2 Piter 3 - Zanniat Bible

Bawipa Hleng Lehsal Tuh I

¹ I ithnakte, hemi heh vel hnihhnak ning hnenah i nganhnak laikuat i. I laikuathnak a vel hnih pahin i tumhnak tu ning thinlung songah ruathnak thiang um pan selai tihnak i ai ciami tu i lingruai hiam lehsalhnak i.

² Hlanlaipui ah mi thiang prophette in a relciahnak le kin Bawipa kin otu in thukham ning pehnak, ning hnenah nalangte ai phuanghnakte heh hih tu ngio ih, ti i daihhnak i.

³ A hmasaber ah ning ling tuhhnak tu: ni hnuataber can ah mi hrekkhat in amahte taksa hiamhnak in uk mite suak tlang tuh i, tihnak i. Ciamite in hnihsarelhnak in ning hmang tuhai,

⁴ “Khrih in hleng leh tuh ing, tiin thu ning kham ilo im? Tun heh akonah um i? Kin pupate tu a thihnak rai zo i, ikhalselai laivum a sem sawng in tun tian zaizongza amah kel thotho i,” tiin ning ti tlang tuh i.

⁵ Hlanlaipui ah Pathian in a thu in lai le van bawn i ti ling tlang napui ling lo bangin um tlang tuh i. Lai tu ti songin le ti thawn bawnhnak i.

⁶ Cen ti thotho in, tilawi in laipua hlun heh siatsuah i.

⁷ Ikhalselai tunai a umhnak lai le van tu mai in siatsuah tuhin Pathian ai thupehnak thotho in a zuah lai mite i. Pathian a zohsuamtute thukhan nia le hnawmralhnak tawk tlang nia hrangah a zuahhnak tepawl i.

⁸ I ithnakte, thu pakhat tu hai mah ih: Bawipa sikdan ah ni khat le kum thawng khat dang dun lo i; amah hmaiah a bang dun i.

⁹ Bawipa in a thukhamhnak khimruai tuhin a tirhting i tiin mihrek in ruat khalselai, a tirhting ilo i. Ning vumah thinsauhnak a nai sawn manin i; zaimantifangin pakhatniu bangkhai hnawmralhnak tawk loniu in mi zongzong amahte sualhnak in let lehsal thil tuh a daih manin i.

¹⁰ Ikhalselai Bawipa ai Nia tu mangrinlo in ruko bangin hleng tuh i. Ciami nia ah vante tu huk dumdo in pairal tuhai van ai a umhnak hmuahhmuah khai kang tuhai hnawmral tuh sek i. Cen laipua tu a vumai ummi thil hmuahhmuah thawn pairal tuh i.

¹¹ Hemi bangin zaizongza hnawm tuh sek manin ning nun laiah zaibangin nung tuh ini i si? Ning nunhnak tu thianghlim tu selai Pathian hnenah ap tu ih.

¹² Vante kang sio ai a siatsuah sek nia le van ai a umhnak hmuahhmuah mailing sa in a zulruai sek nia Pathian ai Nia heh hleng tu taito seh ti ai ning iang luplo laiah ciatih bangin um tu ih.

¹³ Ikhalselai kin tu Pathian in a thukhamhnak van tharte le lai thar; dikcanghnak laileng hmun iang ising.

¹⁴ Ciamanin i ithnakte, ciami Nia ning iang hnelhno laiah Pathian hmaiah mawh nai lo le thianghlim tuhin zuam tu ilai amah thawn a remmi cang tu ih.

¹⁵ Kin ithnak kin unau Paul in Pathian ai pehnak fimhnak thawn ning hnenah a nganhnak laikuat songah a umhnak bangin Bawipa in kin vumah a thinsauhnak heh kinmah nun o kin daih manin i, tiin ruat tu ih.

¹⁶ Hemi thula a telhhnak a laikuat nganhnak hmuahhmuah songah ciatih bangin ngan de i. A laikuathnak songah a nganhnak thula hrekkhat tu a ling har ngai manin mivoi le mi taktai lo pawl in, Lai Thianghlim tluan dangdang ai sullam relfiang sual tlang bang thotho in, a ping a peng lekin rel tlang i. Ciatihin amahte vum lala ah hnawmralhnak hlengruai i.

¹⁷ Ikhalselai i ithnakte, ning caah hemi heh ning lingciahnak i. Ciamanin ralring ngai in um tu ih! Cin le dan nai lo mite in ning hoisual tuh loin le him ngai in ning umhnak in ning tlok tuh loin ralring in um tu ih.

¹⁸ Kin Bawipa le kin otu Jesuh Khrih ai ninghiohnak le amah linghnak songah khang tu zianzo ih. Amah hnenah songlawihnak tu tun le kumzangza in um tu ngio selaw. Amen.