2 Samuel 16 - Zanniat Bible

David Le Ziba

¹ David tu tlang vuman tlawmniu a feh fangin, ruat lopui in, Mephibosheth ai hnenum pa Ziba in hmuak i. Ziba in laakte pahnih fehpui ai a laakte tu sangzawl zahnih, cabit a ro cia bawr zakhat, thingthai a loih thar bawr zakhat le cabitti saphaw thawl khat phur tlang i.

² Kumpibawi David in, “Thil he zah heh akonah dah tuh isi?” tiin zawt i. Ciafangin Ziba in, “Laakte tu kumpibawi ai innsangte to tuhhnak i, sang le thingthaite tu na minungte aih tuh i; cabitti tu na minungte hampalak ah a cawl fangin ding tlang tuseh,” tiin ti i.

³ Kumpibawi in, “Na bawipa Saul ai tupa Mephibosheth tu akonah um ipa?” tiin zawt i. Ciafangin Ziba in, “Jerusalem ah um i; zaimantifangin a pu Saul ai ukhnak tu tunṭum ah Israel mite in, ‘I hnenah i pe leh tuh i,’ tiin a sang manin i,” tiin ti i.

⁴ Kumpibawi in Ziba hnenah, “Mephibosheth ai thilri hmuahhmuah heh nangmah ai sio ikhaw,” ti i. Cen Ziba khai a lu ut ai, “Kai tu na sal ing. Kumpibawi nangmah ai mithmai pha a cotu ṭio inglai maw!” ti i.

David Le Shimei

⁵ Feh betbo ai Bahurim a hleng fangin Saul ai songkhat, Gera ai fapa Shimei in Kumpibawi David tawk tuhin mi cukcam kongin suak i.

⁶ David le a kuthnia tlangsuakte khiah lungto in sep dekdo ai ralkapte le a kiltute in David heh kulh liang napui sep thotho i.

⁷ Shimei in David heh cukcam ai, “Tlan tu, tlan tu teu; mirek pa, misualral pa;

⁸ Saul ai ukhnak sut ai Saul ai a songkhat tampui na rek manin Bawipa Pathian in tun tu na vumah phu na zul ihang. Tun tu Bawipa in na ukhnak heh na fapa Absalom hnenah pe zo ihang. Na bo ihang, mirek pa!” tiin cukcam dekdo i.

⁹ Ciafangin Zeruiah ai fapa Abishai in kumpibawi hnenah, “Aw kumpibawi, zaimanin hemi uico pa ai cukcamhnak tu tuar cuahco menma isi? Feh tuhai a lu hial tuh ing,” tiin ti i.

¹⁰ Kumpibawi in Abishai le a u Joab hnenah, “Hemi tu ning thawn seng dun lo i. Pathian in ruai manin i cukcam lekhaw, ‘Zaiman cukcam isi? tiin aisu in ti thil tuh i?” tiin ti i.

¹¹ Cen David in Abishai le a kuthnia tlangsuakte hnenah, “I song suak i fapa rori inrin i rek tum manin he Benjamin mipa ai thil bawnhnak vumah aican tuh pha zaikhai um lo i. Bawipa ai ruaihnak manin a vumah zaikhai ti mah ih, a duhtawk in cuk i cam tu dek seh.

¹² Bawipa in i rimsu harsahnak heh hmu tuhai, tunai a i cukcam thliahthlo caah Bawipa in hmuifu i pe sawn khai i thai i,” tiin ti i.

¹³ Ciamanin David le a minungte tu vak tlang betbo i. A khel lamin Shimei in hlun ai a fehhnak tlang vum lam rong in feh ai a feh kongin cukcam kong betbo ai lungto le hnawmborh in sep kong betbo i.

¹⁴ Kumpibawi David le a minungte tu Jordan a hleng fangin cawl tlang ze manin David tu cawlum i.

Absalom Tu Jerusalem Hleng I

¹⁵ Absalom le a hnenah a ṭangtu Israel mite hmuahhmuah Jerusalem khua ah lut tlang ai Ahithophel khai tel ve i.

¹⁶ Cen David ai rinsanmi a rualpa Hushai in Absalom heh tawk ai, “Kumpibawi a nun sau tuseh! kumpibawi a nun sau tuseh!” tiin ti i.

¹⁷ Ciafangin Absalom in, “Na rualpa David ai minung i nawn lo ihang sim? Zaimanin hlun lo isi?” tiin zawt i.

¹⁸ Hushai in, “Akontih in hlun thil tuh ing? Bawipa Pathian ai rilhnak le he minungte le Israel mizapui ai rilhnak lek kai incen hlun tuh ing. Na hnenah um tuh ing.

¹⁹ Thungai in tifangin, i bawipa ai fapa na ruaih loin aisu ruaih tuh cuang ing? Na pa ai na i ruaih bangin tun tu nangmah na ruaih tuh ing,” tiin Absalom heh ti i.

²⁰ Ciafangin Absalom khai her ai Ahithophel hnenah, “Na ruathnak i rel tucuk! Akontih in thil bawn tuh ing? tiin zawt i.

²¹ Ciafangin Ahithophel in, “Feh tulai na pa ai inn, kumpibawi ai innkiltu tuhin a hlumhnak a nusunte sualpui tu. Ciatihin bawn lesikhaw a pa ai thin rawtiar roh zo i tiin Israel mite hmuahhmuah in na ling tuhai na hnenai a ṭangtute tu ṭang tuh amam i,” tiin ti i.

²² Ciamanin kumpibawi inn diphun vumah hlam sa ai Israel mizapui mithmuh ah Absalom in a pa ai nusunte heh itpui i.

²³ Ciami san ahcen Ahithophel ai ruathnak heh Pathian ai ponkam ngaingai bangin ruat tlang i. David inkhai hlun ai Absalom inkhai hlun ve i.