1 Siangphahrang 20 - Zanniat Bible

Syria Thawn Tawng dun I

¹ Syria kumpibawi Benhadad in a ralkapte hmuahhmuah khawm tlang ai, amah ai ralkapte hlaiah ramdang uktu bawite sawmthum le pahnih in bawm tlang ai siphuh le a raltawnghnak siphuhlengte thawn Benhadad ho in feh tlang i. Samaria khuapui kulh tlang ai tawng dekdo i.

² Khua songah palai hlat ai Israel kumpibawi Ahab hnenah, “Kumpibawi Benhadad in,

³ na sui le na ngunte, na nupuite a mawi ber pawl le na fate lakai a hat ber pawl i pe tuseh, na ti i,” tiin rel i.

⁴ Ciafangin Ahab in, “I bawipa Benhadad rel tu ih: A ngenhnak bangin lung i khim i. Kaimah le i naihnak hmuahhmuah khai daih lekhaw amah ai i thai i,” tiin ti i.

⁵ Cia hnuaah Benhadad ai palaite tu Ahab hnenah kawi lala ai, “Na sui le na ngun, na nupuite le na fate, i pe tu, tiin na cah ing.

⁶ Ikhalselai tun tu i kuthnia bawite hlat tuhai na umhnak inn le na kuthnia tlangsuakte ai inn si tuh sio i; man nai thil a hmuhnak hmuahhmuah lang tlang tuh i. Thangha tun camcu fangin hleng tlang tuh i, na ti i,” tiin rel tlang i.

⁷ Kumpibawi Ahab in a ram songai hotute hmuahhmuah kokhawm ai anite hnenah, “Hemi pa heh kin siatsuah nuam manin thusia lek si i. I nupuite, i fate, i sui le i ngunte i ngen ai pe tuh el lo ing,” tiin ti i.

⁸ Hotute le mizapui in, “A thu tu zaikhai siar sah mah. A ngenhnak zaikhai pe mah,” ti tlang i.

⁹ Ciamanin Ahab in Benhadad ai palaite hnenah, “Ning kumpibawi i bawipa heh rel ta tu ih: a hmasa ai a ngenhnak tu pe tuhin lung i khim i. Ikhalselai a hnuata ai a ngenhnak tu lung i khim thil lo i,” tiin ti i. Cen Benhadad ai palaite tu tlung tlang i;

¹⁰ ikhalselai Benhadad in palai hlat lala ai hetihin thucah i: “Na khuapui a hnawm sio hnua ai a laivut le a hnawmborh rin amahte kut ai thiarthaitu ralkapte siar cawk lo koih tuh ing. I tihnak bangin bawn hlah lengkhaw khuavangte in kaimah i rek tuseh,” ti i.

¹¹ Kumpibawi Ahab in thu khirh ai, “Kumpibawi Benhadad rel tu ih: Ralkap pha taktak incen ral a tawng ben hlanah tluangkhawng awng kel lo i; ral a neh hnua fang ian in tluangkhawng lai i,” tiin ti i.

¹² Ahab ai thucahhnak tu Benhadad le a ṭantu bawite a riahbuk ai zu ding tlang laitak ah hleng i. Cammalak in Samaria tawng tuhin Benhadad in thupe ai a ralkapte tu amahte umhnak ṭen in ralring in um tlang i.

¹³ Cialak ah Israel kumpibawi Ahab hnenah prophet pakhat kawi ai, “Bawipa in, ‘Hemi ralkapte heh a tampui manin kih mah ih. Amahte vumah nehhnak na pe tuhai kaimah heh Bawipa ing ti khiah ling tlang tuh i,’ ti i,” tiin rel i.

¹⁴ Ahab in, “I tawng fangin aisu in ho tuh i?” tiin zawt i. Prophet in, “Ram khan uktu miukte hnia ai ralkap minote in ho tlang tuseh, tiin Bawipa in ti i,” tiin rel i. “A hmasaber ai a nortute tu aisu in ho tuh i?” tiin Ahab in zawt lehthio i. Prophet in, “Nangmah in ho tuh isi,” ti i.

¹⁵ Ciamanin kumpibawi in ramkhan uktu miukte hnia ai ralkap minote ko sio ai amahte veksen in zahnih le sawmthum le pahnih khim tlang i. Cen Israel ralkapte kokhawm sio ai amahte veksen in thawng sarih khim tlang i.

¹⁶ A ralte tu sun laiteng ah tawng tlang i; Benhadad le a ṭantu miukte sawmthum le pahnih tu a riahbuk ah zu ri tlang i.

¹⁷ Ralkap minote in hmasaber in nor tlang i. Benhadad ai hlathnak micultute in, “Samaria in ralkap bur khat suak tlang i,” tiin rel i.

¹⁸ Ciafangin Benhadad in, “Raltawng tuhin a kawi tlang ita inkhai, remhnak bawn tuhin a kawi tlang ita inkhai, a nung in pom tuh i si,” tiin thupe i.

¹⁹ Ralkap minote in tawng hmasa ai a khel lamin Israel ralkap burpui in hlun tlang i.

²⁰ A tawnghnak amahte hmai ai tawkhnak ralte tu pakhat ṭen rek tlang i. Ciafangin Syria ralkapte tu tlan tlang ai Israel ralkapte in hnawh betbo i; amah Benhadad khai siphuh vumto ralkapte in kil ai siphuh to in tlansuak i.

²¹ Kumpibawi Ahab ho in siphuh tampui le siphuhleng tampui lang ai Syria ralkapte heh a roh ngai in siatsuah tlang i.

²² Cen prophet tu kumpibawi Ahab hnenah kawi ai, “Let tulai na ralkapte heh tam deuh le pha deuh in ralring tulep. Zaizongza ralring ngai in tawlrel tu, zaimantifangin hmai kum khuakhal fangin Syria kumpibawi in na tawng leh tuh i,” tiin ti i.

Syriate In Tawng Leh I

²³ Kumpibawi Benhadad tu a kuthnia bawite in, “Israel khuavangte tu tlang vum khuavangte i. Ciamanin kin neh i. Ikhalselai phairawn ah tawng lesingkhaw neh tuh tengteng ising.

²⁴ Tunai kin bawmtu miukte sawmthum le pahnih in ralkap a hohnak in lon tulai anite ai tumrul in ral a tawng bangmi ralbawite dah tu sio.

²⁵ Cen na zamtu ralkapte zah in ralkap a thar lang tulai, siphuh le siphuhlengte khai a thar in lang tu. Israel ralkapte tu phairawn in tawng tuhai tun tu neh tuh tengteng ising,” tiin ti i. Kumpibawi Benhadad tu a lungkhim ai anite ruathnak tu hlun i.

²⁶ Khuakhal fangin a ralkapte kokhawm ai Israel tawng tuhin Aphek khua ah feh tlang i.

²⁷ Israel ralkapte khai kokhawm ve ai ralthuam thawn thuam dun in feh tlang ai Syria ralkapte ai riahbuk ralden hmun hnih ah cam tlang i. Thingkung le hampa zah Syria ralkapte lakah Israel ralkapte tu a tlawm ze manin me rualrual hnih bang i.

²⁸ Prophet tu kumpibawi Ahab hnenah feh leh ai, “Bawipa ai ponkam tu hetihin i: Kai tu tlang vum khuazing ing ai phairawn khuazing ilo ing, tiin Syriate in kin ti i. Ciamanin ralkapte hezah vumah heh nehhnak na pe tuhai nangmah le mizapui in kaimah heh Bawipa ing ti khiah i ling tlang tuh i,” tiin rel i.

²⁹ Syria ralkapte le Israel ralkapte tu amahte riahbuk ṭen ai ralden in ni sarih song ralring bikbek in um tlang i. A ni sarih nia ah tawng dun dekdo ai Israel ralkapte in Syria ralkapte heh ni khat ah ting khat rek tlang i.

³⁰ A luat mite pawl tu Aphek khua ah tlan tlang i. Cen ciatihin a tlan laitak ah Aphek khua kulhhnak ving min ai Syria ralkapte thawng kul hluah sarih thi i. Benhadad khai khuapui songah lut ve ai inn pakhat ai hnua lam khan songah relh i.

³¹ A kuthnia tlangsuakte a hnenah kawi tlang ai, “Israel kumpibawi tu mi ninghio thiam i ti ling ing. Tunah lung na khim lekhaw Israel kumpibawi hnenah kin el ah buri pon pen in le kin lu ah ri pen in feh cuk ngasing. Na nunhnak khai na zuah thai hmio i,” tiin ti i.

³² Ciamanin amahte el ah buri pon pen in a lu ah ri pen ai Ahab hnenah feh tlang i. “Na cengfa Benhadad in a nunhnak zuah tuhin na ngen i,” tiin kumpibawi Ahab hnenah ti tlang i. Ciafangin Ahab in, “Nung aw lai im? Pha i! I unau bang ai i ruathnak i nakhaw,” tiin ti i.

³³ Benhadad kuthnia tlangsuakte in Ahab in akontih in ti nimaw tiin thinhar ngai in a um laiah Ahab in, “I unau bang,” a ti fangin vaikhat pahin pan tlang ve ai, “Na tihnak bangin Benhadad tu na unau peungai i,” tiin ti tlang i. Ciafangin Ahab in, “I hnenah koih tu ih,” tiin thupe i. Benhadad a hleng fangin amah hnenah siphuh leng vumah toruai i.

³⁴ Cen Benhadad in, “Na pa hnenin i pa ai suthnak khuate tu na hnenah na khirh leh tuh ing. I pa in Samaria khua songai dawrpui a bawn bangin nangmah khai Damascus khuapui songah dawrpui bawn tu ve,” tiin ti i. Cen Ahab in, “Ciatih tuh lekhaw na hlat tuh ing,” ti ai, lungkhimhnak laikhen a bawn hnuaah Benhadad heh hlat i.

³⁵ Bawipa ai thupehnak bangin a bur in a ummi prophet lakah pakhat in a rualpui prophet pakhat heh, “I vit tu,” tiin ti i. Ikhalselai ciami pa in el i.

³⁶ Ciamanin a hnenah, “Bawipa ai thupehnak na el manin na feh sawngpah in chintit in na dawp tuh i,” tiin ti i. Feh ai a feh sawngpah in chintit in hlun ai dawp ngaingai i.

Prophet In Ahab Mawhhluk I

³⁷ Cen ciami prophet tu midang pakhat hnenah feh ai, “I vit tu,” ti i. A tihnak bangin vit ai tuahmawh i.

³⁸ Ciami prophet in a hmai tuam ai midang bangin bawn ai lampui hiangah ding i. Israel kumpibawi ciami lampui in kan tuh iang i.

³⁹ Israel kumpibawi tu kan ngaingai ai prophet in, “Aw kumpibawi, ral kin tawng laitak ah kin pommi pakhat i hnenah ralkap pakhat in koih ai, ‘Hemi pa heh phatak niu in kil tu. Tlanruai lesikhaw na nunhnak in kuan tuh isi. Ihlahle tangka thawng thum kuan tuh isi,’ iti i.

⁴⁰ Pha ngai in kil napui ingkhaw, thil dangdang bawn kongin i buai ze manin ciami pa heh tlanruai pang lio ing,” tiin cawm ngai in ti i. Kumpibawi in, “Na thu tu nangmah niu in relcat zo isi! Na sualman heh kuan tuh isi,” ti i.

⁴¹ Ciafangin prophet ai a hmai tuamhnak pon hawk ai kumpibawi in prophet i ti khiah ling vut i.

⁴² Cen prophet in kumpibawi hnenah, “Bawipa ai ponkam tu hetihin i: ‘Rek tuh i tihnak na hlat manin na nunhnak in kuan tuhai a ralkapte na luatruai manin nangmah ai ralkapte bo tuh i,’ ti i,” tiin rel i.

⁴³ Israel kumpibawi tu thincawl ngai le lungsia ngai in Samaria ah let i.