2 Samuel 21 - Zanniat Bible

Saul Ai Fasuante Rekhnak

¹ David a uk song kum khat hnua kum khat a peh in kum thum song rian tlung i. Ciamanin Bawipa Pathian hnenah David in zawt ai Bawipa in, “Saul in Gibeon mi a rek manin Saul le a innsang tu mirektute i,” tiin ti i.

² (Gibeon mite tu Israel mite ilo i. Israel mite in huphim tuhin a tiamhnak Amor miphunte lakah a tang sun miphun cikniu pakhat i. Ikhalselai Saul in Israel mite le Judah mite a ha ze manin Gibeon mite tu ci hmit tum i).

³ Ciamanin David in Gibeon mite tu ko ai anite hnenah, “Ning caah i bawnthilhnak zaital um awm? Pathian ai miphun vumah hmuifuhnak um tuseh, tiin sawngentu ning ihnak tuhin ning vumah thil sual a bawn zohnak heh remm leh i nuam i,” tiin ti i.

⁴ Ciafangin anite in, “Saul le a innsang thawn kin raldunhnak tu sui le ngun inkhai remm thil tuh lo i ing; Israel mite aisu khai rek tum lo i ing,” ti tlang i. “Ciatih ilekhaw ning caah ziang bawn inglai ning daih i?” tiin David in zawt i.

⁵ Ciafangin anite in, “Saul in Israel ram songah hin pakhat khai tang loin ci kin hmit tum sio i.

⁶ Ciamanin Saul ai tesinfate pasarih kin pe tulai, Pathian ai rilhnak kumpibawi Saul ai khuapui Gibeah rori ah Bawipa Pathian hmaiah rek tuh i ing,” tiin ti i. “Ning pe tuh ing,” tiin David in ti i.

⁷ Ikhalselai Bawipa ai hming sal in David le Jonathan thukhamhnak a bawn kawm zo manin, Saul ai tupa Jonathan fapa Mephibosheth khiah David in luatruai i.

⁸ Saul ai fapate pahnih, Aiah ai fanu Rizpah thawn a naihnak Armoni le Mephibosheth heh pom i. Cen Saul ai fanu Merab le Meholah khuami Barzillai ai fapa Adriel ai naihnak fapate panga khai pom sio i.

⁹ Anite pasarih tu David in Gibeon mi hnenah pe ai mual vumah Bawipa ai hmaiah rek i. Amahte pasarih in hmunkhat in thi tlang i. A rek can tu khal can a bo dawn, barley sangvut khawm hampan can i.

¹⁰ Ciafangin Aiah ai fanu, Saul ai nusun Rizpah in buri lang ai lungpui vumah ihphah phah ai, rong khawm can ai panin fur ruah si hlanlo tianin a luang heh sun ai vaniute inkhai ituseh, zan ai ramsate inkhai ituseh, ai tuh loin kil ngio i.

¹¹ Rizpah ai thil bawnhnak tu David in a za fangin,

¹² feh ngiarngo ai Saul ai ruhte le a fapa Jonathan ai ruhte Gilead ai Jabesh mite hnenin lang i. (Gilboa mual vumah Filistin mite in Saul a rek nia ah, Saul le Jonathan luangte tu Filistin mite in Bethshan ai mizapui taikhawmhnak hmunah tar i. Ciata in Jabesh mite in ru tlang i).

¹³ David in Saul le Jonathan ai ruhte tu lang ai Saul ai tefate pasarih rek a tuar mite ai ruhte khai khawm sio i.

¹⁴ Cen Benjamin ram Zela khua ai a umhnak Saul ai fapa Kish ai hlanmual ah Saul le a fapa Jonathan ai ruhte heh phum tlang leh i. Kumpibawi David ai thupeciahnak bangin zaizongza heh bawn tlang sio i. Ciahnua fangin amahte ram hrang sawngenhnak heh Bawipa Pathian in sang leh i.

Filistin Miham Pawl Tawng I

¹⁵ Filistin mite le Israel mite karlak ah ral tho lehthio i. Cen David le a ralkapte tu feh tlang ai Filistin mite tawng i. Ciatihin tawng dun laitak ah David tu cawl ngai i.

¹⁶ Ciafangin miham ngai, tlami phun, Ishbibenob tihnak pa tu ralvang a phundang ngai pai ai, pawng hra rit dar faipui awh in kawi ai David heh rek tum i.

¹⁷ Ikhalselai cialak fangin Zeruiah ai fapa Abishai in David bawm ai Filistin pa heh bawh ai rek lio i. Cen David ai ralkapte in amahte hnenah kawi in raltawng tuh ve loin thukhamruai i. “Israel mite caah tleuhnak isi ai hmit tuh lio na siang lo i ing,” ti tlang i.

¹⁸ Gob tihnak hmunah Israel mite le Filistin mite tu tawng dun lala i. Ciata ah Hushah mi Sibbecai in tlami bang ai mihampui Saph heh rek i.

¹⁹ Ciahnua Gob ah Filistin mite thawn tawng dun tlang lala i. Ciata ah Bethlehem khuami Jair ai fapa Elhanan in Git khuami mihampui pa, a ha thiamvang tia fai naitu Goliath khiah rek i.

²⁰ Cen Gath ah tawngdunhnak um lala ai cia khua ah raltawng hiam ngai mi hampui pakhat um i. Ani tu a kut ah kutzungte paruk le a ke ah kezungte paruk ṭen, a veksen zung kul hluanli nai i.

²¹ Israel mite heh ralcai hnelhno ai, ciafangin David ai upa Shammah ai fapa Jonathan in ciami pa heh rek i.

²² Hemi tlami bang a ham puipui minungte pali tu Gath miham pawl ai tesinfate i ai David le a ralkapte in rek berh i.