2 Korin 5 - Zanniat Bible

¹ Kin umhnak he laivum hlam kin ruangpui heh bal sek khalselai minung kut ai sa lohnak Pathian in kin caah a bawnhnak kumzangza hrang vancung ah inn nai ising ti ling ising.

² Tunah tu cawl ngai in ai ruangro ising; vancung kin inn thawn kin thuam selai ti kin hiam ze manin ciatihin kin ai ruangrohnak i.

³ Ciatihin vancung thuam kin silruai fangin taksa ruangpui nai loin i tuh lo ising.

⁴ Hemi laivum ponhlam songai kin um songah zin kin fe ai cau in ai ising. Ciatih ai kin cau kin aihnak tu he laivum hlam heh lon teu kin nuam manin ilo i; ikhalselai kin ruangpum tu vancung thuam silruaihnak i singlai ciatihin a thi thaimi he nunhnak heh a thi thai lomi in thon sek selai ti kin daih man i.

⁵ Hemi bang thlengdunhnak hrangah kin pai sah ciatu heh Amah Pathian i. Cen kin caah a khawlciahnak hmuahhmuah ngah tuh ising tiin amahkhan ah amah ai Rauhla kin pe i.

⁶ Ciamanin thinlung kho ngai in um ngiode ising. Laivum taksa thawn muang in kin um songah Bawipa ai inn thawn kin hla dun i, ti ling ising.

⁷ Kin tu sanghnak in kin nung ai hmuhhnak in kin nung lo i.

⁸ Ralphahnak in kin dim i; cen mah ai daihhnak in cang thil selai he laivum taksa heh zam in Bawipa ai inn ah um tuh ril sawn ising.

⁹ Zaikhai ita tuseh laivum kin inn ah kin um ah ituseh khiata kin inn ai kin um ah ituseh, zaizongza tahin amah lungawiruai tuh khiah a thupui ber i.

¹⁰ Zaimantifangin thukhan tuhin kin veksen Khrih hmaiah ding leh tuh ising. Aisusu khai a pha ituseh, a hnawm ituseh a nun songah a bawnhnak bang cekci in ngah tuh i.

Khirh Ah Pathian Thawn Pawlkomhnak

¹¹ Pathian kih heh a sullam zai i ti kin ling manin midang khai sawm betbo i ing. Pathian in kin thinlung ling sio i. Ciabangtluk in ningte khai ning thinlung in i ling tuh ve in umlamhnak nai ing.

¹² Ning hnenah kin phathnak larruai kin nuam leh manin ilo i; kinmah manin hmaihngalhnak ning co thil tuhin a can pha ning hnenah pe tuh kin zuamhnak sawn i. Ciatihin mi hrekkhat songlam ziaza sik loin a pualam hmuthilhnak thu ah a porhduntute khiah amahte thu sawn thil tuh i si.

¹³ Mivoi ngaingai i ing maw? Kin ita inkhai Pathian manin i. Mifim tang i ing maw? I le ingkhaw ningmah manin i.

¹⁴ Mi pakhat tu mi zongzong caah thi ai ciami a thihnak songah aisusu khai tel ai kawm tlang ve ising, ti kin ling ngah hnuaah Khrih ai ithnak in kin uk i.

¹⁵ Khrih tu mi veksen caah a thi manin aisusu khai mah ai bul ca lek ah nung tuh nawn lohnak i; amahte aiawh in thi ai a nung leh mipa ca lek ah nung tuh sawnhnak i.

¹⁶ Tun tu minung ihnak sik in aisu khai thu rel nawn lo i ing. Can khatkhat ah Khrih tu minung ihnak sik in thu rel awng napui tun tu rel nawn lo i ing.

¹⁷ Aisusu khai Khrih thawn pehzom fangin tu mithar ihang; a nun hlun heh bo ai nun thar pan zo i.

¹⁸ Hemi hmuahhmuah heh Pathian ai bawnhnak i; a ral kinte tu Khrih thawmin amah thawn kin remruai zo ai midang khai Amah thawn remruai tuhin ṭuanvo pe i.

¹⁹ Kin phuanghnak thu tu: Khrih thawmin laivum mi zongzong heh Pathian in amah thawn remruai zo i, ti i. Pathian in amahte sual khumhnak laibu dah nawn lo i; cen ciami thuthang rel tuhin ṭuanvo i pe i.

²⁰ Ciamanin kin tu Khrih ai nalangte i ing. Pathian Amah rori kinmah songah thu a rel bangin thu rel i ing. Khrih ai hming in ning sawm i ing: Pathian thawn rem dun tu ilai a ral ihnak in a rualpui ah cang tu ih.

²¹ Ikhalselai kinmah manin Pathian in sualhnak zaikhai a nai lotu Khrih khiah sual ah cangruai ai ciatihin Amah manin Pathian ai dikcanghnak hlawm tlang ve ising.