Biblia Todo Logo
Bìoball air-loidhne

- Sanasan -

1 Siangphahrang 21 - Zanniat Bible


Naboth Ai Cabit Vuandum

1 Jezreel khua kumpibawi Ahab inn hiangah Cabit vuandum pakhat um ai a naitu heh Naboth i.

2 Vaikhat ah Ahab in Naboth hnenah, “Na cabit vuandum heh kaimah in co tuh ing. I inn hiangah um ai thinghnah thingthai cinghnak dum bawn i nuam i. A tumrul in a pha deuh cabit vuandum a dang pakhat na pe tuh ing. Ihlahle na daih sawn lekhaw a man a mawi tawk in na pe tuh ing,” tiin ti i.

3 Naboth in, “Hemi cabit vuandum tu i pipute ai ro i. Nang na pe tuhin tu Bawipa in i kham tu hram seh,” ti i.

4 Ahab tu Naboth in a el manin a mithmai sia le thinraw in a inn ah tlung i. A khuahluan ah bang lam hoi in it ngio ai rong khai ai nuam lo i.

5 Ciafangin a nupui Jezebel tu a hnenah kawi ai, “Zaimanin lung na sia i? Zaimanin rong ai lo isi?” tiin zawt i.

6 Ahab in, “Naboth ai ponkam manin i. A cabit vuandum lai tum ai a lai siang lo inkhai cabit vuandum a dang pakhat na pe tuh ing ti napui, siang thotho lo i. Co thil tuh lo isi,” iti i.

7 Cen a nupui Jezebel in, “Israel ram kumpibawi ilo sim? Tho tu! It nawn mah. Thinnuam in um tulai, rong khai ai tu. Naboth ai cabit vuandum tu kaimah in na ngah sah tuh ing,” tiin ti i.

8 Jezebel in Ahab hming in lai ngan ai kumpibawi kut nemruai hnuaah Jezreel khuapui songai bawite le hotute hnenah kuat i.

9 A lai songah, “Rong ul nia bawn tu ilai mizapui kokhawm tu ih. Naboth heh ciata ah upathnak hmunah toruai tu ih.

10 Cen mihuatsuakte pahnih ko tu ilai, “Naboth tu Pathian le kumpibawi a cukcamtu i,’ tiin mawhhluk kawm tuseh. Cia hnuaah Naboth heh hnarpua ah fehpui tu ilai lungto in a thi tianin sep tu ih,” tiin ngan i.

11 Jezebel ai thupehnak bangin khuasong bawite le hotute in bawn tlang i.

12 Rong ul nia bawn in mizapui kokhawm ai Naboth heh upathnak hmunah toruai i.

13 Ciafangin mihuatsuakte pahnih in mi hmaiah, “Hemi pa tu Pathian le kumpibawi a cukcamtu i,” tiin sualpuh kawm dekdo i. Ciahlaiah Naboth tu hnarpua ah fehpui ai lungto in a thi tianin sep tlang i.

14 Cen Jezebel hnenah, “Naboth thi zo i,” tiin thuthan tlang i.

15 Ciami thu a za sawngpah in Jezebel in Ahab hnenah, “Naboth thi zo i. Feh tulai a zuar nuam lohnak cabit vuandum heh nangmah ai zo ihang,” ti i.

16 Ahab tu tho zual ai cabit vuandum ham tuhin feh i.

17 Cen Bawipa in Tishbe khua prophet Elijah hnenah,

18 “Samaria kumpibawi Ahab hnenah feh tu. Naboth ai cabit vuandum lang tuhin feh ai vuandum songah hmu tuh isi.

19 A hnenah, ‘Amah Naboth na rek hnuaah lairam khai lang tuhlai isim? Uicote in Naboth ai thisan a liak hmunah na thisan liak tlang tuh ve i,’ tiin Bawipa in ti i, ti tu,” tiin ruai i.

20 Ahab in Elijah hmu fangin, “Ai aw, i hmu lio isim, i ralpa!” tiin ti i. Ciafangin Elijah in, “Ing, na hmu ing! Bawipa ai mithmuh ah thilsual lek bawn zo isi.

21 Ciamanin Bawipa in na hnenah, ‘Na vumah bawngsiahnak lek hlengruai tuhai na nunhnak boruai tuh ing. Na innsang ai pasal hmuahhmuah, naupang tilo, upa tilo, pairal tuh sio i.

22 Israel mite sualhnak songah na lutpui manin i thinrawhnak tu mai bangin na liauruai manin na innsangte tu Nebat ai fapa kumpibawi Jeroboam le Ahijah ai fapa kumpibawi Baasha ai innsangte bang tuh i,’ ti i.

23 Cen Bawipa in, “Jezebel luang heh Jezreel khuapui songah uicote in ai tlang tuh i,’ ti i.

24 Khuasong ai a thitu na songkhatte luang tu uicote in ai tlang tuhai hampalak ai a thitute tu langtarte in ai tlang tuh i.

25 Bawipa ai mithmuh ah Ahab bang ai thilsual lek a bawntu aisu khai um lo i. A veksen in a nupui Jezebel ai forhhnak lekin bawn i.

26 A thilsual bawnhnak lakah a ningdulkul ber ngelngo tihnak tu Israel mite Canaan ramah a lut tlang fangin Bawipa in a hnawthnak Amor mite bangin milim a biahnak khiah i.

27 Elijah in thu a rel ben fangin, Ahab tu a hnikpon zik sek ai buri hnikpon sil in rong khai ai loin um i. Buri pon sil in it ai lungsia ngai le mithmai sia in um i.

28 Cen Bawipa in prophet Elijah hnenah,

29 “I hmaiah Ahab a thinlung niam in hniakhup ai a um heh hmu aw sim? Hetihin a um manin a nun song ahcen pairal bawngsiahnak hlengruai tuh lo ing. A fapa san ah Ahab ai songkhatte vumah hlengruai tuh ing,” tiin ti i.

Zanniat Bible © Bible Society of Myanmar, 2018.

Bible Society of Myanmar
Lean sinn:



Sanasan