2 Samuel 11 - Zanniat Bible

David Le Bathsheba

¹ Khuakhal hang ai kumpibawite raltawng can a khim fangin, David in Joab le a kuthnia tlangsuakte le Israel ralkapte heh raltawng tuhin kuat i. Ammon ralkapte neh ai amahte khuapui Rabbah khiah kulh tlang i. Ikhalselai David tu Jerusalem ah um i.

² Nikhat zan lamah David tu sun ah a cawlum hmun an tho ai a inn diphun vumah kai i. Diphun vumah a vak hnelhno lakfangin nupang pakhat takhlu laitak hmu i. Ciami nu tu mimawi ngai i.

³ Ciamanin aisu ini ti a ling nuam in mi pakhat hlat ai Eliam ai fanu Hit mipa Uriah ai nupui Bathsheba i ti ling i.

⁴ Bathsheba koihpui tuhin David in midang hlat ai a hnenah koih i. Cen David in itpui i. (Bathsheba tu hlasiar nupangdan a naihnak a cianghlim dun a bawn ben sawng i). Cia hnuaah a inn ah tlung i.

⁵ Cen naupai ing ti a ling fangin David hnenah thucah i.

⁶ David in, Joab hnenah mi hlat ai, “Hit mi Uriah heh i hnenah i kuat tu,” ti i. Ciamanin Joab in Uriah heh David hnenah kuat i.

⁷ Uriah a hleng fangin David in ralkapte ai thu le a raltawnghnak thute zawt i.

⁸ Cen a hnenah, “Inn ah tlung ta tulai cawlum rih tu,” tiin David in ti i. Uriah tu tlung ai a inn ah David in lehsawng khai kuat i.

⁹ Ikhalselai Uriah tu a inn ah hleng lo i. Kumpibawi inn kotka ai kumpibawi kiltute hnenah cam i.

¹⁰ David in Uriah heh a inn ah tlung lo i, ti a ling fangin ko ai, “Can raipui hnuaah tlung isikhaw, zaimanin na inn ah tlung lo isi?” tiin zawt i.

¹¹ Ciafangin Uriah in, “Israel le Judah ralkapte tu lamhlapui ah raltawng in hlam songah um tlang ai Thutiam Kuang khai anite hnenah um i. I bawipa Joab le a kuthnia ai a dang tlangsuakte khai hampalak ah cam tlang i. Cialak ah akontih in ai le ding in le i nupui hnenah it tuhin i inn ah tlung thil tuh ing? Ciabang heh bawn tuh hrimhrim lo ing, tiin cukcam in thukham ing,” tiin ti i.

¹² Ciafangin David in, “Tunnia tu heta ah um rih tulai thangha ah na hlat leh tuh ing,” tiin ti i. Ciamanin cia zan tu Jerusalem ah um i.

¹³ A thangha fangin Uriah tu David in zanfak dar ai zu ri thai roh in tul i. Ikhalselai cia zan khai inn ah tlung cuang lo i. Amah pon sil in kumpibawi inn kiltute hnen thotho ah cam i.

¹⁴ A thangha fangin David in Joab hnenah lai ngan ai Uriah kut in kuat i.

¹⁵ A lai songah, “Uriah heh ral a raw ber hmun, hmai lam ber hmunah fehruai tu. Cen khel lamah let san tu lio lai ralte in rek tuseh,” tiin ngan i.

¹⁶ Ciamanin Ammon mite khuapui a kulhhnak ai ral a raw ber hmunah Uriah heh Joab in fehruai i.

¹⁷ Ralte tu khua songin suak tlang ai Joab ai ralkapte thawn tawng dun i. David ai ralbawite hrekkhat heh rek ai Uriah khai rek ve i.

¹⁸ Cen a tawngdunhnak thu tu Joab in David hnenah than i.

¹⁹ A hlathnak mipa hnenah, “Kin tawngdunhnak thu a veksen in na rel ben fangin,

²⁰ kumpibawi tu a thinraw thaipang manin, ‘Zaimanin Ammon mi tawng tuhin a khuapui nong ze ah feh i si? khuapui kulhhnak vingpui vuman li le thal in kin kap tuh i, ti ling lo i sim?

²¹ Jerubbesheth ai fapa Abimelech a rekhnak hai zo i sim? Thebez khua ah nupang pakhat in bangkhang vuman fangrialhnak lungrial lianpui a vumah hla ai thi bang ta! Ciapuipa in zaimanin bang hiang ze in feh i si?’ na ti lekhaw, Hit mi na ralbawi Uriah khai rek lio i, ti tu,” tiin cah i.

²² A hlathnak mipa tu David hnenah feh ai Joab ai thucahhnak bangin rel sio i.

²³ David hnenah, “Kin tahin ralte tu hat sawn ai a khuapui songin suak tlang ai khuapua ah tawng dun i ing. Ikhalselai a khua kotka tian hnawt i ing.

²⁴ Cen anite ṭanghmun bangkhang vuman thal thawn kin sai dek ai bawipa, na ralbawite hrekkhat thi i, Uriah khai rek zo i,” tiin ti i.

²⁵ Ciafangin David in ciami pa hnenah, “Joab heh rel tulai a thinnau maseh, zaimantifangin raltawnghnak ahcen aisu thi tuh i, ti rel thil lo hehin. A roh ngai in ciami khuapui heh tawng tu selai lang tek tuseh,” tiin ti i.

²⁶ Cen a pasal thi i ti khiah Bathsheba in a za fangin mithi ngai in um i.

²⁷ A mithi ngai a lawm fangin David in mi hlat ai kumpibawi inn ah fehpui i. Ciatihin a nupui ah can ai fapa nai i. Ikhalselai David ai thil a bawnhnak vumah Bawipa tu a lungawi lo i.