2 Samuel 18 - Zanniat Bible

Absalom Neh Ai Rek I

¹ Kumpibawi David in a ralkapte tu khawm ai a thawng le a za in khan ai a hotu bawite dah zianzo i.

² Cen raltawng tuhin bur thum in fehruai ai bur khat tu Joab in ho i; bur hnihhnak tu Joab ai naupa Abishai in ho ai a bur thumhnak tu Git khuami Ittai in ho i. Kumpibawi in, “Kaimah khai feh tuh ve ing,” tiin ti i.

³ Ikhalselai anite in, “Kin hnenah feh ve mah. Kinmahte kin tlan sio, ihlahle a hrekkhat kin rek berh ita inkhai kin ralkapte ca ahcen zaikhai dang tuh cuang lo i. Nangmah pakhat tu kinmah thawng hra tluk isi. Hemi khua ah um tulai bawmtu kin kuat thil silai pha tuh sawn i,” tiin ti tlang i.

⁴ “A pha ber ning tihnak bawn tuh ing,” tiin kumpibawi in ti i. Cen kotka hiangah ding ai a ralkapte a thawng a za in a feh tlang heh sik ngio i.

⁵ Ralkapte hotute Joab, Abishai le Ittai hnenah, “Kaimah i ruat in Absalom heh tuahmawh mah i law,” ti i. Ralkap hotute hnenah David ai thupehnak tu ralkapte hmuahhmuah in za tlang sio i.

⁶ David ai ralkapte tu Israel ralkapte tawng tuhin feh ai Epharaim Tupui songah tawng dun tlang dekdo i.

⁷ Israel ralkapte tu David ai ralkapte in a roh ngai in neh ai cia nia ah ralkapte thawng kul thi i.

⁸ Hampalak pumpalah ah tawng dun tlang ai ralvang ai a thihnak tahin tupui songah a paimi tam sawn i.

⁹ Cen rinlopui in David ralkapte le Absalom tawk dun i. Absalom tu a laak to ai a laak tu hlokhli thingkung hnia in dawp ai thingkak in Absalom heh a lu in awk meng i. A kalauk tu dawp teu ai Absalom tu a ke lai khing lo in khailiat i.

¹⁰ David ai ralkap pakhat in Absalom a hmu fangin, “Bawipa, Hlokhli thingkung vumah Absalom khai meng hmu ing,” tiin Joab hnenah rel i.

¹¹ Ciafangin Joab in, “Absalom e! Thungai maw? Zaimanin ciata ah rek lo isi? Rek ta silai kaimah rori in ngun tangka fang hra le elpen pakhat na pe tuh napui ing,” tiin ti i.

¹² Ikhalselai ciami pa in, “Tangka thawng khat i pe silai khai kumpibawi ai fapa tu i kutzung inkhai tong tuh lo ing. Kumpibawi pa in ‘Kaimah i ruat in Absalom heh tuahmawh tuh lo i si,’ tiin nangmah le Abishai le Ittai hnenah thu a ning pehnak heh za sio ve ing.

¹³ Cen ciami thu hlun loin Absalom heh rek inglai kumpibawi in i ling leh tuh thotho ai ciafangin nang in i ṭan ngam tuh na um lo ing,” tiin ti i.

¹⁴ Ciafangin Joab in, “Nang thawn pon dun heh can bo menma i,” ti ai faipuite pathum lang ai hlokhli kung ai a nung in a khai liat Absalom ai a thinhnai ah dawt i.

¹⁵ Cen Joab ai ralkapte sawmkhat in Absalom heh kulh tlang ai rek i.

¹⁶ Ciafangin raltawng com tuhin Joab in thirhlung tumruai ai a ralkapte tu Israel mite a hnawhhnak hmun an let tlang sio i.

¹⁷ Absalom luang khiah lang ai tupui songai khur thukpui pakhat songah lon tlang ai a vumah lungto pum bial i. Israel ralkapte tu dawp ai amahte inn ṭen ah tlung tlang i.

¹⁸ Absalom tu a hming sawngtu tuhin fapa a nai lo manin a nun laiah Kumpibawi Phairawn tihnak hmunah lungtian pakhat tiang i. Ciami lungtian heh amah hming cuang in bawn ai tun tianin Absalom lungtian tiin ti tata i.

Absalom Thihnak Thu David Rel I

¹⁹ Cen Zadok ai fapa Ahimaaz in, “Bawipa Pathian in kumpibawi khiah a ralte kut in a hup manin dawp tuh teu ai ciami thuthang heh rel tuh ing,” tiin Joab hnenah ti i.

²⁰ Joab in, “I lo i, tunnia ahcen zaibang thuthang khai rel tuh lo isi. Than na nuam lekhaw ni dang ah than leh tu; zaimantifangin kumpibawi ai fapa a thi manin tunnia ahcen rel tuh lo isi,” ti i.

²¹ Cen Ethiopia mi sal pakhat hnenah, “Feh tulai na hmuhnak heh kumpibawi rel tu,” tiin Joab in ruai i. Joab ai hmaiah upathnak pe in ut ai rang ngai in dawp i.

²² Ciafangin Ahimaaz in, “Akontih in a cang ta inkhai hemi thu tu rel tuh thotho ing,” tiin ti i. Joab in, “Zaimanin ciami thu tu than na nuam heh i? Ciami thu na than manin ziang lehsawng khai ngah tuh cuang lo isi,” ti i.

²³ “Zaizai inkhai feh tuh thotho ing,” tiin Ahimaaz in ti i. Ciafangin Joab i, “Ciatih ilekhaw feh tu,” ti ai Ahimaaz heh feh i. Ahimaaz tu Jordan phairawn lampui in dawp ai Joab ai hlatmi Ethiopia mi sal pa heh kan teu i.

²⁴ David tu Khuapui kotka pahnih karlak ah to ngio i. Ralviltu pa tu khuapui kulhhnak vingpui vumah kai ai kotka vum cangah ding i. Khua cuan ai mi pakhat a dawp thliahthlo khiah hmu i.

²⁵ Kumpibawi heh ko ai rel i. Kumpibawi in, “Amah pakhat lek lekhaw thupha koih i tuh i,” ti i. Thuphurtu pa tu nong deuhdeuh i.

²⁶ Cen ralviltu pa in midang pakhat a dawp thliahthlo khiah hmu lala i. Kotka kiltu pa ko ai, “Sik tu, midang pakhat a dawp thliahthlo khiah,” tiin rel i. Ciafangin kumpibawi in a ni khai thupha keng tuh i bang ti i.

²⁷ Ralviltu pa in, “A hmasa ai a dawptu pa dawpdan a sik fangin Ahimaaz bang i,” tiin ti i. Kumpibawi in, “Ahimaaz tu mipha i ai thupha keng tuh i,” ti i.

²⁸ Ahimaaz in kumpibawi hnenah, “Thupha i,” tiin auh i. Cen a hmaiah bok ai, “Kumpibawi, nangmah na tawngtu hmuahhmuah vumah nehhnak na petu Bawipa na Pathian heh thangphat in um tuseh,” tiin ti i.

²⁹ Kumpibawi in, “Absalom cak awm? tiin zawt i. Ciafangin Ahimaaz in, “Bawipa, na ralbawi pa Joab in i hlat fangin thu a hnok ze manin ziang cang i ti ling lo ing,” tiin ti i.

³⁰ “Khiata ah ding rih tu,” tiin kumpibawi in ti ai Ahimaaz tu a hla thah ah ding i.

³¹ Cen Ethiopia mi pa khai hleng ve ai kumpibawi hnenah, “Aw kumpibawi, thupha keng ing. Na tawngcaitu vumah Bawipa Pathian in tunnia ah nehhnak na pe i,” tiin ti i.

³² “Absalom cak awm? tiin kumpibawi in zawt i. Ciafangin Sudan mi pa in, “Aw bawipa, Absalom bangin na ralte le na tawngcaitu hmuahhmuah heh cang tusek seh,” tiin ti i.

³³ Ciafangin kumpibawi David tu a lungsia ai kotka vumai hlam songah kai ai a kai kongin, “Aw i fapa Absalom, Absalom i fapa! Nangmah tumrul in kaimah thi sawn inglai e, i fapa! Aw Absalom, i fapa,” tiin kap i.