2 Samuel 3 - Zanniat Bible

¹ Saul ai songkhatte a ṭantu ralkapte le David le a ralkapte tu raipui tawng dun ṭiode i. David tu ni khat hnua ni khat hat amam ai a ralte tu ni khat hnua ni khat ṭawnṭai tete i.

David Ai Fapate

² Hebron ai a suakmi David ai fapate tu a hnia lamai bangin i. Pakhathnak tu Amnon i ai a nu tu Jezreel khuami Ahinoam i.

³ A pahnihhnak tu Khileab i ai a nu tu Nabal ai a thihsanhnak, Karmel khuami Abigail i. A pathumhnak tu Absalom i ai a nu tu Geshur ram kumpibawi Talmai ai fanu Maacah i.

⁴ A palihnak tu Adonijah i ai a nu tu Haggith i. A pangahnak tu Shephatiah i ai a nu tu Abital i.

⁵ A parukhnak tu Ithream i ai a nu tu Eglah i. Hemi fapate tu Hebron ah tehnak pawl i.

David Hnenah Abner Hleng I

⁶ Saul songkhat a ṭantu ralkap le David ralkapte a tawng dun betbo fangin Saul songkhat a ṭantu ralkapte songah Abner tu thunaitu cang deuhdeuh i.

⁷ Nikhat ah Saul ai fapa Ishbosheth in Abner tu Saul ai a nuzawl Aiah ai fanu Rizpah thawn it kawm i, tiin sual hluk i.

⁸ Ciafangin Abner tu a thinraw ai, “Mi zuartu ah i ruat isim? Judah mite naruaihtu ah i ruat isim? A hampan in na pa le a unaute le a rualpuite hnenah a ṭangtu thliahthlo ing ai, David kut songah na hlengruai awng lo ing. Ciatih inapui tunnia ah nupang thawn sual i hluk isi.

^9-10 Hemi ram tu Saul le a tesinfate hnenin lang tuhai David tu Israel ram le Judah ram, khat lam hmur Dan in a khat lam hmur Beersheba tian, a uktu kumpibawi ah cangruai tuh ing, tiin Bawipa Pathian in David heh a thukhamhnak i. Ciatih bangin bawnsuak hlahle ingkhaw Pathian in i rek tuseh,” tiin ti i.

¹¹ Ishbosheth in Abner heh a kih ze manin kamkhat khai sawn ngam lo i.

¹² Cialai ah David tu Hebron ah um ai a hnenah Abner in palai hlat ai, “Hemi ram tu aisu in kin uk tuh cuang i? Kaimah thawn lungkhimhnak laikhen bawn tulai Israel ram na neh tuh sio in na bawm tuh ing,” tiin thucah i.

¹³ Ciafangin David in, “Pha i! Lungkhimhnak bawn tuh ing. Ikhalselai i hnenah na kawi fangin Saul ai fanu Michal na koih fang ian in bawn tuh ing,” tiin ti i.

¹⁴ Cen Ishbosheth hnen ahkhai David in palai hlat ai, “I nupui Michal i pe leh tu. Amah co tuhin a man ah Filistin mi zakhat ai vunhmur zakhat pe awng ing,” tiin ti i.

¹⁵ Ciamanin Ishbosheth in Michal heh Laish ai fapa a pasal Paltiel hnenin lang leh i.

¹⁶ Paltiel in a nupui Michal tu a siang lo ze manin kap burbo in Bahurim khua tian hlun i. Ciata ah Abner in, “Let tuhang,” ti ai Paltiel heh let i.

¹⁷ Abner tu Israel mite hotute hnenah kawi ai, “David ning kumpibawi tuhin ning daihhnak tu a raipui zo i.

¹⁸ Tun heh ning ca can pha ber i. Bawipa Pathian in, ‘I sal pa David hmang tuhai i minung Israel mite tu Filistin mite le a dang a ralte kut songin o tuh ing,’ tiin a tihnak tu ling tlang sio i si,” tiin ti i.

¹⁹ Abner tu Benjamin mite khai thu rel betbo ai, cia hnuaah Israel le Benjamin mite ai lungkhimhnak rel tuhin Hebron ah David hnenah feh i.

²⁰ Hebron ai David hnenah Abner tu minungte kul thawn feh ai David in a nite caah rong ai puai bawn sah i.

²¹ Cen Abner in David hnenah, “Aw kumpibawi, feh ta tuhai Israel ram heh a veksen in na ukhnak songah koihpui tuh ing. A kumpibawi ah na can tuh i ing. Ciatihin na thindaihhnak ngah tuhai he ram tu a pumpui in uk tuh isi,” tiin ti i. Abner tu David in muang niu in fehruai i.

Abner Rek I

²² Cia hnuaah Joab le David ai ralkapte tu mi a simhnak in let ai thilri a suthnak tepawl tampui tlun tlang bial i. Abner tu David in a hlat zo manin Hebron ah um nawn lo i.

²³ Joab le a ralkapte a hleng tlang fangin Abner tu David kumpibawi hnenah kawi napui David in himniu in kuat leh zo i, tiin rel i.

²⁴ Ciafangin Joab tu David hnenah kawi ai, “Ziang bawn isi? Na hnenah Abner kawi ai zaimanin ciatih menma in fehruai isi?

²⁵ Nangmah na zawl nuam in na feh hmun hmuahhmuah le na bawnhnak hmuahhmuah hliah nuam in na hnenah kawi i ti ling lo isim?” tiin ti i.

²⁶ David hnenin a suak hnuaah Abner hnuaah hnawh tuhin mi hlat ai, Sirah namkum in letpui tlang leh i. Ciami thu tu David in zaikhai ling lo i.

²⁷ Abner tu Hebron a hlengpui fangin thuthup rel tuh bangin Joab in fehpui ai a thinhnai ah dawt ai thi i. Ciatihin Joab in Abner khiah rek i, zaimantifangin a naupa Asahel a rek awng manin phuzul i.

²⁸ Ciami thu David in a ling fangin, “I minungte le kai incen Abner a rekhnak thu ling hrimhrim lo i ing, ti khiah Bawipa Pathian in ling i.

²⁹ A thisan heh amah Joab le a innsang vumah hleng tuseh. Sankhat hnua sankhat, Joab ai songkhat hnenah thisan sor ur maw, phar ur maw, ihlahle mah hlanlam vak ben lo ai faikiang thawn vak kul maw, raltawnghnak ai a thimi maw, ihlahle rong aih kham nai loin maw, um tlang tu ngio seh,” tiin ti i.

³⁰ Gibeon ai a tawngdunhnak ah Abner in a nau Asahel a rek manin Joab le Abishai in a rek thunvehnak i.

Abner Vui I

³¹ Ciamanin David in Joab le a minungte tu a hnikpon zik in buri hnikpon sil in Abner kah tlang tuhin thupe i. Cen a phum fangin mithi kuang ai hnuaah David kumpibawi tu a ke rori in vak i.

³² Abner tu Hebron ah phum ai a hlanmual ah David kumpibawi tu a rohpui in kap i. Mi zongzong khai kap tlang sio i.

³³ David in la in kah ai: Mivoi bangin Abner thi isim?

³⁴ Na kut na pen lo i, Na ke khai na khit tlang lo i; Misualte ai rekhnak na bang i,” ti i. Mi zongzong in kah tlang lala i.

³⁵ Ni tla hlanah zaital ai tuhin David tu a minungte in ruai hnelhno napui ai nuam lo i. “Nitla hlanah ziangmaw ai lengkhaw Pathian in i rek tu sawn seh,” tiin thu kham ing.

³⁶ Ciatihin a ti khiah mizapui in hmu fangin lungkhim tlang ngai i. Kumpibawi ai bawnhnak hmuahhmuah heh amahte lungkhim zia bang liang i.

³⁷ Abner thihnak thu ah kumpibawi tu tel lo i, ti khiah David ai minungte le Israel mite hmuahhmuah in ling sio i.

³⁸ Cen David in a kuthnia tlangsuakte hnenah, “Tunnia ah Israel ram hoitu pha le mithupui pakhat thi i, ti khiah ling aw i sim?

³⁹ Kai tu Pathian ai rilmi kumpibawi inapui khal ingkhaw tunnia tu i thin i nau roh i. Hemi Zeruiah ai fapate tu kaimah caah tuar har ze i. A bawnhnak bangin he misualte vumah Pathian in cawhhnak hlengruai tu hram seh,” tiin ti i.