2 Samuel 24 - Zanniat Bible

David In Mipum Siar I

¹ Israel vumah Bawipa tu a thinraw lala ai anite hnenah harsahnak hlengruai tuhin David heh, “Feh tulai Israel mite le Judah mite mipum siar tu,” tiin forh i.

² Ciamanin David in a ralkap hotu ralbawi Joab heh ko ai, “Na kuthnia bawite thawn kin ram khat lam hmur Dan in khat lam rong Beersheba tianin feh tu ilai Israel miphun hmuahhmuah mipum siar tu. Minung zaizah um i ti a ling i nuam i,” tiin ti i.

³ Ikhalselai Joab in, “Aw kumpibawi, Bawipa na Pathian in Israel mite tu tun tahin a let za in pungzairuai tu selai na nun songah ciami heh na hmu thai in bawn tu hram seh. Ikhalselai aw kumpibawi, zaimanin mipum siar na nuam i?” tiin ti i.

⁴ Ikhalselai kumpibawi in Joab le a kuthnia tlangsuakte tu a thupehnak bangin hlunruai ai ciamanin suak ai Israel mite siar tuhin feh tlang i.

⁵ Jordan runpui ti tan tlang ai Gad ram song phairawn ai um Aroer khuapui ai hlang lamah cam tlang i. Ciata in Jazer ah feh tlang ai,

⁶ Gilead le Hit ram song Kadesh ah hleng tlang i. Cen Dan hleng fangin ciata in nitlak lamah her ai Sidon ah hleng tlang i.

⁷ Cia hnuaah vingpui ai kulhhnak Tyre khuapui ah feh tlang ai ciata in Hiv khuapuite le Canaan khuapui ah hleng tlang i. A hnuataber ah Judah ram a hlang lam ber ai um Beersheba khua ah hleng tlang i.

⁸ Ciatihin a ram pumpuhluk ah tlawng sio ai hla kua le ni kul rai hnuaah Jerusalem khua ah let tlang i.

⁹ Kumpibawi hnenah, raltawng tuhin ralvang a awh ben thai pasal tu Israel ramah ting riat um ai, Judah ramah ting nga um i,” tiin rel tlang i.

¹⁰ Ikhalselai ciatihin mipumsiarhnak a bawn ngah fangin, David tu a thinnuam lo ze ai Bawipa hnenah, “Thil sual ngai bawn ngah zo ing. Aw Bawipa, i sualhnak i ngaithiam tu hram. Mivoi thil tidan bawn ing,” tiin ngen i.

^11-12 Ciatihin David ai prophet Gad hnenah Bawipa ai ponkam hleng ai, “David ril tuhin thilte pathum pe ing. Pakhatkhat ril tu selai, a vumah khimruai tuh ing, tiin David hnenah rel tu,” ti i. A thangha David a tho fangin,

¹³ Prophet Gad tu a hnenah hleng ai Bawipa ai ponghnak heh rel i. “Hemi pathumte lakah zaiber ril tuh isi? Na uk song hmuahhmuah ah rian kum thum song tlung maw? Ihlahle na ralte hnenin hla thum song tlan tuh hnelhno maw? Ihlahle na ram songah ni thum song pultlung tuh maw zaiber ril tuh isi? phaniu in ruat tulai, Bawipa hnenah thu let tuhin i rel leh tu,” tiin ti i.

¹⁴ Ciafangin David in, “Mul i ting bang ze e! Ikhalselai minung kut songah hlenghnak tahin Bawipa kut songah hleng inglai! Zaimantifangin Bawipa tu mi ninghio thai i,” tiin ti i.

¹⁵ Ciamanin Bawipa in Israel ram songah ciami zing ai panin a thukhamhnak nia tian pultlungruai i. Israel ram pumpuhluk ah Israel mite thawng sawmsarih thi i.

¹⁶ Cen Bawipa ai vancungmi in Jerusalem khua a siatsuah dawn fangin, Israel mite cawh tuh nawn lo hangin Bawipa tu a thinlung thleng lehsal ai mi a rektu thliahthlo vancungmi hnenah, “Com tu! Tawk tuseh,” tiin ti i. Cialak ah vancungmi tu Jebus mi Araunah ai fangcilhnak pum hiangah um i.

¹⁷ Cen Israel mite a rektu thliahthlo vancungmi heh David in hmu fangin, Bawipa hnenah “A mawhtu heh kaimah ing. Thilsual a bawntu heh kaimah ing. Hemi mirimsu na minungte in ziang sualhnak bawn tlang i? Na cawhhnak tu kaimah le i innsang vumah hleng tu sawn seh,” tiin ti i.

¹⁸ Cia nia ah prophet Gad tu David hnenah kawi ai, “Araunah ai fangcilhnak pum ah feh tulai Bawipa caah puleng bawn tu,” tiin ti i.

¹⁹ Gad relhnak Bawipa ai thupehnak heh David in ngai ai feh i.

²⁰ Cen Araunah in a sik fangin kumpibawi pa le a kuthnia bawite a kawi tlang lianglo khiah hmu i. Cia sawng fangin feh ai David ai hmaiah laipua tong in kun ai,

²¹ “Aw kumpibawi pa, zaimanin kai na sal pa heh i leng isi?” tiin zawt i. Ciafangin David in, “Mi tampui thihnak pultlung a lawm tuhin na fangcilhnak pum heh na lai tuhai Bawipa caah puleng bawn i nuam manin heta ah kawi ing,” tiin ti i.

²² Araunah in, “Aw kumpibawi pa, na kulhnak hmuahhmuah lang tulai Bawipa hnenah pe tu. Puleng vumah maitai hibawlhnak hrangah heta ah kawlpawcang um i. Cen tih tuh zanthing tu kawlpaw hawngrolh le fangcilhnak suatte um bial i,” ti i.

²³ Araunah in a naihnak hmuahhmuah kumpibawi hnenah pe ai, “Bawipa na Pathian in na hibawlhnak heh na sang tu hram seh,” tiin ti i.

²⁴ Ikhalselai kumpibawi in, “I lo i, a man na pe tuh sio ing. A man zaikhai na pe lohnak heh Bawipa i Pathian hnenah hibawlhnak sel tuh lo ing,” ti i. Cen Araunah ai fangcilhnak pum le kawlpawcang heh ngun tangka sawmnga in lai i.

²⁵ Ciata ah puleng tiang ai maitai hibawlhnak le rualrem hibawlhnak heh Bawipa hnenah sel i. Ciatihin Bawipa in a sawngenhnak ngai sah ai Israel ram songah pultlung lawm leh i.