2 Samuel 17 - Zanniat Bible

Ahithophel Le Hushai In Absalom Ruathnak Pe

¹ Cen Ahithophel in Absalom hnenah, “Ralkapte thawng hlaihnih ril tuhai tun zan rori ah David hnawh tuh ing.

² A cawl roh laiteng ah le a thinraw laiteng ah tawng tuh ing. A thin lau in a minungte tu tlan tlang tuh sio i. Cialak ah kumpibawi tu amah lek rek tuh ing.

³ Cen mothar a pasal hnenah a let bangin a minungte hmuahhmuah na hnenah letpui tuh sio ing. Rek na nuamhnak tu minung pakhat lek hehin. Midang hmuah tu him tuh sio i,” tiin ti i.

⁴ Ciami a za fangin ruathnak pha bik i, tiin Absalom le Israel konghoitute in ruat tlang i.

⁵ Cen Absalom in, “Hushai ko tu ih, ani relhnak ngai tuh ve ing,” ti i.

⁶ Hushai khai kawi ai Absalom in Ahithophel ai relhnak hmuahhmuah Hushai hnenah a rel hnuaah, “Ahithophel ai ruathnak hlun tuh ing maw? Nang tang na ruathnak zaitin i?” tiin zawt i.

⁷ Cen Hushai in, “Tun ṭum Ahithophel ai thuruah pehnak tu pha lo i,” ti i.

⁸ Na pa David le a ralkapte tu raltawng cia bang i ai tupui songai a fate sutsahhnak vom bangin a laukul i ti khiah nangmah in ling sio isi. Na pa tu raltawng ciabang i ai zan ah a ralkapte hnenah cam lo i.

⁹ Tun khai khukua songah maw, hmundang ah maw relh tuh i. Cen David in na minungte tawng tuhai cia sawng fangin ciami thu a zatu hmuahhmuah in, “Absalom ai ralkapte tu a bo ihang e!” tiin au tlang tuh dekdo sawn i.

¹⁰ Ciafangin chintit bangin kih nai lo ral pha ber pa rin a thinlau in hlawng tuh i; zaimantifangin Israel ram song ahcen aisu inkhai na pa tu raltawng thiam ze i ti ling tlang sio ai a ralkapte khai raltawng hat zeze i, ti khiah ling tlang sio i.

¹¹ Kai ai i ruathnak tu hetihin i: Israel ram khat lam hmur Dan in a khat lam hmur Beersheba tian Israel mite hmuahhmuah tifingriat ai runsiat zah heh ko tulai nangmah rori in raltawnghnak khiah ho tu.

¹² Konteng ah a um ta inkhai David tu si tuhai a ling man hlanah zan naidawh bangin tawng tuh ising. Amah ituseh a minungte ituseh pakhat khai luat tuh lo i.

¹³ Khua pakhatkhat songah a lut ta inkhai kin minung Israel mite in rihual keng tu selai, ciami a relhhnak khua heh lungto pakhat khai tang lo tianin phairawn ah duk tuh sek ising,” tiin ti i.

¹⁴ Ciafangin Absalom le Israel mite in, “Hushai ai ruathnak tu Ahithophel ai ruathnak tahin pha sawn i,” tiin ti tlang i. Absalom vumah hnophnak hleng tuhin Ahithophel ai ruathnak tu Bawipa in pelh i.

David Luat I

¹⁵ Cen Absalom le Israel konghoitute hnenai a thuruah a relhnak le Ahithophel ai thuruah pehnak hmuahhmuah heh Hushai in suangbawite Zadok le Abiathar hnenah rel sio i.

¹⁶ Cen Hushai in, “Tun rang tu ih! David hnenah thucah tu ilai hampalak ai rawnti a tanhnak hmunah zan khat khai cam mahang seh. Amah ituseh a minungte ituseh, pom le rek a tuar lohnak tuhin rang ngai in Jordan runpui tan in tlan tlang tuseh,” tiin ti i.

¹⁷ Abiathar ai fapa Jonathan le Zadok ai fapa Ahimaaz tu khua songah lut ngam loin Enrogel hmun an lo iang kawm hlen i. Hnenum fenu pakhat in khua songai thil canghnak le thula khiah rel de ai cia hnuaah anite in kumpibawi David heh rel salawn de i.

¹⁸ Ikhalselai vaikhat tu naupang paniu in hmu ai ciami pa in Absalom hnenah rel i. Ciafangin Jonathan le Ahimaaz tu tlan kawm ai Bahuriam khua ai pakhat pa inn ah hleng i. Ciapa in a inn hiangah khur pakhat nai ai ciami khur songah lut kawm i.

¹⁹ Cen ciami pa ai nupui in khur heh a khuk sio hnuaah aisu inkhai ling thai loin ciami khur vumah fangcang pho i.

²⁰ Absalom ai minungte kawi tlang ai cianu khiah, “Akon ah Ahimaaz le Jonathan um i?” tiin zawt i. Ani in, “Runpui ti tan zo i,” tiin ti i. Si napui hmu lo manin Jerusalem ah let tlang leh i.

²¹ Amahte feh hnuaah Ahimaaz le Jonathan tu khur songin suak kawm ai David hnenah feh kawm ai thu hmuahhmuah rel kawm i. Ahithophel ai a ralcaihnak thu rel kawm ai David heh, “Rang ngai in suak tulai runpui khat lam ralah feh tu,” tiin ti kawm i.

²² Ciamanin David le a minungte tu Jordan runpui tan tlang ai khuavar dawn fangin khat lam ralah suak tlang sio i.

²³ A thuruah pehnak a hlun lo khiah Ahithophel in a hmu fangin a laak to ai a khua ah tlung i. A innsang hnenah a ro a cah hnuaah amah le amah ri awk in thi i. Ciatihin Ahithophel tu thi ai a pa ai hlanmual ah phum i.

²⁴ Absalom le a ralkapte tu Jordan runpui tan ai khat lam ral a hleng tlang fangin David tu Mahanaim khua ah hleng zo teu ihang.

²⁵ (Absalom in Joab tumrul in Amasa heh a ralkapte hotu tuhin dah zo i. Amasa tu Ishmael mi Jether ai fapa i; A nu tu Nahash ai fanu Abigail i ai Joab ai nu Zeruiah ai unau i).

²⁶ Cen Absalom le a minungte tu Gilead ah cam tlang i.

²⁷ David tu Mahanaim khua a hleng fangin Ammon ram Rabbah khua ai a ummi, Nahash ai fapa Shobi le Lodebar khuami Ammiel ai fapa Machir le Gilead ram Rogelim khuami Barzillai in hmuak tlang i.

²⁸ Hleng le lai bel le ihphah le pon khai keng tlang i. Cen David le a ralkapte ca sangvut sang, barley sang, nimden vut, nimden theu, be, maṭal,

²⁹ khoitizu, thawpah, kawlpaw hnawi ha, tuu sa le kawlpaw sa keng ai aih tuhin pe i. Hampalak ah David le a ralkapte tu cawl tuhai rikam in ti hal tuh i, ti ling tlang i.