2 Samuel 14 - Zanniat Bible

Joab In Absalom Letruai I

¹ Zeruiah ai fapa Joab in kumpibawi David in a fapa Absalom ngai ze i, ti ling i.

² Ciamanin Tekoa khua ai a ummi nupang mifim pakhat khiah a hnenah kawi tuhin cah i. Joab in ciami nu hnenah, “Mithi ngai bangin um bawn tu, mithi ngaihnak hnikpon sil tulai, na sam khai kiat loin um tu. Can raipui mithi ngai zomi bangin um tu.

³ Ciatihin kumpibawi hnenah kawi tulai, i thukhamhnak thu heh rel tu,” tiin ti ai, a rel tuhhnak thu heh Joab in rel cia sio i.

⁴ Nupang nu tu kumpibawi hnenah feh ai, upathnak pe in a lu laipua tong in a kun hnuaah, “Aw kumpibawi i bawm tu hram law,” tiin ti i.

⁵ Ciafangin kumpibawi in, “Ziang na daih i?” tiin zawt i. Nupang nu in, “Bawipa, kai tu hmaitong farah ing. I pasal in i thihsan zo i.

⁶ Bawipa fapate pahnih nai ing. Ikhalselai ni khat ah hampalak ah a unau in tawng dun ai a khantu aisu khai um lo manin pakhat in pakhat deuh heh rek lio i.

⁷ Cen bawipa, i songkhatte hmuahhmuah in, ‘Tunai a nunglaimi heh kin hnenah kin pe tu, a unaupui a rek manin amah rek tuh i ing,’ iti tlang dekdo i. Rek tlang ngaingai lekhaw kai tu fapa nai tuh lo ihang ing. I nungsanhnak i fapa naihsun heh pairuai tuhai, i pasal tu hming sawngtu fapa nai loin cangruai pang tuh i,” tiin ti i.

⁸ Kumpibawi in, “Na inn ah tlung ta tu. Na thu tu na ruat sah tuh ing,” tiin ti i.

⁹ Cen nupang nu in, “Aw kumpibawi, akontih in rel khai silai mawhphurhhnak tu kaimah le i innsang in tuar tuh i ing. Nangmah kumpibawi le na innsang vumah ziang mawhphurhhnak khai um tuh lo i,” ti i.

¹⁰ Kumpibawi in, “Aisusu inkhai na hring lekhaw i hnenah kawipui tulai na hnaihnok tuh lo ihang,” ti i.

¹¹ Nupang nu in, “Aw kumpibawi, i songkhatte in a thimi i fapa ca phuzul tum ai, a nunglaimi i fapa rek tuh heh thil sual bawn tum tlang imanin, ciatihin a bawn thil lohnak tuhin Bawipa na Pathian hnenah sawngen tu,” tiin ngen i. Kumpibawi in, “A nungmi Pathian hming sal in thu na kham ing: akontih in khai na fapa heh tuahmawh tlang tuh hrimhrim lo i,” ti i.

¹² Cia hnuaah nupang nu in, “Aw kumpibawi, ning i hio tulai pon kamkhat niu na hnenah i rel siang tu, “tiin ngen lala i. Kumpibawi in, “Rel tu,” ti i.

¹³ Ciafangin nupang nu in, “Zaimanin hetluk thil sual heh Pathian ai minungte ai vumah bawn isi? Na fapa tu a tlanhnak in letruai lai lo manin tun niu ai na ponghnak lala in na vumah mawh na phurruai ihang.

¹⁴ Minung tu kin thi tlang tuh ṭen i; laipua vumah a buahnak tidap heh khawm leh a thil nawn lo bangin minung kin nunhnak khai khawm thil leh nawn lo i. Pathian inrin mithi heh nungruai leh nawn lo i. Ikhalselai kumpibawi incen ram songah um ngam loin a tlantu minung heh ko thil leh i.

¹⁵ Aw kumpibawi, mi in i hring manin na hnenah kawi ing ai, i ngenhnak i bawt tuh i, tiin umlamhnak nai ing.

¹⁶ I thurelhnak tu ngai tuhai, Pathian in a minung hnenai a pehnak ram an i fapa le kaimah cihmit tumtu pa hnenin i hup tuh i, tiin ruat ing.

¹⁷ Aw kumpibawi, nang tu Pathian ai vancungmi bang isi ai a pha le a hnawm zaizongza na lingthiam manin na thukhamhnak in i huphim tuh i tiin ruat ing. Bawipa na Pathian tu na hnenah um tu ngio seh,” tiin ti i.

¹⁸ Ciafangin kumpibawi in, “Thu pakhat na zawt tuh ing ai dik ngai in i rel tu,” ti i. “Bawipa, i zawt tu, tiin nupang nu in ti i.

¹⁹ Cen kumpibawi in, “Hemi thu ahhen Joab in na ruaihnak im?” tiin zawt i. Nupang nu in, “Aw kumpibawi pa, lai le van ko in na rel ing: na thuzawthnak na sawn tuhin akontih in khai pial thil lo ing. Na napertu Joab ai ruaihnak i. Amah in bawn tuhhnak le rel tuhhnak hmuahhmuah i rel cia sio i.

²⁰ Hetihin a tihnak tu ning thula heh tluang deuh selai tiin merh a nuam manin i. Aw kumpibawi, nang tu Pathian ai vancungmi bangin na fim ai thil canghnak hmuahhmuah ling sio isi,” tiin ti i.

²¹ Lehhnua deuh ah kumpibawi in Joab hnenah, “Na daihhnak bawn sah tuhin ruatcat zo ing. Feh tulai tlangval Absalom ko tulai heta ah koih tu,” tiin ti i.

²² Joab tu upathnak in David hmai laipua lakah bok ai, “Aw kumpibawi, Pathian in hmuifu na pe tu hram seh. I ngenhnak na i pe manin na hnenin mithmai pha ngah ing, ti ling ing,” tiin ti i.

²³ Cen tho ai Geshur ramah feh ai Absalom heh Jerusalem ah tlungpui i.

²⁴ Ikhalselai Absalom tu kumpibawi inn ah um tuh loin thupe i. “A hmu i zuam lo i,” ti i. Ciamanin Absalom tu amah inn ah um ai kumpibawi hmaiah suak awng hrimhrim lo i.

Absalom Le David Remlehhnak

²⁵ Absalom tu mipiang ngai i ai Israel ram songah amah tlukin uarhnak aisu khai um lo i. A lu in a kado tian sawibang lo i.

²⁶ A sam pha ai a sau ze a rit ze fangin kum khat ah vel khat tluk met de i. A sam tu kumpibawi ai cuaitehhnak in teh fangin pawng nga tluk rit de i.

²⁷ Absalom in fapate pathum le Tamar tihnak fanu pakhat nai ai Tamar tu fenu mawi ngai i.

²⁸ Absalom tu kumpibawi hmu loin Jerusalem ah kum hnih um i.

²⁹ Ciafangin amah aiawh in kumpibawi tawk tuhin Joab ko i, ikhalselai Joab tu kawi lo i. Ko lala napui Joab tu kawi cuang lo i.

³⁰ Ciafangin Absalom in a hnenumte hnenah, “Sik tu ih, i lo hiangniu ai lo tu Joab ai lo i ai barley sangvut khai a songah um i. Feh tu ilai mai in tai tu ih,” tiin thupe i. Ciamanin feh tlang ai Joab ai lo heh mai in tai tlang i.

³¹ Ciafangin Absalom inn ah Joab heh dawp ai, “Zaimanin na hnenumte in i lo mai in tai i?” tiin ti i.

³² Absalom in, “Kumpibawi hnenah na hlatthilhnak tuh heta ah kawi tuhin na kohnak ing. Kumpibawi hnenah feh tulai kaimah ca in hetihin i rel sah tu, ‘Zaimanin Geshur ram hlum in heta ah kawi ing? Heta tahin Geshur ramah um inglai kaimah caah pha sawn tuh napui i,’ ti i tiin ti tu. Cen kumpibawi i tawk thil tuhin i tawlrel sah tu. Mimawh i tiin i hmu lekhaw i rek tu lio seh,’ tiin ti i.

³³ Joab tu kumpibawi hnenah kawi ai rel i. Cen Absalom tu kumpibawi in ko i. Feh ai kumpibawi hmaiah laipua tong in ut i. Ciafangin kumpibawi in Absalom heh thut i.