1 Siangphahrang 2 - Zanniat Bible

David In Solomon Thuhluphnak

¹ David tu a thi tuh camcu a nong fangin a fapa Solomon ko ai thucah i:

² “Kai tu i thi tuh ihang. I thi hnuaah ralpha ngai in pasal bangin um tulai,

³ Bawipa na Pathian ai thupehnak heh bawn tu. Moses in dan songai a nganhnak bangin, Bawipa ai Dan le thupehnak hmuahhmuah hlun tulai, ciatihin na thil bawnhnak hmuahhmuah le na fehhnak hmunah hlawh na tling tuh i.

⁴ Bawipa in i hnenah, ‘Na tesinfate in i thupehnak amahte thinlung veksen in le thazang veksen thawn hlun tlang lekhaw Israel ram uk tuh ngio i,’ tiin thu i kham i. A dan le a thupehnak hlun lesikhaw Bawipa in a thukhamhnak heh khimruai tuh i.

⁵ “Ciahlaiah thil dang na ling tuh i daihhnak tu Joab ai i tidan khiah i. Israel ralkapte hotu, Ner ai fapa Abner le Jether ai fapa Amasa heh Joab in rek i. Ral a tawng laitak ah mi a rek awnghnak phuzul in ral a um nawn lo hnuaah thisan luangruai i. Mawhhnak a nai lomi rek ai, a elpen le a kedawl ah thisan a mat manin, mimawh i.

⁶ Ciamanin phaniu in ruat tulai, dap niu in tar thih ai a thi tian zuah tuh lo isi.

⁷ Ikhalselai Gilead mi Barzillai ai fapate tu phaniu in sik tu. Zaimantifangin na u Absalom lau in i tlan laitak ah ning i hiotute i.

⁸ “Cen Benjamin ram Bahurim khua ah Gera ai fapa Shimei khai hai tuh loin i daih i. Mahanaim i hleng nia ah a roh ngai in i cam dekdo i. Ikhalselai Jordan Runpui i hleng fangin i hmuak ai ani tu rek tuh loin Bawipa hming sal in thu kham i ing.

⁹ Ikhalselai ciatih menma in luatruai tuh lo isi. Thuruat thiam isi ai rek loin zuah tuh hrimhrim lo isi,” ti i.

David Thi I

¹⁰ Cia hnuaah David tu thi ai Jerusalem ah phum i.

¹¹ Israel ram kum sawmli song uk i. Hebron in kum sarih song uk ai Jerusalem an kum sawm thum le kum thum song uk i.

¹² David tumrul in a fapa Solomon kumpibawi ah cang ai a ram heh kho ngai in uk i.

Adonijah Thi I

¹³ Cen Adonijah tu Solomon ai nu Bathsheba hnenah leng i. Adonijah ai nu tu Haggith i. Bathsheba in Adonijah hnenah, “Thu pha in i leng isim?” tiin zawt i. Adonijah in, “I, thupha in kawi ing.

¹⁴ Thil pakhat ngen nuamhnak nai ing,” ti i. Bathsheba in, “Ziang i?” tiin zawt i.

¹⁵ Ciafangin Adonijah in, “Kumpibawi cang tuh zo ing ai, Israel mite inkhai kumpibawi tuh i, tiin i um tlang i tihnak ling isi. Ikhalselai i umhnak bangin cang thil lo ai Bawipa ai lungkhimhnak in i nau Solomon sawn kumpibawi ah cang i.

¹⁶ Ciamanin thil pakhat na ngen i nuam ai i el hram malaw,” tiin ti i.

¹⁷ Bathsheba in, “Ziang i? I rel tucuk!” ti i. Adonijah in, “Shunem mi fenu Abishag khiah i nupui tuhin Kumpibawi Solomon i pon sah tu, nang tu na el tuh lo i tiin um ing,” ti i.

¹⁸ Ciafangin Bathsheba in, “Pha i! Kumpibawi na tawk sah tuh ing,” tiin ti i.

¹⁹ A ti bangin Bathsheba tu feh ai Adonijah tumrul in kumpibawi tawk i. A nu kawi a hmu fangin kumpibawi Solomon tu ding ai a nu ai hmaiah upathnak in a lu ut i. Cia hnuaah a kumpibawi tohkham ah to ai, a nu tu a kiahhan lamah tohkham dang pakhat ah to i.

²⁰ Cen a nu in, “Thil pakhat na ngen i nuam ai i el siang malaw,” ti i. “Ziang i, i nu? Na el tuh lo ing,” ti i.

²¹ A nu in, “Abishag heh na u Adonijah ai nupui tuhin coruai tu,” tiin ti i.

²² Ciafangin kumpibawi in, “Zaimanin Adonijah caah Abishag i ngen isi? Amah caah kumpibawi tohkham i ngen lawlaw hlah sim! Adonijah tu i u i ai suangbawi Abiathar le Joab khai amah hnenah ṭang kawm hehin!” tiin ti i.

²³ Cen Solomon in, “Adonijah in hemi i ngen manin amah ai nunhnak in kuan tuh i. A nunhnak in kuan hlah lekhaw Pathian in kaimah sawn i rek tuseh.

²⁴ I pa David ai tohkham vumah Bawipa in a kho ngai in i toh zo i. Bawipa in a thukhamhnak khimruai ai ukhnak heh kaimah le i tesinfate hnenah i pe zo i. Ciamanin a nungmi Pathian hming sal in thukhamhnak bawn ing: Tunnia ah Adonijah thi tuh i,” tiin ti i.

²⁵ Ciamanin Kumpibawi Solomon in Benaiah hnenah thupe ai, Benaiah khai feh ai Adonijah heh rek i.

Abiathar Hnawthnak Le Joab Thihnak

²⁶ Cen Kumpibawi Solomon in suangbawi Abiathar hnenah, “Na khua le na ram Anathoth ah tlung tu. Thi tlak khal sikhaw i pa David hnenah na um laiah Bawipa ai Thutiam Kuang kiltu isi ai, i vumai harsahnak hmuahhmuah i tuarpuitu na imanin tun tu na rek tuh lo ing,” tiin ti i.

²⁷ Solomon in Abiathar heh Bawipa ai suangbawi naruaihhnak in hnawt ai, ciatihin Bawipa in Shiloh ah suangbawi Eli le a tesinfate ai thuphuanghnak khimruai i.

²⁸ Ciami thu heh Joab in za i. (Joab tu Absalom ṭantu ilo napui Adonijah ṭantu i). Ciamanin Bawipa ai Ponhlam ah dawp ai puleng kite heh awh meng i.

²⁹ Kumpibawi Solomon hnenah, “Joab tu Bawipa ai Ponhlam ah dawp ai puleng hiangah um i, ti thu a than fangin Solomon in Joab hnenah mi hlat ai puleng ah a tlanhnak thu zawtruai i. Joab in, “Solomon kih manin Bawipa hnenah tlan ing,” tiin ti i. Ciamanin Joab rek tuhin Solomon in Benaiah hlat i.

³⁰ Benaiah tu Bawipa ai ponhlam ah feh ai Joab hnenah, “Kumpibawi in suak tuseh na ti i,” tiin ti i. Ciafangin Joab in, “Suak tuh lo ing, heta ah thi tuh sawn ing,” ti i. Benaiah tu kumpibawi hnenah let ai Joab ai ponghnak heh rel i.

³¹ Ciafangin Solomon in, “Joab ai ponghnak bangin bawn tu. Rek tulai phum tu. Ciatihin Joab in mawhhnak nai lo minung pahnih a rek manin kaimah le i tesinfate tu mawhphurtu tuh nawn lo ing.

³² I pa David ling thai loin mi a rek manin Bawipa in Joab vumah phuzul tuh i. Joab in a mah tahin a pha deuh minung pahnih, mawhhnak nai lomi, Israel ralkapte hotu Abner le Judah ralkapte hotu Amasa rek i.

³³ A rek mite ai thisan heh Joab le a tefate ai vumah kumzangza in fu tuh i. Ikhalselai kumpibawi tohkham vumah a totu David ai tesinfate vum ahcen Bawipa ai hmuifu khiah kumzangza in hleng tuh i,” ti i.

³⁴ Ciamanin Benaiah tu Bawipa ai Ponhlam ah feh ai Joab a rek hnuaah hampalak ah amah ai inn ah phum i.

³⁵ Cen kumpibawi in Joab tumrul in Benaiah heh ralkap hotu ah bawn ai Zadok tu suangbawi ah bawn i.

Shimei Thihnak

³⁶ Kumpibawi Solomon in Shimei ko ai a hnenah, “Nangmah caah Jerusalem ah inn sa tu. Heta ah um tulai he khua an akonah khai feh mah.

³⁷ Suak ai Kidron Rawnti niu kan le sikhaw na thi tuh i,” tiin ti i.

³⁸ Ciafangin Shimei in, “Pha i, Kumpibawi; na relhnak bangin bawn tuh ing,” tiin ti i. Ciafangin Jerusalem ah a raipui um i.

³⁹ Ikhalselai kumthum hnuaah Shimei ai salte pahnih tu Gath kumpibawi, Maacah ai fapa Akhish hnenah tlan kawm i. Gath ramah a salte pahnih um kawm i ti Shimei in a za fangin,

⁴⁰ a laak kung dan ai a salte si tuhin Gath kumpibawi Achish hnenah feh i. A salte heh hmu ai letpui leh i.

⁴¹ Shimei ai thil bawnhnak heh Solomon in a ling fangin,

⁴² Shimei heh ko ai a hnenah, “Jerusalem hlum tuh loin thu na khamruai ai, hlum lesikhaw na thi tuh i, tiin ralringhnak fiang ngai in na pe ing. Lung na khim ai na relhnak bangin hlun tuhin thu i kham ita lo sim?

⁴³ Zaimanin na thukhamhnak bal ai i thupehnak hlun lo isi?

⁴⁴ I pa David vumai thilsual na bawnhnak hmuahhmuah heh ling sio isi. Hemi manin Bawipa in na cawh tuh i.

⁴⁵ Ikhalselai Bawipa in kai tu hmuifu i pe tuhai David ai ukhnak tu kumzangza in khoruai tuh i,” tiin ti i.

⁴⁶ Kumpibawi in thupe ai, Benaiah feh ai Shimei heh rek i. Solomon ai ukhnak tu kho amam i.