2 Samuel 19 - Zanniat Bible

Joab In David Hau I

¹ Kumpibawi David tu kap ṭiode ai a fapa Absalom ngai in um i tiin Joab heh rel i.

² Cen kumpibawi tu a fapa a thi manin mithi ngai in um i, ti khiah David ai ralkapte hmuahhmuah in a za fangin amahte veksen ca ciami ral neh nia heh lungsia nia sawn ah cang i.

³ Ralkapte a let fangin, ral a sung hnua zakthi ai a tlanmi ralkap bangin, khuapui songah thawmvang nai loin lut tlang i.

⁴ Kumpibawi tu a hmai hup ai, “Absalom, I fapa, Absalom i fapa,” tiin kap hnelhno i.

⁵ Ciafangin Joab tu kumpibawi inn ah feh ai a hnenah, “Nangmah le na fapate le na fanute le na nupuite le na nuzawlte nunhnak a huphimtu ralkapte tunnia ah a zakthiruai isi.

⁶ Na ittute tu hnong ai na huatu sawn bawm isi. Na ralbawite ituseh, na ralkapte ituseh, nangmah ah zaikhai ilo i ing, ti khiah fiang ngai in hmuh zo isi. Tunnia ahhen Absalom nung in kinmah sawn thi inglai, lung na khim ngai tuh i, ti hmu i ing.

⁷ Ciamanin feh tulai thathohnak thu a tlawmniu tal na ralkapte hnenah rel tu. Rel na nuam hlah lekhaw, Bawipa hming sal in thu na rel ing: thangha ah ralkap pakhat khai na hnenah um tuh nawn lo i. Na sen lai in tunnia tian, na nun songai na tawkhnak harsahnak hmuahhmuah lakah ciami heh nangmah ca a harsa ber tuh i,” tiin ti i.

⁸ Cen kumpibawi tu tho ai khuapui kotka hiangah to leh i. Ciata ah a um khiah minungte in za fangin a hnenah kawi tlang sio i. Cialak ah Absalom hnenah a ṭangtu Israel mite tu tlan ai a inn ṭen ah tlung tlang i

⁹ Cen a ram pumpuhluk in amahte relkhawmhnak ber tu, “Kin ralte kut songin kumpibawi David in kin hup zo i. Filistin mite kut songin kin luatruai ai tunah Absalom manin amah rin kin ram songah um nawn lo i.

¹⁰ Absalom tu kin kumpibawi tuhin thau pawh napui raltawnghnak ah thi zo i. Zaimanin kumpibawi David heh tlungruai leh tuhin aisu tal in tawlrel lo ising?” ti tlang i.

Jerusalem Ah David Let I

¹¹ Israel mite in relhnak thuthang tu kumpibawi David hnenah hleng i. Ciamanin suangbawite Zadok le Abiathar heh Judah konghoitute hnenah hlat ai, “Kumpibawi a inn ah tlungruai tuhin zaimanin ning hol ning rit ipa?

¹² A songkhat rori i si ai amah ai taksa rori i si. Zaimanin let tuh thu ahhen a hnuakfualtu ber i si? tiin ti ta tu ih,” ti i.

¹³ Cen David in anite hnenah, Amasa hnenah rel tuhin hetihin thucah i, “Nang tu i songkhat isi. Tunai panin Joab ai tumrul in i ralkap kotu ah na bawn tuh ing. Na bawn hlah lengkhaw Pathian in i rek tuseh,” ti i.

¹⁴ Ciatihin David ai ponkam a um manin Judah mi zongzong ai thinlung tu, mi pakhat ai thinlung bangin, thleng sio ai, “Na kuthnia ai tlangsuakte thawn let leh tu ih,” tiin David heh cah tlang i.

¹⁵ Ciamanin David tu let ai, runpui ah hoi tuhin Gilgal ah a kawitu Judah mite in Jordan runral in hmuak tlang i.

¹⁶ Cen cialak fangin Bahurim khua an Gera ai fapa, Benjamin mi Shimei heh kumpibawi David tawk tuhin Jordan lamah dawp ve i.

¹⁷ Shimei tu Benjamin miphun in minung thawng khat thawn feh tlang ve i. Cen Saul innsang ai hnenum Ziba tu a fapate hlainga le a hnenum kul thawn, kumpibawi hlanah Jordan runpui ah hleng tlang zo i.

¹⁸ Runpui ti tan tlang ai kumpibawi ai innsangte khat lam ralah hoi bawmtu ah le kumpibawi ai a kulhnak hmuahhmuah bawntu ah cang tlang i. Kumpibawi in runpui a tan dawn fangin Shimei tu a hmaiah bok ai,

¹⁹ “Aw kumpibawi, Jerusalem an na feh nia ah thil i tisualhnakte pawl khiah hih mahang law. I vumai thinrawhnak ah hmang hram malai a ruat khai ruat nawn hram mahang.

²⁰ Bawipa i sual i tiin i ling dun man nakhaw, sak lam miphun hmuahhmuah songah a hmasaber in na tawktu i canghnak heh!” tiin ti i.

David In Shimei Ninghio I

²¹ Ciafangin Zeruiah ai fapa Abishai in, “Bawipa Pathian in kumpibawi in a ril zomi cuk a cam manin Shimei heh rek tuh tengteng mi i,” tiin ti i.

²² Ikhalselai David in Abishai le a u Joab hnenah, “Aisu in ning ruathnak ning zawt i? Kaimah caah hnaihnokhnak petu ah cang ning nuam im? Tun tu kaimah heh Israel kumpibawi ing ai tunnia ah Israel mite pakhat khai rekhnak tuar tuh lo i,” tiin ti i.

²³ Cen Shimei hnenah, “Aisu inkhai na rek tuh hrimhrim lo i,” tiin cukcam in thukham i.

David In Mephibosheth Ninghio I

²⁴ Cen Saul ai tupa sin Mephibosheth khai kumpibawi tawk tuhin kawi ve i. Jerusalem an kumpibawi tlan ai nehtu bangin a let lai hlanlo, Mephibosheth in a ke som lo i, a khahmul khai met loin, a hnikpon khai sawp lo i.

²⁵ Mephibosheth tu Jerusalem an feh ai kumpibawi hnen a hleng fangin kumpibawi in, “Mephibosheth, Jerusalem an i suak fangin zaimanin feh ve lo isi?” tiin zawt i.

²⁶ Mephibosheth in, “Aw kumpibawi, nangmah in i linghnak bangin kai tu ke i ze i. Na hnenah feh tuh ve in i laak kung dan sah tu, tiin i hnenum pa ruai napui i zawl lio i.

²⁷ Ciahlaiah na hnenah i zuar lai betbet i. Ikhalselai nang tu Pathian ai vancungmi bang isi ai a dik na tihnak tu bawn tu.

²⁸ Thungai in tifangin i pa ai songkhatte hmuahhmuah nangmah kumpibawi in rek tlak sio i ing, ikhalselai na cabuai ai rong ai thil tuhin i bawn isi. Ciamanin kumpibawi pa, na hnenin ninghiohnak ngen ngam tuh khai i nawn lo ing,” tiin ti i.

²⁹ Ciafangin kumpibawi in, “Na rel tuhhnak zaikhai um nawn lo ihang. Saul ai lairam le thilri hmuahhmuah heh Ziba thawn khan kawm tu ih, tiin ruatcat zo ing,” tiin ti i.

³⁰ Mephibosheth in, “Bawipa, a veksen in amah in nai tu sio seh. I bawipa nangmah a nung in na let heh kaimah ca tawk zo ihang,” tiin ti i.

David In Barzillai Ninghio I

³¹ Jordan runpui khat lam ral ai kumpibawi hla tuh ve in Gilead mi Barzillai khai Rogelim in kawi ve i.

³² Barzillai tu a tar ngai ihang; kum sawmriat i. Milian ngai i ai Mahanaim ah kumpibawi a um lai in a cawmtu i.

³³ Kumpibawi in a hnenah, “Jerusalem ah i hlun tulai na kilkhawl tuh ing,” ti i.

³⁴ Ikhalselai Barzillai in, “A raipui i nung tuh nawn lo ihang. Zaimanin Jerusalem ahhen na hlun tuh ṭaiṭo ing?

³⁵ Kum sawmriat i khim zo ai nun khai kaimah caah man nai nawn lo ihang. I ai i dinghnak khai a urhnak ling nawn lo ai nupang ituseh pasal ituseh la mawi a sahnak khai za nawn lo ihang ing. Kumpibawi nangmah rimsu na petu menma tuh ing.

³⁶ Ciatih lawmlam in na ninghiohnak co tuh i tlak hrimhrim lo i. Ciamanin Jordan runpui ral tlawmniu lek na hla tuh ing.

³⁷ Cen i let siang tulai kin khua ai i nu le i pa hlanmual hiangah i nunhnak heh bo tu ve menma hang seh. Cen heta ah i fapa Khimham um i; kumpibawi, na hnenah fehpui tulai a pha na tihnak bangin sik tu,” tiin ti i.

³⁸ Ciafangin kumpibawi in, “Khimham tu fehpui tuhai na daihhnak bangin sik tuh ing. Cen na ngenhnak cangcang heh na bawt tuh ing,” tiin ti i.

³⁹ Cen David le a minungte hmuahhmuah Jordan runpui tan tlang i. David in Barzillai heh thut ai hmuifu pe i. Cia hnuaah Barzillai tu a inn ah tlung i.

Judah Le Israel Thueldunhnak

⁴⁰ Judah mi zongzong le Israel mite a hrek in Kumpibawi kil ai Jordan runpui a tan hnuaah Gilgal ah feh tlang i. Cen Khimham inkhai hlun ve i.

⁴¹ Ciafangin Israel mite hmuahhmuah kumpibawi hnenah feh tlang ai, “Kumpibawi, na minungte ituseh, na innsang le nangmah ituseh, Zaimanin kin unau Judah mite in amahte ai bul bangin na ham ai Jordan runpui ral tianin na kil tlang ngio i?” tiin ti i.

⁴² Judah mite in, “Zaiman bawn tuh lo i ing? Kumpibawi tu kin phunpui hehin. Zaiman ciami manin thin ning raw ipa? Amah in rong kin do vuah i sim? Lehsawng kin sum vuah i sim? tiin sawn tlang i.

⁴³ Cen Israel mite in, “Amah thawn phunkhat ning ita inkhai kumpibawi David heh ningmah tahin hamthilhnak a let hra in nai i ing. Zaiman zoh kin suam tlang i si? Thungai in ti fangin, kumpibawi letruai leh tuhin a tawlrel hmasatu heh kinmah i ing,” tiin ti tlang i. Ikhalselai Israel mite ai ponkam tahin Judah mite ai ponkam tu hrang deuh ngaingai i.