 - Zanniat Bible

David Tu Israel Le Judah Kumpibawi Cang I

¹ Israel miphunte hmuahhmuah Hebron ai David hnenah kawi tlang ai, “Kin tu na thi le na sa i ing.

² Kin hnua lamai kumpibawi Saul in a kin uk awng laiah, Israel mite raltawnghnak hmun an na hoi fangin, amah Pathian rori in a minungte tuukhal bangin kilkhawltu tuh le uktu tuhin thu na kham i,” tiin ti tlang i.

³ Ciamanin Israel mite hotute hmuahhmuah Hebron khua David hnenah kawi tlang i. Pathian hmaiah David thawn thukhamhnak bawn ai Israel kumpibawi tuhin David khiah thau pawh i.

⁴ David tu kumpibawi a cang fangin kum sawmthum i ai kum sawmli song kumpibawi ṭuan i.

⁵ Hebron in Judah ram kum sarih le a hrek uk ai, Jerusalem an Israel le Judah ram a veksen in kum sawmthum le kum thum song uk i.

⁶ David le a ralkapte tu Jerusalem khua tawng tuhin feh tlang i. Cia khua ai a ummi Jebus mite in David in kin neh tuh lo i, tiin ruat tlang ai, “Lut thil tuh lo isi; mitcaw le kawngbai tepawl inkhai na kham ben tuh i,’ tiin ti tlang i.

⁷ Ikhalselai David in Zion khua ai ralte a ṭanghnak ralkulh heh lang sio ai Zion khua tu David khuapui ah cang ihang.

⁸ Cia nia ah David in a minungte hnenah, “Jebus mite i hua tlukin i huatu um aw i sim? Rek berh lesingkhaw pha i ti tlang aw i sim? Tiluanghnak kua ah feh tlang tu ilai mitcaw le kongbaite tianin rek tusek ih,” tiin ti i. Ciamanin mitcaw le kongbaite tu Bawipa inn ah lut thil tuh lo i,” tiin a tihnak i.

⁹ Cen ral ṭanghnak ai a sahnak ralkulh a lang hnuaah David tu ciata ah um ai, “David ai khuapui,” tiin a hming bawn i. Millo tihnak hmun an pan ai ralṭanghnak tiang betbo le ciami khua a cingkim in tiang sio i.

¹⁰ Cungnungber Bawipa Pathian khiah a hnenah um manin David tu ni khat hnua ni khat hat amam i.

¹¹ Tyre kumpibawi Hiram in amahte ram aiawh in David hnenah palai hlat ai David ai inn sahnak tuhin cedar thing khai kuat i. Inn satu tuhin zungthiamte le lung inn tiang thiamtute khai kuat i.

¹² Ciamanin Israel kumpibawi ah Bawipa Pathian in i khoruai zo i, ti le a minung Israel mite manin a ukhnak tu khangsoruai i, ti khai David in lingfiang i.

¹³ Hebron in Jerusalem ah a thawn hnuaah David in Jerusalem ah nupui le nuzawlte tam amam nai ai fanu le fapa tampui in cawi i.

¹⁴ Jerusalem ai a naihnak a fate tu Shammua, Shobab, Nathan, Solomon,

¹⁵ Ibhar, Elishua, Nepheg, Japhia,

¹⁶ Elishama, Eliada le Eliphelet i.

Filistin Mite Neh I

¹⁷ David tu kumpibawi cang zo i ti khiah Filistin mite in a za tlang fangin a ralkapte veksen in suak ai David pom tuhin feh i. David in ciami thu a za fangin ralṭanghnak ralkulh inn ah feh i.

¹⁸ Filistin ralkapte tu Rephraim phairawn tihnak hleng ai ciata ah um tlang i.

¹⁹ Ciafangin David in, “Filistin mite tawng ngang maw? Tawng lengkhaw neh ngang maw?” tiin Bawipa zawt i. Bawipa in, “Feh tulai tawng tu. Nehhnak na pe tuh ing,” tiin ti i.

²⁰ Ciamanin David tu Baal Perazim ah feh ai Filistin mite heh neh i. “Tilian bangin Bawipa in i ralte tu pahsuak i,” tiin David in ti i. Ciamanin ciami hmun heh Baal Perazim tiin ti tlang i.

²¹ Filistin mite in a milimte hlum sio manin David le a ralkapte in lang sio i.

²² Cen Filistin ralkapte tu Rephraim phairawn ah let ai um tlang leh i.

²³ David in Bawipa heh zawt ai Bawipa in, “Heta incen tawng malaw. Hel tulai a hnua lamin balsam thingkungte umhnak hiangin tawng tu.

²⁴ Thingkung vumah ke feh awthawm za le sikhaw vaikhat pahin tawng tu. Zaimantifangin Filistin ralkapte neh tuhin na hmaiah Bawipa kaimah feh zo ing tihnak i,” tiin ti i.

²⁵ David in Bawipa ai relhnak bangin bawn ai Filistin ralkapte tu tlan tlang ai Geba in Gezer tian hnawh i.