2 Samuel 15 - Zanniat Bible

Absalom Raltho I

¹ Ciahnua fangin Absalom in siphuhleng le siphuhte lai ai amah kilkhawltu tuhin ralkapte sawmnga dah i.

² Zingniu in tho ai amahte khuapui kotka lampui hiangah ding de i. Kumpibawi in i thu i rel sah tuseh, tiin a kawitu thunaitu pakhatkhat a tawk fangin Absalom in ko ai, “Akonan kawi isi,” tiin zawt i. Cen thunaitu pa in, “Bawipa Israel ram ciata khiata in kawi ai cia phun khia phun ing,” tiin ti de i.

³ Ciafangin Absalom in, “Ngai rih tu, na thu heh nangmah in neh tuhhnak rori i. Ikhalselai kumpibawi incen na thu heh na ruat sah tuh hang lo i.

⁴ Aw, he ramah thukhantu inglai i nuam bang ngai. Thukhantu inglai thu a naihnak le ngen tuh le zawt tuh a naitute i hnenah a kawi tlang fangin dik ngai le fel ngai in rel sah tuh napui ing,” tiin ti de i.

⁵ Ciapa tu upathnak in Absalom hmaiah a ut fangin Absalom in a kut in awh de ai a kuah hnuaah thut de i.

⁶ I thu i rel sah tuseh tiin kumpibawi hnenai a kawitu Israel mite hmuahhmuah Absalom in ciatihin ti ṭiode i. Ciamanin Absalom in anite thinlung heh kuai ngah sio i.

⁷ Kum li a rai hnuaah Absalom in kumpibawi hnenah, “Bawipa Pathian hnenai i thukhamhnak bangin Hebron ah i feh siang tu hram.

⁸ Geshur ramai i um awng laiah Bawipa hnenah, ‘Jerusalem ah i hlengruai leh lesikhaw Hebron ah na bia tuh ing,’ tiin thukham ing,” ti i.

⁹ Kumpibawi in, “Thinnuamniu in feh tu,” ti ai Absalom khai Hebron ah feh i.

¹⁰ Ciafangin Absalom in Israel miphun hmuahhmuah hnenah mi hlat ai, “Thirhlung tum aw ning za fangin, ‘Hebron ah Absalom tu kumpibawi cang zo ihang,’ tiin au tlang tuh i si,” tiin thucah sio i.

¹¹ Absalom ai a sawm mite zahnih khai amah thawn Jerusalem an feh tlang ve i. Absalom ai thusia ruathnak heh ling tlang lo i. Thinlung thiangniu in feh tlang i.

¹² Cen hibawlhnak a sel laitak ah Absalom in kumpibawi David ai thu a ron mi, Gilo khuami Ahithophel cah ai hibawlhnak a sel laitak ah hleng i. Ciatihin kumpibawi amahte ai tawngcaihnak tu roh amam ai Absalom a hluntu khai tam amam i.

Jerusalem In David Tlan I

¹³ David hnenah mi pakhat kawi ai, “Israel mite ai thinlung tu Absalom hnenah mer zo sek ihang,” tiin rel i.

¹⁴ Ciafangin David in Jerusalem ai a ummi a kuthnia ai tlangsuakte heh, “Absalom ai kut in luat kin nuam lekhaw rang ngai in tlan kin kul i. Rang tu ih! ciahlahle heta ah hleng tuh vut ai kin neh tuh i; khuasong mi tu ralvang thawn sat tuhai kin ci kin mit tuh berh i,” tiin ti i.

¹⁵ “I, kumpibawi pa; na relhnak hmuahhmuah bawn tlang tuh sio i ing,” tiin a tlangsuakte in ti tlang i.

¹⁶ Ciatihin kumpibawi tu suak ai a innsangte le a kuthnia tlangsuakte hmuahhmuah in hlun tlang i. Ikhalselai kumpibawi inn kilkhawltu tuhin a nuzawlte pahra khiah hlum i.

¹⁷ Kumpibawi le a minungte tu Jerusalem khua songin suak tlang fangin a hnuataber inn ah com tlang i.

¹⁸ A kuthnia ai tlangsuakte tu a hiangah ding tlang ai kumpibawi kiltu Kereth ralkapte le Peleth ralkapte tu hmaiah lan betbo i. Gath an a hluntu ralkapte zaruk khai lan i.

¹⁹ Amahte hotu Ittai hnenah David in, “Zaimanin kin hnenah feh ve isi? Let tulai kumpibawi thar hnenah um tu sawn. Nang tu ramdang mi isi ai na ram a zamtu isi.

²⁰ Heta ah can comniu song lek um ai zaimanin i hnenah vakvai tuh ṭaiṭo in na bawn tuh ing? Ciahlaiah kaimah khai a konteng ah feh tuh ing, ti ling dun lo ing. Let tulai na ram minungte khai letpui tu. Cen Bawipa tu ning vumah ninghiohnak a naimi le rinsantlak itu ṭio seh,” tiin ti i.

²¹ Ikhalselai Ittai in, “Aw kumpibawi pa, Pathian hming sal in thu na kham ing. Nangmah na feh hmuncang ah, thihhnak hmun ita inkhai feh tuh ve ing,” tiin ti i.

²² Ciafangin David in, “Pha i! Ciatih ilekhaw feh tu,” ti i. Ciamanin Ittai tu a ralkapte le a innsang a fanaute thawn feh tlang i.

²³ David ai hnuahlunte a feh tlang fangin mizapui tu a roh ngai in kap tlang i. Kumpibawi David tu Kidron rawnti niu tan ai a minungte inkhai a tan tlang hnuaah hampalak ramkhing lamah feh betbo i.

²⁴ Suangbawi Zadok khai tel ve ai, Thutiam Kuang phur kongin Levi mite khai tel tlang ve i. Mi zongzong khuapui songin a suak ben hlanlo Thutiam Kuang tu ciata ah dah i. Suangbawi Abiathar khai tel ve i.

²⁵ Cen kumpibawi in Zadok hnenah, “Thutiam Kuang tu khua songah letpui leh tu. Bawipa ai mithmai pha hmu lengkhaw ni khatkhat ahcen i letruai lehsal tuhai Kuang le a umhnak heh hmu lehsal tuh ing.

²⁶ Cen Pathian ai mithmai pha tawk hlah lengkhaw zai zing tuh hang in,” tiin ti i. Amah ai a lungkhimhnak tu amah in bawn tuseh,” tiin ti i.

²⁷ Cen Zadok hnenah, “Nangmah le na fapa Ahimaaz le Abiathar le a fapa Jonathan tu thin hlamuang niu in khua songah let tlang leh tu ih.

²⁸ Cen ning hnenin thu i ngah hlanlo hampalak ramkhing rawnti i tanhnak hmun an ning iang tuh ngio ing,” tiin ti i.

²⁹ Ciamanin Zadok le Abiathar in Thutiam Kuang tu Jerusalem ah letpui kawm leh ai ciata ah um i.

³⁰ Cen David tu Olive mual ah a kap kongin kai i. A ke lolek in kai ai lungsia in a lu khuk i. A hluntu hmuahhmuah khai lu khuk tlang ai kap kongin mual vumah kai tlang i.

³¹ Cen kumpibawi ralcaitu lakah Ahithophel khai tel ve ai Absalom hnenah ṭang i ti David hnenah rel i. Ciafangin David in, “Aw Bawipa nangmah ai ninghiohnak in Ahithophel ai thuruah pehnak khiah thulovang ah cangruai tu hram law,” tiin Pathian hnenah sawngen i.

³² David tu mualvum, Pathian a biahnak hmun a hleng fangin a rinsanhnak a rualpuite Archi hin Hushai in hmuak i. Hushai in a hnikpon zik sek ai a lu ah laivut phulh i.

³³ Ciafangin David in, “I hnenah na tel inkhai na hnempui tuh ngial lo i.

³⁴ Ikhalselai khuapui songah let in Absalom hnenah, ‘Aw kumpibawi, na pa ai naruaihtu i bangin tun tu nangmah ai naruaihtu tuh ihang ing,’ ti tulai Ahithophel thuruah pehnak heh el tuṭio lai ciatihin kaimah caah na phathnem tuh i.

³⁵ Suangbawi Zadok le suangbawi Abiathar khai um kawm tuhai kumpibawi inn in thu ning relhnak hmuahhmuah heh anite hnenah than tu cingcing.

³⁶ A fapate Ahimaaz le Jonathan khai anite hnenah um kawm ai he a fapate hnenin thula na khawlhnak hmuahhmuah i lingruai tu cingcing law,” tiin Hushai heh ti i.

³⁷ Ciamanin David ai rualpa Hushai tu Jerusalem ah let ai Absalom a hleng fangin hleng ve i.