2 Samuel 1 - Zanniat Bible

David In Saul thihhnak Za I

¹ Saul thi hnuaah David tu Amalech mite ral a nehhnak in let ai Ziklag khua ah ni hnih um i.

² A thangha ah Saul thihnak hmun an tlangval pakhat hleng i. A lungsia manin a hnikpon zik ai a lu ah laivut phulh i. David hnenah feh ai laikhun in upathnak pe in a lu ut i.

³ Ciafangin David in, “Akonan hleng isi?” tiin zawt i. Ani in, “Israel ralkapte hnenin tlan ing,” tiin ti i.

⁴ “Ziang ning cang i, i rel tucuk,” tiin David in ti i. Ciafangin tlangval pa in, “Israel ralkapte tu tlan tlang sio ai tampui thi i. Saul le a fapa Jonathan khai thi i,” tiin ti i.

⁵ “Saul le Jonathan thi i, ti akontih in ling isi,” tiin David in zawt i.

⁶ Tlangvalpa in, “Gilboa mual ah um ve ai a ralte siphuhleng le siphuh vumto ralkapte in nong deuhdeuh ai cialak ah Saul tu a faipui lep in a ding hmu ing.

⁷ A her fangin kaimah i hmu ai i ko i. “Bawipa, ziang i?” tiin ti ing.

⁸ “Aisu isi,” tiin i zawt ai, “Amalech mi ing,” tiin ti ing.

⁹ Ciafangin, “A roh ngai in i tuahmawh zo ai i thi cing tuh i. Kawi tulai i rek tu,” tiin iti i.

¹⁰ Ciamanin a umhnak ah hong ai rek ing, zaimantifangin tlu tuh hang ai a tlu sawng fangin thi tuh thotho ihang, ti ling ing. Cen a lu vumai kumpibawi lukhuk le ralvang khamhnak banrolh heh lang ai tun na hnenah koih ing, bawipa,” tiin ti i.

¹¹ David tu a lungsia le thinkhoi in a hnikpon zik sek ai a minungte hmuahhmuah inkhai zik tlang ve sio i.

¹² Amahte kang cum in kap tlang ai, Bawipa ai minung Israel mite tampui ral ah thi manin le Saul le Jonathan khai a pairal hang manin zan tian rong ul in um tlang i.

¹³ Cen David in he thu a reltu tlangvalpa khiah, “Akon lam mi isi?” tiin zawt i. “Amalech mi inapui nangmah ramah um ing,” tiin sawn i.

¹⁴ David in, “Akontih in Bawipa in kumpibawi ai a rilmi heh rek ngam isi?” tiin ti ai,

¹⁵ a ralkap pakhat ko ai, “Hemi pa heh rek tu lio,” tiin thupe i. Ciamanin ralkap pa in Amalech tlangvalpa heh tlu lio in sat ai rek i.

¹⁶ Ciafangin David in, “Na thisan tu na lu vumah tla tuseh. Bawipa Pathian in kumpibawi tuhin a rilmi rek ing, tiin na hmurka rori in na phuang manin nangmah le nangmah na nunhnak boruai i bang si,” tiin Amalech pa heh ti i.

David In Saul Le Jonathan Kah I

¹⁷ David in Saul le a fapa Jonathan heh kahla in cuan ai,

¹⁸ Judah mite in ciami kahla zir tuhin thupe i, (Hemi kahla tu Jashar Laibu songah ngan i).

¹⁹ “Aw mibawngsia Israel bawite, Ning ram tlangmual ah ning thi heh, Ralpha tumce pawl bawngsia nia a suak heh.

²⁰ Gath khua ah rel mah ih, Ashkelon khua ai lampui ah phuang mah ih; Filistin nupangte lungawi pang fangin. Lawki nupangte thin riam ze pang fangin.

²¹ Aw Gilboa mual, Na vumah ruah le nai khai tla maseh, Na ram tu car le kolh in Rong zaikhai suak maseh! Zaimantifangin mi ralpha pawl ai lum tu rop cuahco ai, Saul ai lum tu kharkai sek i.

²² Jonathan ai li le thal tu mi liam ngah lekhaw a raw bik i, Saul ai ralvang tu mi ninghio nai lo i. Mi thahatte khai sat sio ai, Ralte khai sat sio i.

²³ Aw Saul le Jonathan, Ning itdunhnak a ngaihsunurkul i; Nunhnak ahkhai hmunkhat ai thihhnak ahkhai hmunkhat i si; Muvanlai tahin ning rang deuh ai, Chintit tahin ning hat deuh i.

²⁴ Aw Israel nupangte, Saul heh kah tu ih; Hnikpon mankhung songlawi in, san sirser in ning tuamtu heh amah i; Hlawnthil mankhung le suingun in ning mawiruaitu heh amah i.

²⁵ Ral pha tumce ralkapte a bawngsia tlang ta e, Raltawnghnak ah pairal ta; Tlang vumah Jonathan tu thi ta i.

²⁶ Aw Jonathan, i ithnak i unau, nangmah manin lung i sia i, Kaimah caah zaitluk in a daihkul isi, Nang in i ithnak heh zaitlukin mangbang kul i, Nupang ai ithnak tahin hlum sawn i.

²⁷ Mi ralpha pawl ralkapte pairal zo i, A fai le vang khai santlai nawn lo i,” tiin kah i.