1 Timote 5 - Zanniat Bible

Sangtute Vumai Ṭuanvo

¹ Upate heh hau mah; na pa bangin ruat tulai nemniu in forh tu. Mino deuh heh na unau ah ruat tu.

² Kum upa nupang heh na nu bangin ruat tulai, kum nauta nupang deuh pawl tu thinlung thiangniu in na farnu bangin ruat tu.

³ Mahniu lek ai khuasatu hmaitongte heh upat tu.

⁴ Ikhalselai hmaitong nu in fate ihlahle tute nai lekhaw a hmasaber ah ciami tute le fate in amahte nu le pate, ihlahle amahte pi le pute heh amahte dan ai ruaihnak bangin kilkhawl tu selai cawm tu ve seh. Zaimantifangin ciami tu Pathian lungawiruaitu i.

⁵ Mahniu lek ai khuasatu hmaitong nu heh, kilkhawltu aisu khai nai lo manin, Pathian lek rinsan ai sun le zan in sawngen ai bawmhnak ngen i.

⁶ Ikhalselai taksa hiamhnak hrangah a taksa a hmangtu hmaitong heh nung napui lai ai thi zo i.

⁷ Hmaitongte tu aisu inkhai mawhhluk lohnak cang thil tuhin he thuzirhhnakte heh rel tu.

⁸ khalselai mi pakhat tu a songkhat, amah ai innsang rin kilkhawl loin zaikhai siar hlah lekhaw a sanghnak zangtak i ai sang lotu tahin rin sual sawn i.

⁹ Zaibang hmaitong khai kum sawmruk vum ihlah lekhaw hmaitong laibu songah telh mah. Ciahlaiah ciami hmaitong nu tu vel khat lek pasal naimi ituseh.

¹⁰ Naper phathnak ah hming a naimi ituseh. Naper pha tihnak tu: a fate a kilkhawl thiamtu, mikhual sikthiamtu, naper nauta ber kesom khai Khristian unaute vumah a per zuamtu, harsa mangbang tawk can ah mi a bawmtu, le thilpha bawn ah a can le a thazang a petu, tihnak mite heh i tuh i.

¹¹ Ikhalselai hmaitong kum dawn deuh pawl tu hmaitong laibu songah telh mah. Zaimantifangin pasal nai nuam leh fangin Khrih heh zangtak de i.

¹² Ciatihin Khrih hnenai amahte thukhamhnak bal ai mawhhlukhnak tawk tlang i.

¹³ Cialek zolo in inn khat hnua inn khat vak ai a lovang in a can boruai i. Ciahnak tahin a sia amam tu: pong tam i, mi relsiat i, mi cangcang thinrawtiar ai pong tuh lo khai pong zel i.

¹⁴ Ciamanin kum dawn deuh hmaitongte tu pasal nai selai fate khai nai in amahte inn kilkhawl tu selai ti i daih i. Ciatih ilekhaw kin ralte in kinmah thangsiathnak can ngah tuh lo i.

¹⁵ Zaimantifangin hmaitong hrekkhat tu Satan hlun hiam in kin hlum zo i.

¹⁶ Ikhalselai Khristian nupang in a innsang ah hmaitong nai lekhaw pawlpui phur ritruai tuh loin amah in cawm tuseh. Ciatihin cawmtu nai loin a nungmi hmaitong ngaingai pawl heh pawlpui in sik thil tuh i.

¹⁷ Pawlpui konghoitu, naper pha a pertu cenin perman a let hnih in ngah tlak i. Ciami konghoitu lakah thurelhnak le thuzirhhnak ai a zuam ngai mite in ngah tlak cuang i.

¹⁸ Zaimantifangin Lai Thianghlim in, “Fang a cil hnelhnotu kawlpawcang kahmur pen mah ih,” ti ai, “Napertu in a perman ngah tuhhnak i,” ti i.

¹⁹ Thulingtu a tlawm ber pahnih tal um hlah lekhaw pawlpui konghoitu mawh a hlukhnak heh ngai nuam mah.

²⁰ Sualhnak a bawntute tu mizapui hmaiah hau tulai midang in lau tuh deuh i.

²¹ Pathian le Khrih Jesuh le a thianghlim vancungmi hmaiah na ruai ing: zai na bawn inkhai aisu khai hlaihdanhnak um loniu in he zirhhnakte heh hlun tu.

²² Bawipa ai na ruaihtu tuhin aisu vum ahkhai ngaihhlah ze in kutsuanhnak bawn mah. Midang bawnhnak sualhnak ah tel ve mah; cianghlim niu in um tu.

²³ Ti lek ding loin na songur le na ur dang nuam deuh tuhin cabitti tlawm niuniu ding tu.

²⁴ Mi hrekkhat amahte sualhnak tu fiang ngai in lar ai thukhanhnak ah amahte sualhnak tu amahte ai hlanah hleng hmasa i; ikhalselai midang sualhnak tu lehhnua pui fangin lar i.

²⁵ Ciatih bangin naper pha heh fiang ngai in lar ai a lar lai lohnak khai thup hlen thil lo i.