2 Samuel 12 - Zanniat Bible

Nathan Thucah Le David Sirhnak

¹ David hnenah prophet Nathan heh Bawipa in hlat ai, “Khua pakhat ah mi pahnih um kawm ai; pakhat tu milian i ai pakhat tu mifarah i.

² Milian pa tu kawlpaw le tuu tampui nai ai,

³ mifarah pa tu a laifawmhnak tuu lu khat niu lek nai i. Ciami a tuu lu khat niu heh phaniu in sik ai a innsang ah amah le a fate lakah khang betbo i. Amah aihnak rong pe ve ai, a khuat in ti dingruai le a kawng vum rori ah cawi de i. A tuuniu tu a fanu niu tlukin ruat i.

⁴ Nikhat tu milianpa ai inn ah mikhual pakhat hleng i. A mikhual heh rong do nuam napui a sumhnam pakhat ro tuh khai siang lo i. Ciamanin mifarah pa ai tuu naihsun lang sah ai a mikhual pa heh rong do i,” tiin relruai i.

⁵ Ciafangin David tu a thinraw ai, “A nungmi Pathian hming sal in rel ing: ciabang lawmlam thilpha lo a bawntu heh thi kul i!

⁶ Ciatluk in mi ninghio nai lo imanin a langhnak heh a let li in rul leh tu tengteng seh,” tiin ti i.

⁷ Ciafangin Nathan in David hnenah, “Ciami pa heh nangmah isi! Israel ai Pathian Bawipa in, ‘Saul ai kut songin na huphim ai Israel kumpibawi ah na cangruai ing.

⁸ Saul ai ukhnak ram na pe ing; a nupuite khai na pe ing. Cen Israel le Judah ramai kumpibawi ah na bawn ing. Hemite heh tawk lai lo lekhaw a let hnih in na pe tuh napui ing!

⁹ Zaimanin i thukham hlun lo isi? Zaimanin hebang thilpha lo heh bawn isi? Raltawnghnak ah Uriah thiruai isi. Ammon mite rekruai ai a nupui heh na nupui tuhin lang isi.

¹⁰ Hetihin i thukham hlun lo ai Uriah ai nupui na ru manin na tesinfa hrekkhatte tu sankhat hnua sankhat ah sarthih in thi tuh ṭiode i.

¹¹ Na innsang song rori in vansang ai na bawntu suakruai tuh hrimhrim ing, tiin na rel cia ing. Na nupuite lang tuhai na mithmuh rori ah pasal dang hnenah i pe fangin ling leh tuh isi. Ciatihin sunlaivar rori ah na nupuite tu sualpui tlang tuh i.

¹² Nang in tu a thupruk in sual bawn isi; ikhalselai Israel mite in hmu tuh sio in na nupuite a sualpuihnak heh sunlaivar rori ah kai incen khimruai tuh ing,’ tiin ti i,” tiin rel i.

¹³ Ciafangin David in, “Bawipa ai hmaiah i sual zo i,” ti i. Cen Nathan in, “Bawipa in na ngaithiam manin thi tu na thi tuh lo i.

¹⁴ Ikhalselai hetihin thilpha lo na bawnhnak in Bawipa na zohsuamhnak heh larruai zo na imanin na fa thi tuh i,” ti i.

¹⁵ Cia hnuaah Nathan tu inn ah tlung i. Uriah ai nupui in David ai fapa a cawihnak heh Bawipa in a roh ngai in urruai i.

David Ai Fapa Thi I

¹⁶ David in a fapa cakhnak tuhin Pathian hnenah sawngen i. David tu rong zaikhai ai lo i, zansiar in a innsong suat vumah tho loin it ngio i.

¹⁷ A kuthnia tlangsuakte in suat vumah it loin tho tuhin zawl tlang hlelhhlo napui ngai nuam hrimhrim lo i. Anite thawn khai zaikhai ai nuam lo i.

¹⁸ Zarh khat hnua fangin a fapa heh thi ai a kuthnia tlangsuakte in rel ngam tlang lo i. “A fapa a nung laiah rin pon hnelhno napui kin sawn nuam lo i. A fapa thihnak thu tu akontih in rel ngam tuh ising? Amah le amah khai tuahmawh dun pang fangin,” ti tlang i.

¹⁹ Pakhat le pakhat a thupniu in a pon dun thliahthlo khiah David in a hmu fangin i fapa thi zo i tuh i, tiin ruat ai, “Nauniu tu thi zo ihang im? tiin zawt i. “I, thi i,” tiin sawn tlang i.

²⁰ Ciafangin David tu suat vuman tho ai takhlu i, a sam kiat ai a hnikpon thleng i. Feh ai Bawipa ai inn ah Pathian bia i. Cen a inn ah tlung ai rong bawtruai ai a bawt ben sawngpah ai i.

²¹ Ciafangin a kuthnia ai tlangsuakte in, “Akontih ihang, na faniu a nung lai hmuah tu kap hnelhno ai rong zaikhai ai lo isi. Ikhalselai a thi sawngpah in tho in rong ai isi. Ling thil bang hlah ing,” tiin ti tlang i.

²² Ciafangin David in, “I, i fapa a nung lai ahcen rong ul in kap hnelhno ing. I fapa thiruai loin Bawipa in ning i hio ni ngai maw, tiin ruat ing.

²³ Ikhalselai tun tu thi zo hang ai zaimanin rong heh ul tuh nawn ing? I fapa tu nungruai leh tuh im? Nikhat khat tu a hnenah feh leh tuh ve ing, ikhalselai ani tu i hnenah kawi thil tuh nawn lo ihang,” tiin ti i.

Solomon Te I

²⁴ Cen David in a nupui Bathsheba khiah hnem i. Um kawm leh ai Bathsheba in fapa nai i. A fapa tu David in Solomon tiin a hming bawn i. Solomon tu Bawipa Pathian in it ai,

²⁵ Jedidiah tiin a hming bawn tuhin prophet Nathan hnenah thupe i; zaimantifangin Bawipa ai ithnak i,” tiin ti i.

David In Rabbah Lang I

²⁶ Cia songah Joab in Ammon mite khuapui Rabbah heh ter thliahthlo ai neh dawn ihang.

²⁷ David hnenah mi hlat ai, “Rabbah khua heh tawng dekdo ai tun tu tipehnak tihnar lang zo ing.

²⁸ Ciamanin ralkapte khawm tulai Rabbah khua heh tawng tulai nangmah in neh tu. Ciahlahle he khuapui heh neh tuhai a hming tu i hming cuang in bawn tuh ing,” tiin thucah i.

²⁹ Thu a cahhnak bangin David in a ralkapte khawm ai Rabbah khua heh tawng ai neh ngaingai i.

³⁰ Ciami a langhnak khuapui ah Molech tihnak khuavang lim um ai a sui lukhuk tu pawng sawmsarih le pawng nga rit i. Ciami lukhuk songah lungmankhung khai um i. David in ciami lukhuk heh milim vuman lang ai amah lu vumah khu i. Thilri dang tampui khai khua songin lang i.

³¹ Khuasong mite tu fehpui ai, hluah le taruang le haihpui thawn naper perruai ai ukkhe khai bawnruai i. Ammon ram songai khuadang mite khai ciatih thotho in naper perruai i. Cia hnuaah David le a ralkapte tu Jerusalem ah let tlang i.