1 Siangphahrang 22 - Zanniat Bible

Prophet Mikaiah In Ahab Ralringhnak Pe I

¹ Israel le Syria karlak ah kum hnih song ral dap i.

² Ikhalselai a kum thumhnak ah Judah kumpibawi Jehoshaphat tu Israel kumpibawi Ahab tawk tuhin feh i.

³ Cen Ahab in a kuthnia tlangsuakte hnenah, “Zaimanin Gilead ramai Ramoth khua heh Syria kumpibawi kut songin a lang tum lo ising? Kinmah ai i na e!” ti i.

⁴ Cen Jehoshaphat hnenah, “Ramoth tawng tuh ing, i bawm tlang nga sim?” tiin zawt i. Jehoshaphat in, “Na bawm tuh ing. I ralkapte le i siphuh vumto ralkapte khai ralring lep ngawn i.

⁵ Ikhalselai a hmasaber ah Bawipa tawk rih tuh ising,” tiin ti i.

⁶ Ciamanin Ahab in prophette ko ai amahte veksen in za li kawi tlang i. Amahte hnenah, “Ramoth tawng nga ing maw?” tiin zawt i. Anite in, “Tawng tu. Bawipa in nehhnak na pe tuh i,” tiin ti tlang i.

⁷ Ikhalselai Jehoshaphat in, “Bawipa kin zawt thilhnak tuhin prophet dang um nawn lo ihang im? tiin zawt i.

⁸ Ahab in, “A dang pakhat um lai i. Ani tu Imlah ai fapa Mikaiah i. Ikhalselai ani tu i hua i. Zaimantifangin kaimah caah thu pha pong awng lo i. Thu sia lek rel de i,” ti i. Jehoshaphat in, “Ciatihin pong mah,” ti i.

⁹ Ciamanin kumpibawi Ahab in rang ngai in Mikaiah ko tuhin a zung ai bawi pakhat ruai i.

¹⁰ Kumpibawite pahnih, Ahab le Jehoshaphat tu amahte kumpibawi thuam sil in Samaria khuapui kulhhnak vingpui kotka pua ai fangrialhnak hmunah kumpibawi tohkham vumah to kawm ai, amahte hmaiah prophette tu prophet pon in pong tlang thliahthlo i.

¹¹ Anite lakai prophet pakhat, Chenaanah ai fapa Zedekiah in thir ki bawn ai Ahab hnenah, “Bawipa in, ‘Hemi kite in Syria mite tawng tlang tuhai amahte ci hmit tuh sio isi,’ tiin rel i.

¹² A dang prophette inkhai ciatih thotho in rel tlang i. “Ramoth khua tawng tu ilai neh tuh i si, Bawipa in nehhnak ning pe tuh i,” tiin ti tlang sio i.

¹³ Cialak ah Mikaiah ko tuhin a hlathnak bawi in Mikaiah heh, “A dang prophette in kin kumpibawi ai neh tuh thu lek rel tlang i. Nang inkhai ciatihin rel tu ve law,” tiin forh tlang i.

¹⁴ Ikhalselai Mikaiah in, “Bawipa ai hming in rel ing: Bawipa ai rel tuh i ruaihnak lek rel tuh ing,” tiin ti i.

¹⁵ Mikaiah tu kumpibawi hmaiah a hleng fangin kumpibawi in, “Mikaiah, kumpibawi Jehoshaphat le kaimah in Ramoth khua tawng nga ing maw, tawng tuh lo i ing, rel tu?” tiin ti i. Mikaiah in, “Tawng hlah sim! Neh tuh isi. Bawipa in nehhnak na pe tuh i,” tiin sawn i.

¹⁶ Ikhalselai Ahab in, “Bawipa hming sal in i hnenah thu na rel fangin thudik lek i rel tu, tiin vel zaizah na ti tuh ing?” tiin hau i.

¹⁷ Ciafangin Mikaiah in, “Israel mite tu khaltu nai lo tuurual bangin tlang vumah vakvai tlang hmu ing. Bawipa in, ‘Hemi mizapui heh hotu nai lo i; amahte inn ah tlung tu sio seh,’ ti i,” tiin rel i.

¹⁸ Cen Ahab in Jehoshaphat hnenah, “Hemi pa tu kaimah caah thupha pong awng kel lo i, na ti tho lo ing maw? Thusia lek rel de i,” ti i.

¹⁹ Mikaiah in a pong peh ai, “Tunah Bawipa ai ponkam ngai tu! Bawipa tu vancung a Kumpibawi tohkham vumah to in a vancungmite a hiang kekeh lam le kiahhan lamah ding tlang khiah hmu ing.

²⁰ Cen Bawipa in, ‘Ahab tu Ramoth khua ah feh ai thih a tawkhnak tuhin aisu in zawl tuh i?” ti i. Vancungmi hrekkhat in thu pakhat rel tlang i; a dangte in thu dang rel tlang i.

²¹ A hnuataber ah rauhla pakhat in Bawipa heh nong ai a hnenah, ‘Kaimah in zawl tuh ing,’ ti i. ‘Akontih in zawl tuh isi?’ ti ai Bawipa in a zawt fangin,

²² ani in, ‘Feh tuhai Ahab ai prophet hmuahhmuah thudon relruai tuh sio ing,’ ti i. Ciafangin Bawipa in, ‘Feh tulai zawl ta tu. Ti ben tuh ngaingai isi,’ ti i,” tiin ti i.

²³ Mikaiah in peh bet ai, “A tihnak bangin cang ngaingai i! Bawipa in na prophette na hnenah thudon relruai sio i. Bawipa amah rori in na vumah siatsuahhnak hleng tuhin lairel zo i,” tiin ti i.

²⁴ Ciafangin Zedekiah in Mikaiah heh nong ai a biangbil beng ai, “Akontih in Bawipa ai rauhla tu na hnenah pong tuhin kaimah hnenin thawn lio ipa?” ti i.

²⁵ Mikaiah in, “Inn hnua lam khan songah na relh hnelhno fangin ciami thu tu ling leh tuh isi,” ti i.

²⁶ Cen kumpibawi Ahab in a kuthnia tlangsuakte lakai pakhat hnenah, “Mikaiah pom tulai khuapui uktu Amon le i fapa Joash hnenah fehpui tu.

²⁷ Rel ta tulai cak le himniu in i let hlanlo thawng ah toh tu selai sang le tidap pe tuseh,” tiin ti i.

²⁸ Ciafangin Mikaiah in, “Cak le himniu in let lekhaw kaimah hmang in Bawipa pong lo i tuh i. Mi zongzong in i ponghnak heh i lingpui tu ṭen ih,” tiin ti i.

Ahab Thi I

²⁹ Israel kumpibawi Ahab le Judah kumpibawi Jehoshaphat tu Gilead ram Ramoth khua tawng tuhin suak kawm i.

³⁰ Ahab in Jehoshaphat hnenah, “Ral kin tawng fangin kai tu midang bangin thuam tuhai nang tu kumpibawi bangin thuam tuh isi,” ti i. Ciatihin Israel kumpibawi tu midang bangin thuam ai raltawnghnak hmunah feh i.

³¹ Syria kumpibawi in Israel kumpibawi siarlo a dang aisu khai tawng tuh loin a siphuhleng ralkapte hotute sawmthum le pahnih heh thupe i.

³² Cen kumpibawi Jehoshaphat hmu tlang fangin Israel kumpibawi vuah in tawng tlang dekdo i. Ikhalselai Jehoshaphat a au fangin,

³³ Israel kumpibawi ilo i ti a ling fangin com tlang i.

³⁴ Syria ralkap pakhat in hmuisunghnak nai hang loin a conkiang sai menma ai a bawngsiahnak ah kumpibawi Ahab heh dar ai bawnhnak a ralthuam pehdunhnak kua niu in kha i. Ciafangin Ahab in, “Ma liam ing!” tiin au ai, a siphuhleng mawngtu pa heh, “A rang ngai in i tlanpui tu,” tiin thupe i.

³⁵ Amahte tawngdunhnak roh ngai ai kumpibawi Ahab tu a siphuhleng vumah do fawm in Syria ralkapte ṭanghnak lam hoi in um i. A liamhnak hmaihma in thi luang ai a siphuhleng suat ciah thi in dim sio i. Cen zan lam fangin thi i.

³⁶ Ni tla fangin Israel ralkapte hnenah, “Ning khua le ning ram ṭen ah tlung tu sio ih,” tiin thuthan i.

³⁷ Ciatihin kumpibawi Ahab tu thi i. A luang tu Samaria khua ah phur ai phum tlang i.

³⁸ A siphuhleng tu Samaria tikhur ah tleuh ai Bawipa ai a rel cia bangin a thisan tu uicote in liak tlang i. Ciata ah mihlotlaute khai takhlu tlang de i.

³⁹ Kumpibawi Ahab bawnhnak dangte hmuahhmuah, vuiha ai a parhnak a kumpibawi inn thu le khua a tohhnakte ai thu tu Israel Kumpibawite Ai Tluanthu Laibu songah a khimliang in ngan tlang i.

⁴⁰ A thi fangin a fapa Ahaziah in kumpibawi tuhin sawng i.

Judah Kumpibawi Jehoshaphat

⁴¹ Israel kumpibawi Ahab in ram a ukhnak kum li kum ah Asa ai fapa Jehoshaphat tu Judah kumpibawi cang i.

⁴² Cialai ah ani tu kum sawmthum le kum nga i ai, Jerusalem an kum kul hluan nga song ram uk i. A nu tu Shilhi ai fanu Azubah i.

⁴³ A pa Asa bangin Bawipa ai mithmuh ah thil pha bawn i. Ikhalselai lawki mite ai milim biahnak hmunte heh bal sek lo i; ciamanin mi tampui in ciami biahnak hmun heh hibawlhnak ah hmang tlang thotho i.

⁴⁴ Jehoshaphat in Israel kumpibawi thawn remhnak bawn i.

⁴⁵ Jehoshaphat ai a dang bawnhnak tepawl hmuahhmuah, ral a tawnghnak le a ralphahnak tepawl thawn, Judah Kumpibawite ai Tluanthu Laibu songah ngan tlang i.

⁴⁶ A pa Asa san ai panin a tanglaimi, a khuavang bia hmun ai hlotlau naper a pertute hmuahhmuah, nupang ituseh, pasal ituseh rek berh i.

⁴⁷ Cialai ah Edom ram tu uktu kumpibawi nai lo i. Amahte ram uktu heh kumpibawi bawmtu lek i ai Judah kumpibawi ai naper pe mite i.

⁴⁸ Kumpibawi Jehoshaphat in Ophir ram an sui laihnak tuhin tipuithuanthum feh thai tangphawlawng tampui bawn i. Ikhalselai Ophir ah feh thil tlang lo i, zaimantifangin Eziongeber ah a lawng hnawm i.

⁴⁹ Cen Israel kumpibawi Ahaziah in a minung tipuithuanthum khualtlawngtute le Judah kumpibawi Jehoshaphat ai minung tipuithuanthum khualtlawngtute heh khualtlawng tlang tuhin sawm i. Ikhalselai Jehoshaphat in el i.

⁵⁰ Jehoshaphat tu thi ai David khuapui kumpibawite phumhnak hmun hlanmual ah phum i. Cen a fapa Jehoram in kumpibawi tuhin sawng i.

Israel Kumpibawi Ahaziah

⁵¹ Judah kumpibawi Jehoshaphat in ram a ukhnak kum hlaisarih kum ah Ahab ai fapa Ahaziah tu Israel kumpibawi cang ai Samaria khuapui an kum hnih song uk i.

⁵² A pa Ahab, a nu Jezebel le kumpibawi Jeroboam ai sualhnak lampui hlun ai Bawipa vumah sual ve i. Ahab, Jezebel le Jeroboam tu Israel mite sualhnak songah a hoitute i.

⁵³ A pa ai bawn zohnak bangin Ahaziah inkhai Baal khuavang bia ai ruaih i; ciatihin Bawipa Israel ai Pathian heh a thin rawtiar i.