2 Piter 2 - Zanniat Bible

Zirhtu Dik Lo

¹ Hlanlai Israel mite lakah prophet dik lo um awng i; ciabang thotho in tun ningmah lakah khai zirhtu dik lo lar tuh i. Mi siatsuah thaimi le a dik lomi thupom lutruai tuhai amahte tlan tu kin Bawipa rin hnawl tlang tuh i; ciatihin amahte vum lala ah hnawmralhnak mangrinlo in hlengruai tuh i.

² Ciacingin amahte taksa sualhnak ziaza pha lo heh mi tampui in hlun tlang tuh thotho i; ciami amahte bawnhnak manin mi ai thutak lampui heh relsiat tlang tuh i.

³ Amahte pamhap manin he zirhtu dik lo pawl in puahfawm tluanthu rel in ningmah songin miathnak si tlang tuh i. Ikhalselai anite Thukhantu heh a paiciahnak raipui zo ai amahte hnawmcantu tuh heh mitmu loin um i.

⁴ Sualhnak a bawntu vancungmite heh Pathian in zah loin hell songah lon ai ciata khuathim songah henhnak tuar tlang ai Thukhanhnak Nia iang cuahco in um tlang i.

⁵ Hlanlai san ai laivum mite khai Pathian in zuah cuanglo i. Pathian kihzahhnak a nai lomi laivum miphun vumah tilawi tlungruai ai a osuakmi tu dikcanghnak thu a reltu Noah le midikcang pasarih ian i.

⁶ Pathian in Sodom le Gomorrah khuapui heh hnawl ai mai in hnawmcan i; ciami tu Pathian kihzahhnak a nai lotute caah cingkeng tuhin a bawnhnak i.

⁷ Ikhalselai cin le dan nai lo, hrokhrawl mite in vansanglam in bawnhnak mipha pa Lot tu Pathian in osuak i.

⁸ Cia mipha pa tu hrokhrawl mite lakah um in nung ai nisiar in anite phat lo zia hmu ai a ling fangin a thin ur ngai i.

⁹ Ciatihin Bawipa in amah a kihzahtute harsa tuarhnak in osuak thiam ai hrokhrawl mite Thukhanhnak Nia tian cawhhnak tuar tuhin dah i.

¹⁰ Ciatihin cawhhnak tuar in a dahhnak tepawl tu Pathian thunaihnak nautat in amahte ai taksa hiamhnak, hurhnak ningdulkul a hluntu ber pawl i. Hetih ai mi a zirhtute heh puar ai hngal tlang roh i; vancung ai a ummi misonglawi pawl rin zaikhai siar lo i; zohsuam tlang lehlam i.

¹¹ Amahte tahin hat sawn le ham sawn vancungmi inrin Bawipa ai mithmuh ah ciamite heh zohsuam tlang lo i.

¹² Ikhalselai hemi zirh sualtute tu zaikhai ruathnak nai tlang lo i, amahte thinlung ai suak zualhnak cang bawn tlang i. Pom ai rek tuhhnak ramsa bang i. Amahte ling ban lohnak poh nautathnak thawn relsiat tlang i. Ciamanin ramsa bangin rekhnak tuar tlang tuh ve i.

¹³ Midang harsahnak pe manin harsahnak tuar tlang tuh ve i. Anite caah nunnuam tihnak tu khuavar lai ahkhai amahte taksa hiamhnak cangcang bawn in thinriamruai khiah i. Mi zawl heh nunnuam ti tlang ai ning hnenah rong ai tlang fangin zakthihnak le mualphohnak a suakruaitute i.

¹⁴ Nupang pha lo sik ti siar lo amahte sik hiamhnak zaikhai um lo i; sual bawn hiamhnak tu riam thil awng lo i. Sanghnak ai a thanau deuh mite heh sualhnak thang in awk tlang i. Pamhap lamah neh thilh pawl ilo i. Pathian ai cukcamhnak hniaah um tlang i.

¹⁵ Lampui dik pial tlang ai lamvai tlang zo i. Beor ai fapa Balaam ai hlun awnghnak lampui hlun tlang i. Prophet Balaam tu thil sual bawnhnak man ai ngah tuhhnak paisa daihtu i ai,

¹⁶ a sualhnak manin mawhhlukhnak tawk i. A laak in prophet Balaam heh minung pon in pon ai voithu ai a bawnhnak thil sual heh comruai i.

¹⁷ Hemi minungte tu cirhti kang le hlisia ai hmuthnak khuanim bang i. Pathian in amahte caah a thuk ber khuathimhnak hmun ralring in dah zo i.

¹⁸ Puarthauhnak le pong pha lo pong tlang i; sualkhelhhnak songin a lut sawngtute sualhnak thang ah awk leh tuhin amahte taksa hiamhnak hmang tlang i.

¹⁹ Mi thukhamhnak khiah luathnak i, ikhalselai amahte rori tu mi siatsuahtu ziaza pha lo ai salte i; zaimantifangin minung tu thil zai inkhai neh lekhaw ciami a nehtu thil ai sal i.

²⁰ Kin Bawipa le nunotu Jesuh Khrih pumpak in amahte linghnak manin he laivum sual ningrim songin luat tlang ai ciatih ai luat ngah hnuaah ciami sual ningrim in zawl lehthio ai pom ngah meng lekhaw a hmasa tahin a hnuata heh roh sawn i.

²¹ Dikcanghnak lampui ling tlang hnuaah le thukham cianghlim amahte hnenah pe hnuaah amahte pialhnak heh zaikhai ling nawn lo lawlaw in um selai amahte caah pha sawn i.

²² Hemi bangin amahte vumah thil canghnak in, “Uico in a awk ai leh i,” tihnak le, “Vok takhlu hnuaah nawngbek lakah bual lehthio i,” ti ai santehhnak heh a dik i ti larruai i.