2 Korin 4 - Zanniat Bible

Lai Bel Songai Rauhla Rothil

¹ Pathian in ning kin hio ai he naper heh amah in kin perruai manin thin kin nau lo i.

² Kin bawn dehnak thil thup le zakthikul thilte khiah lon zo sek i ing; mi zawl in nung lo i ing, Pathian ai thula ahkhai kinmah daihdan in merh lo i ing. Thutak heh cang ngai le tluangtlam ngai in phuang ai ciatihin zaibang minung i ing ti khiah mi in amahte thinlung in thia thiam tuseh tiin Pathian hmaiah nung i ing.

³ Ciatih imanin Thuthangpha kin phuanghnak heh thup lekhaw a pairal lai betbo mite caah thup in um i.

⁴ Ciamite in sang nuam lo i, zaimantifangin he laivum ai khuavang in amahte thinlung heh thimhnak lakah dah ngio manin i. Thuthangpha ai tleuhnak, Khrih songlawihnak in a hlenghnak tleuhnak tu hmu maseh tiin ciami laivum khuavang in ber ngio i. Ciami Khrih heh Pathian hmuihmel taktak i.

⁵ Kin relhnak heh kinmah ai thula ilo i; Jesuh Khrih tu Bawipa i ai Jesuh ai hming caah kinte tu ning sal i ing, ti sawn heh kin relhnak i.

⁶ “Khuathim songin tleuhnak suak tuseh,” tiin a titu Pathian tu Jesuh Khrih ai mithmai ai Pathian songlawihnak khiah kin lingthilhnak tuhin kin thinlung songah a tleuhnak kin petu Pathian Amah thotho i.

⁷ Ikhalselai he rauhla rothil a cotu kinte tu suntlung ai bawnhnak bel bang ian i ing; zaimantifangin a sang ber thunaihnak tu kin naihnak ilo in Pathian ai i, ti larruaihnak ah i.

⁸ Kin cingkim in a roh ngai in kin rial napui kin keh kin zan lo i; a cancan ah multing aican in um i ing, ikhalselai kin vansang lo i.

⁹ Reemhnak tuar napui kin zam lio lo i; kin tuahmawh napui kin siatsuah lo i.

¹⁰ Jesuh ai nunhnak tu kin taksa vumah lar tu hrimhrim seh tiin catloin a thi thai kin ruangpui vumah heh Khrih thihhnak phur ṭiode i ing.

¹¹ A thi thai kin ruangpum vum ahhen Jesuh ai nunhnak lar tu hrimhrim seh tiin nisiar in thihhnak tawk ṭiode ai Jesuh Khrih manin kin nung i.

¹² Hetih ai a sullam tu kin songah thihhnak in naper napui ning song ahcen nunhnak in naper i tihnak i.

¹³ Lai Thianghlim in, “Sang manin rel ing,” ti i. Ciabang sanghnak thinlung nai in sang manin Pathian Thuthang phuang ve i ing.

¹⁴ Bawipa Jesuh heh thihhnak in nunhnak ah a thoruaitu Pathian in kin khai Jesuh thawn kin thoruai tuh ve ai ningmah thawn hmunkhat ah Amah umhnak ah kin lang tuh i, ti ling i ing.

¹⁵ Hemi hmuahhmuah heh ningmah manin i. Cen Pathian ai ninghiohnak tu mi tam deuh hnenah a hleng manin, Pathian songlawihnak tu mi tampui in thangphat tuh amam i.

Sanghnak Ai Nun

¹⁶ Hetih imanin vansang in um awng lo ing. A pualam kin taksa ruangpui tu ṭumsuk zianzo napui kin songlam nun tu nisiar tharsuah ṭio in um i.

¹⁷ Cen harsahnak can comniu song kin tawkhnak niuniu in a let tampui in kumzangza songlawihnak kin pe tuh i.

¹⁸ Ciamanin hmaiton in kin sikhnak hnelhno heh kin hmu thilhnak thilrite ilo i; kin hmu thil lohnak thilte sawn i. Hmu thilhnak tu can comniu song lek awk i; ikhalselai hmu thil lohnak tu kumzangza tham i.